ನಮ್ಮನ್ನು ನಂಬಿ, ಮಸೂದ್‌ ಅಜರ್‌ ಹೆಸರು ಶೀಘ್ರ ಜಾಗತಿಕ ಉಗ್ರನ ಪಟ್ಟಿಗೆ ಸೇರ್ಪಡೆ

ಹೊಸದಿಲ್ಲಿ: ಜೈಷೆ ಮೊಹಮ್ಮದ್‌ ಉಗ್ರ ಸಂಘಟನೆ ಸ್ಥಾಪಕ ಮಸೂದ್‌ ಅಜರ್‌ನನ್ನು 'ಜಾಗತಿಕ ಉಗ್ರ'ನೆಂದು ಘೋಷಿಸಲು ತಡೆಯೊಡ್ಡುತ್ತಿರುವ ಚೀನಾ, ಈ ವಿಚಾರದಲ್ಲಿ ಭಾರತದ ಕಳವಳ ಸದ್ಯದಲ್ಲೇ ದೂರವಾಗಲಿದೆ ಎಂದು ಹೇಳಿದೆ. ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯಲ್ಲಿ ಅಜರ್‌ ಹೆಸರನ್ನು ಜಾಗತಿಕ ಉಗ್ರ ಪಟ್ಟಿಗೆ ಸೇರಿಸುವ ಪ್ರಸ್ತಾವಕ್ಕೆ ಮತ್ತೊಮ್ಮೆ ವಿರೋಧ ವ್ಯಕ್ತಪಡಿಸಿದ ಬಳಿಕ ಫ್ರಾನ್ಸ್‌, ಬ್ರಿಟನ್‌, ಅಮೆರಿಕದಿಂದ ಎಚ್ಚರಿಕೆ ಪಡೆದ ಬೆನ್ನಲ್ಲೇ ಚೀನಾ ತನ್ನ ನಿಲುವು ಬದಲಿಸುವ ಮಾತನಾಡಿದೆ.

ಭಾರತದಲ್ಲಿರುವ ಚೀನಾದ ರಾಯಭಾರಿ ಲುವೊ ಝಾಹೋಯಿ ಅವರು ತಮ್ಮ ಕಚೇರಿಯಲ್ಲಿ ಆಯೋಜಿಸಿದ್ದ ಹೋಳಿ ಹಬ್ಬದ ಸಂದರ್ಭದಲ್ಲಿ ಮಾಧ್ಯಮಗಳ ಜತೆ ಮಾತನಾಡಿ, ''ನಮ್ಮನ್ನು ನಂಬಿ, ಮಸೂದ್‌ ಅಜರ್‌ನನ್ನು ಜಾಗತಿಕ ಉಗ್ರ ಪಟ್ಟಿಗೆ ಸೇರಿಸುವ ಕುರಿತು ಎದ್ದಿರುವ ಗೊಂದಲ ಶೀಘ್ರದಲ್ಲೇ ಬಗೆಹರಿಯಲಿದೆ. ತಾಂತ್ರಿಕ ಕಾರಣಕ್ಕೆ ತಡೆ ನೀಡಲಾಗಿದೆ. ಈ ವಿಷಯದ ಬಗ್ಗೆ ವಿಸ್ತೃತ ಚರ್ಚೆಗೆ ಇನ್ನೂ ಅವಕಾಶವಿ¨,''æ ಎಂದು ಅವರು ಹೇಳಿದ್ದಾರೆ. ಅಲ್ಲದೇ ಭಾರತ-ಚೀನಾ ಸಂಬಂಧ ಎಂದಿನಂತೆ ವಿಶ್ವಾಸಾರ್ಹತೆಯ ಹಳಿಯಲ್ಲಿ ಸಾಗಲಿದೆ ಎಂದಿದ್ದಾರೆ.

ಕೆಲ ದಿನಗಳ ಹಿಂದೆ ಮಸೂದ್‌ ಅಜರ್‌ನನ್ನು ಜಾಗತಿಕ ಉಗ್ರ ಪಟ್ಟಿಗೆ ಸೇರಿಸುವ ಪ್ರಸ್ತಾವಕ್ಕೆ ಚೀನಾ ವಿಶ್ವಸಂಸ್ಥೆಯಲ್ಲಿ ತಡೆವೊಡ್ಡಿತ್ತು. ಚೀನಾದ ಈ ನಡೆಯನ್ನು ಭಾರತ ಹಾಗೂ ವಿಶ್ವಸಂಸ್ಥೆ ಭದ್ರತಾ ಮಂಡಳಿಯ ಕಾಯಂ ಸದಸ್ಯ ರಾಷ್ಟ್ರಗಳು ವಿರೋಧಿಸಿದ್ದವು. ಅಜರ್‌ ನೇತೃತ್ವದ ಜೈಷೆ ಸಂಘಟನೆ ಪುಲ್ವಾಮಾ ದಾಳಿ ನಡೆಸಿದ ಬಳಿಕ ಈ ಪಾತಕಿಯನ್ನು ಮಟ್ಟಹಾಕಲು ಭಾರತ ವಿಶ್ವ ಸಮುದಾಯವನ್ನು ಕೋರಿಕೊಂಡಿತ್ತು. ಜಾಗತಿಕ ಉಗ್ರ ಪಟ್ಟಿಗೆ ಅಜರ್‌ ಹೆಸರು ಸೇರಿಸಲು ಚೀನಾ ಅಡ್ಡಿಪಡಿಸಿದ ಬೆನ್ನಲ್ಲೇ ಫ್ರಾನ್ಸ್‌ ತನ್ನ ದೇಶದಲ್ಲಿರುವ ಈತನ ಆಸ್ತಿ ಮುಟ್ಟುಗೋಲು ಹಾಕಿಕೊಳ್ಳುವ ನಿರ್ಧಾರ ಪ್ರಕಟಿಸಿ, ಭಾರತ ಪರ ನಿಂತಿತು.