ಬದುಕಿರುವ ತನಕ ಪರಿಕ್ಕರ್‌ ಅವರೇ ಸಿಎಂ: ಗೋವಾ ಡೆಪ್ಯೂಟಿ ಸ್ಪೀಕರ್‌

ಪಣಜಿ: ಬದುಕಿರುವ ತನಕವೂ ಮನೋಹರ ಪರಿಕ್ಕರ್‌ ಅವರೇ ಮುಖ್ಯಮಂತ್ರಿಯಾಗಿ ಮುಂದುವರಿಯುತ್ತಾರೆ ಎಂದು ಗೋವಾ ವಿಧಾನಸಭೆ ಡೆಪ್ಯೂಟಿ ಸ್ಪೀಕರ್‌ ಮೈಕೆಲ್‌ ಲೊಬೊ ಹೇಳಿದ್ದಾರೆ. ಉತ್ತರ ಗೋವಾದ ಕಲಂಗೇಟ್‌ ವಿಧಾನಸಭೆ ಕ್ಷೇತ್ರದಲ್ಲಿ ಮಂಗಳವಾರ ಕಾರ್ಯಕ್ರಮವೊಂದರಲ್ಲಿ ಮಾತನಾಡಿದ ಅವರು, ''ಪರಿಕ್ಕರ್‌ ಎಂದಿಗೂ ವಿಶ್ರಾಂತಿ ಬಯಸುವ ಮನುಷ್ಯ ಅಲ್ಲ. ಕೊನೆಯ ಉಸಿರು ಇರುವವರೆಗೂ ರಾಜ್ಯದ ಜನರ ಸೇವೆ ಮಾಡಲು ಬಯಸುತ್ತಾರೆ,'' ಎಂದರು

''ಕ್ಯಾನ್ಸರ್‌ನಿಂದ ಬಳಲುತ್ತಿದ್ದರೂ ಪರಿಕ್ಕರ್‌ ಅವರು ಅಧಿಕಾರಿಗಳಿಗೆ ಸೂಕ್ತ ನಿರ್ದೇಶನಗಳನ್ನು ನೀಡುತ್ತ ಉತ್ತಮ ಆಡಳಿತ ನಡೆಸುತ್ತಿದ್ದಾರೆ. ಎಲ್ಲಿಯವರೆಗೆ ಅವರ ಮನಸ್ಸು ಕಾರ್ಯನಿರ್ವಹಿಸಲು ಶಕ್ತವಾಗಿರುತ್ತದೆಯೋ ಅಲ್ಲಿಯವರೆಗೆ ಅವರು ಆಡಳಿತ ನಡೆಸುತ್ತಾರೆ. ಅವರ ಆರೋಗ್ಯ ಒಮ್ಮೊಮ್ಮೆ ಸುಧಾರಿಸುತ್ತದೆ, ಒಮ್ಮೊಮ್ಮೆ ಕ್ಷೀಣಿಸುತ್ತದೆ. ಕ್ಯಾನ್ಸರ್‌ನಂತಹ ಕಾಯಿಲೆಯೇ ಹಾಗೆ,'' ಎಂದು ನುಡಿದರು.