ಸ್ತನ ಕ್ಯಾನ್ಸರ್‌ ಅಂಟುರೋಗವೆಂದು ಪತ್ನಿಯನ್ನು ಹೊರ ಹಾಕಿದ ಪತಿ

ಅಹಮದಾಬಾದ್‌: ಸ್ತನ ಕ್ಯಾನ್ಸರ್‌ ಅಂಟುರೋಗವೆಂದು ಉದ್ಯಮಿಯೊಬ್ಬ ಪತ್ನಿಯನ್ನು ಮನೆಯಿಂದ ಹೊರಗಟ್ಟಿದ ಆಘಾತಕಾರಿ ಘಟನೆ ಗುಜರಾತ್‌ನಲ್ಲಿ ಸಂಭವಿಸಿದೆ. ಪತ್ನಿಗೆ ಬಂದಿರುವ ಸ್ತನ ಕ್ಯಾನ್ಸರ್‌ ರೋಗ ಮನೆಮಂದಿಗೆಲ್ಲ ಹರಡುತ್ತದೆ ಎಂದು ಹೆದರಿ ಈ ಕೃತ್ಯ ಎಸಗಿದ್ದಾನಂತೆ. ಸಂತ್ರಸ್ತೆ ಪೊಲೀಸ್‌ ಠಾಣೆ ಮೆಟ್ಟಿಲೇರಿದ್ದಾಳೆ.

ಪತಿಯ ಈ ವರ್ತನೆ ವಿರುದ್ಧ 30 ವರ್ಷದ ಮಹಿಳೆ ಮಿಥಕಲಿ ಮಹಿಳಾ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಸೌರಾಷ್ಟ್ರದಲ್ಲಿ ಮೆಟಲ್ ಎಂಜಿನಿಯರ್‌ ಆಗಿರುವ ಈ ಪತಿ ಮಹಾಶಯನಿಗೆ ಸ್ತನ ಕ್ಯಾನ್ಸರ್ ಬಗ್ಗೆ ಅರಿವಿಲ್ಲವಂತೆ!

ಈ ದಾಂಪತ್ಯದಲ್ಲಿ ಎರಡು ವರ್ಷಗಳ ಹಿಂದೆಯೇ ಬಿರುಕು ಮೂಡಿತ್ತು. 2 ವರ್ಷಗಳ ಹಿಂದೆಯೇ ಈ ಪತ್ನಿ, ಎರಡು ವರ್ಷದ ಮಗುವಿನೊಂದಿಗೆ ಪತಿಯನ್ನು ತ್ಯಜಿಸಿದ್ದಳು. ವಿಚ್ಛೇದನ ಪ್ರಕರಣ ಕೋರ್ಟ್ ಮೆಟ್ಟಿಲೇರಿದಾಗ, ರಾಜಿ ಮಾಡಿಕೊಂಡು ಪತ್ನಿಯನ್ನು ಪತಿಯೇ ಮನೆಗೆ ಕರೆದುಕೊಂಡು ಬಂದಿದ್ದ.

ಇದೀಗ ಮಹಿಳೆಗೆ ಸ್ತನ ಕ್ಯಾನ್ಸರ್ ಇರುವುದು ಪತ್ತೆಯಾಗುತ್ತಿದ್ದಂತೆ, ಮನೆಯಿಂದ ಹೊರ ಹಾಕಿದ್ದಾನೆ. ಈ ಮಹಿಳೆಯ ತಂದೆ ಅಸುನೀಗಿದ್ದು, ತಾಯಿಯ ಆರ್ಥಿಕ ಪರಿಸ್ಥಿತಿ ಹೇಳುವಷ್ಟು ಚೆನ್ನಾಗಿಲ್ಲ. ದೂರವಾಗುತ್ತೇನೆ ಎಂದಾಗ ಬಿಡದೇ, ಇದೀಗ ಅನಾರೋಗ್ಯದಿಂದ ಬಳಲುತ್ತಿರುವಾಗ ಮನೆಯಿಂದ ಹೊರ ಹಾಕಿರುವುದಕ್ಕೆ ಮಹಿಳೆ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಪತ್ನಿಯನ್ನು ವಾಪಾಸು ಕರೆತಂದು ಚಿಕಿತ್ಸೆ ನೀಡುವುದಾಗಿ ಮತ್ತು ಆಕೆಯ ಜತೆಗೆ ಸಂಸಾರ ನಡೆಸುವುದಾಗಿ ಪತಿ ಭರವಸೆ ನೀಡಿದ್ದಾನೆ ಎಂದು ಪೊಲೀಸ್‌ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.