ಗರ್ಲ್‌ ಫ್ರೆಂಡ್‌ಗಾಗಿ ವಿಮಾನ ಹೈಜಾಕ್‌ ಡ್ರಾಮಾ

ಹೈದರಾಬಾದ್‌: ಗೆಳತಿಯು ಮುಂಬಯಿನಿಂದ ಗೋವಾಕ್ಕೆ ನಿಗದಿಗೊಳಿಸಿದ್ದ ಪ್ರಯಾಣವನ್ನು ಮುಂದೂಡಬೇಕು ಎಂಬ ಉದ್ದೇಶದಿಂದ ವಿಮಾನ ಹೈಜಾಕ್‌ ಆಗಲಿದೆ ಎಂದು ಮುಂಬಯಿ ವಿಮಾನ ನಿಲ್ದಾಣಕ್ಕೆ ಬೆದರಿಕೆಯ ಇ-ಮೇಲ್‌ ಕಳಿಸಿದ್ದಾಗಿ ಆರೋಪಿ ವಿಚಾರಣೆ ವೇಳೆ ಪೊಲೀಸರಿಗೆ ತಿಳಿಸಿದ್ದಾನೆ.

ಹೈದರಾಬಾದ್‌ ಪೊಲೀಸರು ಆರೋಪಿ, ಬಿಸ್‌ನೆಸ್‌ಮನ್‌ ವಂಶಿಕೃಷ್ಣನನ್ನು ಬಂಧಿಸಿ ವಿಚಾರಣೆ ನಡೆಸಿದಾಗ ಈ ವಿಚಾರವನ್ನು ಆತ ಬಾಯ್ಬಿಟ್ಟಿದ್ದಾನೆ.

ಆರೋಪಿಗೆ ಮದುವೆಯಾಗಿದ್ದು, ಮಗಳಿದ್ದಾಳೆ. ಇತ್ತೀಚೆಗೆ ಫೇಸ್‌ಬುಕ್‌ ಮೂಲಕ ಚೆನ್ನೈನ ಯುವತಿಯ ಪರಿಚಯವಾಗಿ ಸ್ನೇಹವಾಗಿತ್ತು. ಆಕೆಯು ಏಪ್ರಿಲ್‌ 16ರಂದು ತನಗೆ ಚೆನ್ನೈನಿಂದ ಮುಂಬಯಿಗೆ ವಿಮಾನ ಟಿಕೆಟ್‌ ಬುಕ್‌ ಮಾಡುವಂತೆ ಮತ್ತು ಅಲ್ಲೇ ತನ್ನನ್ನು ಭೇಟಿಯಾಗುವಂತೆ ತಿಳಿಸಿದ್ದಳು.

ಆದರೆ ಟಿಕೆಟ್‌ ಬುಕ್‌ ಮಾಡಲು ಆರೋಪಿಯ ಬಳಿಕ ಸಾಕಷ್ಟು ಹಣ ಇರಲಿಲ್ಲ. ಹೀಗಾಗಿ ಏಪ್ರಿಲ್‌ 15ಕ್ಕೆ ನಕಲಿ ಟಿಕೆಟ್‌ ಬುಕ್‌ ಮಾಡಿದ್ದ. ಬಳಿಕ ಮಹಿಳೆಯ ಹೆಸರಿನಲ್ಲಿ ಇ-ಮೇಲ್‌ ಕಳಿಸಿದ್ದು, ಆರು ಮಂದಿ ಮುಂಬಯಿ, ಚೆನ್ನೈ, ಹೈದರಾಬಾದ್‌ ನಿಲ್ದಾಣಗಳಿಂದ ಹೊರಡುವ ವಿಮಾನಗಳನ್ನು ಹೈಜಾಕ್‌ ಮಾಡಲಿದ್ದಾರೆ ಎಂದು ಸಂದೇಶ ಕಳಿಸಿ ಒಂದು ಡ್ರಾಮಾ ಸೃಷ್ಟಿಸಿದ್ದ.

ಬೆದರಿಕೆ ಸಂದೇಶದ ಹಿನ್ನೆಲೆಯಲ್ಲಿ ವಿಮಾನ ನಿಲ್ದಾಣಗಳಲ್ಲಿ ಕಟ್ಟೆಚ್ಚರ ವಹಿಸಲಾಗಿತ್ತು. ಬೆದರಿಕೆ ಸಂದೇಶದ ಬೆನ್ನು ಹತ್ತಿದ ತನಿಖಾಧಿಕಾರಿಗಳು ಆರೋಪಿಯನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದು, ಪ್ರಕರಣವನ್ನು ಬಯಲಿಗೆಳೆದಿದ್ದಾರೆ.


Man who sent flight hijack threat : Hyderabad police task force have arrested a 32-year-old businessman for sending a fake hijack threat email to the Mumbai police on April 15.