ಕೆಲಸಕ್ಕೆ ಹಾಜರಾದ ಪರಿಕ್ಕರ್, ಟ್ವಿಟರ್‌ನಲ್ಲಿ ಧನ್ಯವಾದ

ಪಣಜಿ: ಕಳೆದ ಕೆಲ ತಿಂಗಳಿಂದ ಅಮೆರಿಕದಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ ಗೋವಾ ಮುಖ್ಯಮಂತ್ರಿ ಮನೋಹರ್ ಪರಿಕ್ಕರ್ ಗುರುವಾರ ತಾಯ್ನಾಡಿಗೆ ಮರಳಿದ್ದು, ಇಂದಿನಿಂದ (ಜೂ.15) ಕೆಲಸಕ್ಕೆ ಹಾಜರಾಗುತ್ತಿರುವುದಾಗಿ ಟ್ವೀಟ್ ಮಾಡಿದ್ದಾರೆ.

ಅನಾರೋಗ್ಯದಿಂದ ನಾನು ಹೊರಬರಲು ಸಹಕರಿಸಿದ, ನನ್ನನ್ನು ಬೆಂಬಲಿ ಹೊಸ ಸ್ಫೂರ್ತಿ ತುಂಬಿದ ಹಿತೈಷಿಗಳಿಗೆ, ಬೇಗ ಚೇತರಿಸಿಕೊಳ್ಳಬೇಕೆಂದು ಹಾರೈಸಿರುವ ಎಲ್ಲರಿಗೂ ಧನ್ಯವಾದಗಳು ಎಂದು ಟ್ವೀಟ್ ಮಾಡಿದ್ದಾರೆ.

ಮೇದೋಜೀರಕ ಗ್ರಂಥಿಯ ಕ್ಯಾನ್ಸರ್‌‍ನಿಂದ ಬಳಸುತ್ತಿದ್ದ ಅವರು ಅಮೆರಿಕದಲ್ಲಿ 3 ತಿಂಗಳ ಕಾಲ ಚಿಕಿತ್ಸೆ ಪಡೆದು ಇದೀಗ ಸ್ವದೇಶಕ್ಕೆ ಮರಳಿದ್ದಾರೆ. ಗುರುವಾರ ಮುಂಬಯಿಗೆ ಬಂದಿಳಿದ ಮುಖ್ಯಮಂತ್ರಿ, ಅಲ್ಲಿಂದ ಮತ್ತೊಂದು ವಿಮಾನದಲ್ಲಿ ಪಣಜಿಗೆ ಆಗಮಿಸಿದರು ಎಂದು ಮುಖ್ಯಮಂತ್ರಿ ಸಚಿವಾಲಯದ ಪ್ರಕಟಣೆ ತಿಳಿಸಿದೆ. 62 ವರ್ಷ ಪ್ರಾಯದ ಪರಿಕ್ಕರ್‌, ಈ ವರ್ಷ ಮಾರ್ಚ್‌ 7ರಂದು ಅಮೆರಿಕಕ್ಕೆ ತೆರಳಿದ್ದರು. ಅಲ್ಲಿಂದಲೇ ಆಡಳಿತ ನಡೆಸುತ್ತಿದ್ದರು.

ಇದಕ್ಕೂ ಮುನ್ನ ಪರಿಕ್ಕರ್ ಶುಕ್ರವಾರ ಬೆಳಗ್ಗೆ ಹಲವಾರು ದೇವಾಲಯಗಳಿಗೆ ಭೇಟಿ ನೀಡಿದರು. ಉತ್ತರ ಗೋವಾದಿಂದ 15 ಕಿ.ಮೀ ದೂರದಲ್ಲಿರುವ ಖಂಡೋಲಾ ಗ್ರಾಮದಲ್ಲಿರುವ ಪರಿಕ್ಕರ್ ಮನೆದೇವರಾದ ದೇವಕಿ ಕೃಷ್ಣ ದೇವಾಲಯಕ್ಕೆ ಭೇಟಿ ನೀಡಿದರು. ಬಳಿಕ ಪಣಜಿಗೆ ಹಿಂತಿರುಗಿ ಅವರು ಮಹಾಲಕ್ಷ್ಮಿ ದೇವಾಲಯಕ್ಕೆ ಭೇಟಿ ನೀಡಿದರು.