ಕುಡಿಯಲು 200 ರೂ. ನೀಡದ ತಾಯಿಗೆ ಬೆಂಕಿ ಹಚ್ಚಿದ ಮಗ

ಮಹೂ: ಕುಡಿಯಲು 200 ರೂ. ನೀಡಲಿಲ್ಲ ಎಂಬ ಕ್ಷುಲ್ಲಕ ಕಾರಣಕ್ಕೆ ಮಗನೊಬ್ಬ ತಾಯಿಯನ್ನೇ ಬೆಂಕಿ ಹಚ್ಚಿ ಕೊಲ್ಲಲು ಯತ್ನಿಸಿದ ಅಮಾನವೀಯ ಘಟನೆ ಮಧ್ಯಪ್ರದೇಶದ ಮಹೂನಲ್ಲಿ ನಡೆದಿದೆ.

ತಾಯಿಯ ಎರಡೂ ಕೈಗಳಿಗೆ ಗಂಭೀರ ಗಾಯಗಳಾಗಿದ್ದು, ಅಪಾಯದಿಂದ ಪಾರಾಗಿದ್ದಾರೆ. ಭಾನುವಾರ ಮಧ್ಯಾಹ್ನ ಈ ಘಟನೆ ನಡೆದಿದೆ. ಮಗ ಸುರೇಂದ್ರ ಠಾಕೂರ್ (22) ತಾಯಿ ಉಷಾ ಬಾಯಿ (55)ಯೊಂದಿಗೆ ಕೇವಲ 200 ರೂ.ಗಾಗಿ ಜಗಳವಾಡಿದ್ದು, ತಾಯಿ ಹಣ ನೀಡಲು ನಿರಾಕರಿಸಿದಾಗ ಆಕ್ರೋಶಗೊಂಡು, ಇಂಥ ಕುಕೃತ್ಯವೆಸಗಿದ್ದಾನೆ.

ಮದ್ಯ ವ್ಯಸನಿಯಾಗಿರುವ ಸುರೇಂದ್ರ ಹಣ ನೀಡುವಂತೆ ತಾಯಿಯನ್ನು ಪೀಡಿಸುತ್ತಿದ್ದ. ಯಾವಾಗ ತಾಯಿ ಹಣ ನೀಡಲು ನಿರಾಕರಿಸಿದಳೋ, ಸೀಮೆಎಣ್ಣೆ ಸುರಿದು, ಬೆಂಕಿ ಕಡ್ಡಿ ಕೀರಿ ಹಚ್ಚಿಯೇ ಬಿಟ್ಟ. ಬಿಂಕಿ ಹತ್ತಿಕೊಂಡಿದ್ದ ತಾಯಿಯ ಕಿರುಚಾಟ ಕೇಳಿಸಿಕೊಂಡ ನೆರೆಹೊರೆಯವರು ಆಗಮಿಸಿ ಆಕೆಯನ್ನು ರಕ್ಷಿಸಿ, ಆಸ್ಪತ್ರೆಗೆ ದಾಖಲಿಸಿದ್ದಾರೆ.

ಘಟನೆ ನಂತರ ಸುರೇಂದ್ರ ತಲೆ ಮರೆಸಿಕೊಂಡಿದ್ದು, ಪೊಲೀಸರು ಆತನಿಗಾಗಿ ಶೋಧಿಸುತ್ತಿದ್ದಾರೆ.