ಪಟನಾ: ಬಿಹಾರದಲ್ಲಿ ಅನೇಕ ಮಂದಿ ಪ್ರಧಾನಿ ನರೇಂದ್ರ ಮೋದಿಯವರ ಕತ್ತು ಸೀಳಲು ಮತ್ತು ಕೈ ಕತ್ತರಿಸಲು ಸಿದ್ಧರಾಗಿದ್ದಾರೆ ಎಂದು ಹೇಳುವ ಮೂಲಕ ಬಿಹಾರದ ಮಾಜಿ ಮುಖ್ಯಮಂತ್ರಿ ರಾಬ್ಡಿ ದೇವಿ ಹೊಸ ವಿವಾದಕ್ಕೆ ಗುರಿಯಾಗಿದ್ದಾರೆ.
ಪ್ರಧಾನಿ ಮೋದಿಯವರನ್ನು ಯಾರಾದರೂ ಟೀಕಿಸಿದರೆ ಅವರ ಬೆರಳು ಮತ್ತು ಕೈಯನ್ನು ಕತ್ತರಿಸುವುದಾಗಿ ಬಿಹಾರದ ಬಿಜೆಪಿ ಮುಖ್ಯಸ್ಥ ನಿತ್ಯಾನಂದ ರಾಯ… ಹೇಳಿಕೆ ನೀಡಿದ್ದ ಬೆನ್ನಲ್ಲೇ ಆರ್‌ಜೆಡಿ ನಾಯಕಿಯೂ ಆಗಿರುವ ರಾಬ್ಡಿ ದೇವಿ, ಮೋದಿ ತಲೆ ಕಡಿಯುವ ಮಾತುಗಳನ್ನಾಡಿ, ಕೇಸರಿ ಪಾಳಯವನ್ನು ಕೆಣಕಿದ್ದಾರೆ.
ಆರ್‌ಜೆಡಿಯ ರಾಷ್ಟ್ರೀಯ ಮಂಡಳಿ ಸಭೆಯಲ್ಲಿ ಮಾಜಿ ಮುಖ್ಯಮಂತ್ರಿ ಮತ್ತು ಪಕ್ಷ ದ ವರಿಷ್ಠ ಲಾಲೂ ಪ್ರಸಾದ್‌ ಯಾದವ್‌ ಅವರನ್ನು 10ನೇ ಬಾರಿ ರಾಷ್ಟ್ರೀಯ ಅಧ್ಯಕ್ಷ ರನ್ನಾಗಿ ಆಯ್ಕೆ ಮಾಡಿದ ಸಂದರ್ಭ ಮಾತನಾಡಿದ ರಾಬ್ಡಿ ದೇವಿ, ಬಿಜೆಪಿ ಮುಖಂಡರ ವಿರುದ್ಧ ಹರಿಹಾಯ್ದರು.
''ಮೋದಿಯವರ ಕಡೆ ಬೊಟ್ಟ ಮಾಡಿದರೆ ಅವರ ಬೆರಳು ಮತ್ತು ಕೈಯನ್ನು ಕತ್ತರಿಸುವುದಾಗಿ ಬಿಜೆಪಿಯ ಕೆಲವು ಮುಖಂಡರು ಹೇಳುತ್ತಿದ್ದಾರೆ. ಅವರಿಗೆ ನಿಜವಾಗಿಯೂ ಧೈರ್ಯವಿದ್ದರೆ ಆ ಕೆಲಸ ಮಾಡಲಿ,'' ಎಂದು ಸವಾಲು ಹಾಕಿದರು.
''ಬಿಹಾರದ ಜನರು ಸುಮ್ಮನೆ ಕುಳಿತುಕೊಳ್ಳುವುದಿಲ್ಲ. ತಮ್ಮ ಕೈಯನ್ನು ಕತ್ತರಿಸಲು ಬಂದವರ ಕೈಗಳನ್ನು ಕಡಿದು ಹಾಕಲು ಕಾದು ಕುಳಿತಿದ್ದಾರೆ. ಮೇಲಾಗಿ ಪ್ರಧಾನಿಯ ತಲೆ ಕತ್ತರಿಸಲೂ ಅನೇಕರು ಸಿದ್ಧರಿದ್ದಾರೆ,'' ಎಂದು ಹೇಳಿದರು.
Many in Bihar ready to slit PM Modi's throat, chop off his hand: Rabri Devi