ಸೆಲ್ಫಿ ಕ್ರೇಜ್‌: 700 ಅಡಿ ಆಳದ ಕಮರಿಗೆ ಬಿದ್ದರೂ ಬದುಕುಳಿದ

ನವಿ ಮುಂಬಯಿ: ಗೋವಾದ ಸಿಂಧುದುರ್ಗ ಜಿಲ್ಲೆಯಲ್ಲಿರುವ ಅಂಬೊಲಿ ಘಾಟ್‌ನಲ್ಲಿ ಜಲಪಾತ ಬಳಿ ಸೆಲ್ಫಿ ಕ್ಲಿಕ್ಕಿಸಿಕೊಳ್ಳಲು ಹೋದ ನಾಸಿಕ್‌ನ ವ್ಯಕ್ತಿ 700 ಅಡಿ ಆಳದ ಕಮರಿಗೆ ಜಾರಿ ಬಿದ್ದರೂ ಪವಾಡ ಸದೃಶವಾಗಿ ಸಾವಿನಿಂದ ಪಾರಾಗಿದ್ದಾರೆ.

ಸಂಪತ್‌ ಮಹಾಲೆ ಅವರು ಜಲಪಾತದ ಬಳಿ ಸೆಲ್ಫಿ ಕ್ಲಿಕ್ಕಿಸಲು ಮುಂದಾಗಿ ನಿಲ್ಲಬೇಕಾದರೆ ಸಮತೋಲನ ತಪ್ಪಿ ಕಮರಿಗೆ ಜಾರಿದ್ದಾರೆ.ಪೊಲೀಸರು, ವೃತ್ತಿನಿರತ ಟ್ರೆಕ್ಕರ್‌ಗಳು, ಸ್ಥಳೀಯ ಯುವಕರು ಸೇರಿ ಐದು ಗಂಟೆ ಶೋಧ ಕಾರ್ಯಾಚರಣೆ ನಡೆಸಿ ಪತ್ತೆ ಹಚ್ಚಿ ಮೇಲಕ್ಕೆ ಕರೆತರುವಲ್ಲಿ ಯಶಸ್ವಿಯಾಗಿದ್ದಾರೆ.

ಮೂಗೇಟು ಆಗಿದ್ದು, ಅರೆ ಪ್ರಜ್ಞಾವಸ್ಥೆಯಲ್ಲಿದ್ದ ಮಹಾಲೆ ಪ್ರಥಮ ಚಿಕಿತ್ಸೆ ಪಡೆದುಕೊಂಡ ಬಳಿಕ ಕುಟುಂಬದ ಜತೆ ನಾಸಿಕ್‌ಗೆ ತೆರಳಿ ಆಸ್ಪತ್ರೆಗೆ ದಾಖಲಾಗಿದ್ದಾರೆ. ಕುಟುಂಬ ಮತ್ತು ಸ್ನೇಹಿತರ ಜತೆ ಗೋವಾ ಪ್ರವಾಸಕ್ಕೆ ಬಂದಿದ್ದ ಮಹಾಲೆ ಕಮರಿಗೆ ಜಾರಿ ಬಿದ್ದಾಗ ಅವರ ಪತ್ನಿ ಪೊಲೀಸರಿಗೆ ಮಾಹಿತಿ ನೀಡಿದ್ದರು.

ಪೊಲೀಸರೊಂದಿಗೆ ವಿಪತ್ತು ನಿರ್ವಹಣಾ ತಂಡವು ಸ್ಥಳೀಯ ಯುವಕರ ಜತೆ ಹಗ್ಗದ ನೆರವಿನಿಂದ ಕಣಿವೆಗೆ ಇಳಿದಿದೆ. ಎಂಟು ಮಂದಿ ರಕ್ಷಣಾ ಕಾರ್ಯಕರ್ತರು ಮತ್ತೊಂದು ಬದಿಯಿಂದ ಅಂದರೆ ಐದು ಕಿ.ಮೀ ದೂರದಿಂದ ಕಣಿವೆಗೆ ಇಳಿದರು ಎಂದು ಪೊಲೀಸರು ತಿಳಿಸಿದ್ದಾರೆ.

ಸೆಲ್ಫಿ ತೆಗೆದುಕೊಂಡ ಬಳಿಕ ಕೊಲ್ಲಾಪುರ ಮಹಾಲಕ್ಷ್ಮೀ ದೇಗುಲಕ್ಕೆ ಹೋಗಲಿದ್ದೆವು. ಇಂಥ ಕಮರಿಗೆ ಬಿದ್ದ ಪತಿಯನ್ನು ಕೊಲ್ಲಾಪುರ ಮಹಾಲಕ್ಷ್ಮಿಯೇ ಬದುಕಿಸಿದ್ದಾಗಿ ಮಹಾಲೆ ಅವರ ಪತ್ನಿ ಛಾಯಾ ಹೇಳಿದ್ದಾರೆ.