140 ನಕಲಿ ಇ-ಮೇಲ್‌ ಖಾತೆ ರಚಿಸಿ ಆಕ್ಷೇಪಾರ್ಹ ಕಮೆಂಟ್ ಹಾಕುತ್ತಿದ್ದ ಆರೋಪಿ ಬಂಧನ

[This story originally published in Maharashtra Times on Feb 21, 2019]

Vijaya Karnataka Web

ಮುಂಬಯಿ: ನಕಲಿ ಇ-ಮೇಲ್ ಖಾತೆಗಳನ್ನು ಬಳಸಿಕೊಂಡು ಮಹಾರಾಷ್ಟ್ರ ಟೈಮ್ಸ್‌ ವೆಬ್‌ಸೈಟ್‌ನಲ್ಲಿ ಪ್ರಚೋದನಕಾರಿ ಹಾಗೂ ವಿವಾದಾತ್ಮಕ ಕಮೆಂಟ್‌ಗಳನ್ನು ಪ್ರಕಟಿಸಿದ್ದಕ್ಕಾಗಿ 31 ವರ್ಷದ ಯುವಕನೊಬ್ಬನನ್ನು ಮುಂಬಯಿ ಪೊಲೀಸರು ಬಂಧಿಸಿದ್ದಾರೆ.

ಆರೋಪಿಯನ್ನು ಸಂದೇಶ ಅನಿಲ್ ಖಾಪ್ರೆ ಎಂದು ಗುರುತಿಸಲಾಗಿದ್ದು, ಈತನನ್ನು ಆಜಾದ್ ಮೈದಾನ ಪೊಲೀಸರು ನಹೂರ್‌ನಿಂದ ಬಂಧಿಸಿದ್ದಾರೆ.

ತಾನು ವಾಸಿಸುವ ಕಟ್ಟಡದ ಮತ್ತೊಬ್ಬ ನಿವಾಸಿ, ನರಹರ್ ಸಾಧು ಬೊಧಾರೆ (71) ಎಂಬವರ ಮೇಲಿನ ವೈಯಕ್ತಿಕ ದ್ವೇಷದಿಂದ ಅವರ ಹೆಸರಿನಲ್ಲಿ ನಕಲಿ ಇ-ಮೇಲ್ ಖಾತೆ ರಚಿಸಿ ಕಳೆದ ಎರಡು ವರ್ಷಗಳಿಂದ ಮಹಾರಾಷ್ಟ್ರ ಟೈಮ್ಸ್‌ನಲ್ಲಿ ಪ್ರಕಟಿತ ವಿಷಯಗಳ ಮೇಲೆ ವಿವಾದಾತ್ಮಕ ಟೀಕೆ-ಟಿಪ್ಪಣಿಗಳನ್ನು ಹಾಕುತ್ತಿದ್ದ.

ಹಾಗಿದ್ದರೂ, ತನ್ನ ಇ-ಮೇಲ್ ಖಾತೆ ಬ್ಲಾಕ್ ಆದ ಬಳಿಕ ಮಹಾರಾಷ್ಟ್ರ ಟೈಮ್ಸ್‌ ವೆಬ್ ಎಡಿಟರ್ ಹೆಸರಿನಲ್ಲಿ ಖಾಪ್ರೆ ಮತ್ತೊಂದು ನಕಲಿ ಖಾತೆ ರಚಿಸಿ ಕಮೆಂಟ್‌ಗಳನ್ನು ಹಾಕಲಾರಂಭಿಸಿದ್ದ. ಬಳಿಕ ಈತನ ವಿರುದ್ಧ ಸೈಬರ್ ಅಪರಾಧ ವಿಭಾಗಕ್ಕೆ ದೂರು ನೀಡಲಾಗಿತ್ತು. ಆಜಾದ್ ಮೈದಾನ್ ಪೊಲೀಸರು ಕೇಸು ದಾಖಲಿಸಿಕೊಂಡಿದ್ದರು.

ಆರೋಪಿ ಬಳಸುವ ಐಪಿ ಅಡ್ರೆಸ್‌ ಹಾಗೂ ಇತರ ವಿವರಗಳನ್ನು ಪತ್ತೆ ಮಾಡಿದ ಪೊಲೀಸರು ಆತನನ್ನು ಬಂಧಿಸಿದ್ದಾರೆ.

ವಿಚಾರಣೆ ವೇಳೆ ಖಾಪ್ರೆ ತಪ್ಪೊಪ್ಪಿಕೊಂಡಿದ್ದು, ಆಕ್ಷೇಪಾರ್ಹ ಕಮೆಂಟ್‌ಗಳನ್ನು ಹಾಕಲು ಎರಡು ವರ್ಷಗಳಲ್ಲಿ 140ಕ್ಕೂ ಹೆಚ್ಚು ಫೇಕ್ ಅಕೌಂಟ್‌ಗಳನ್ನು ರಚಿಸಿದ್ದ. ಈತನನ್ನು ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗಿದ್ದು ಮೂರು ದಿನಗಳ ಕಾಲ ಪೊಲೀಸ್ ಕಸ್ಟಡಿಗೆ ಒಪ್ಪಿಸಲಾಗಿದೆ.