ಮಸೂದ್‌ ಅಜರ್‌ಗೆ ತಕ್ಕ ಶಾಸ್ತಿ ಆಗುವವರೆಗೂ ಸುಮ್ಮನಿರಲ್ಲ: ಭಾರತ

ನ್ಯೂಯಾರ್ಕ್‌: ಭಾರತದ ಮೋಸ್ಟ್‌ ವಾಂಟೆಡ್‌ ಉಗ್ರ, ಜೈಷೆ ಮೊಹಮ್ಮದ್‌ ಸಂಘಟನೆಯ ಮುಖ್ಯಸ್ಥ ಮಸೂದ್‌ ಅಜರ್‌ನನ್ನು ಜಾಗತಿಕ ಉಗ್ರ ಎಂದು ವಿಶ್ವಸಂಸ್ಥೆ ಘೋಷಿಸಲಿದೆ ಎಂಬ ವಿಶ್ವಾಸವನ್ನು ಭಾರತ ವ್ಯಕ್ತಪಡಿಸಿದೆ.

ಈ ವಿಷಯವನ್ನು ತಾರ್ಕಿಕ ಅಂತ್ಯಕ್ಕೆ ಕೊಂಡೊಯ್ಯುವವರೆಗೂ ಸುಮ್ಮನಿರುವುದಿಲ್ಲ ಎಂದು ಭಾರತ ಸ್ಪಷ್ಟಪಡಿಸಿದೆ.

ಕಳೆದ ಜನವರಿ 2, 2016ರಲ್ಲಿ ಪಠಾಣ್‌ಕೋಟ್‌ ಮೇಲೆ ನಡೆದ ದಾಳಿಯ ಪ್ರಮುಖ ರೂವಾರಿ ಮಸೂದ್‌ ಅಜರ್‌ ಎಂದು ಭಾರತ ವಾದಿಸಿದೆ. ಅಜರ್‌ ಸಹೋದರ ರೌಫ್‌ ಹಾಗೂ ಇತರ ಐವರು ಪಠಾಣ್‌ಕೋಟ್‌ ವಾಯುನೆಲೆಯ ಮೇಲೆ ದಾಳಿ ನಡೆಸಿದ್ದಾರೆ. ಭಾರತದ ಏಳು ಯೋಧರು ಹಾಗೂ ದಾಳಿ ನಡೆಸಿದ ಆರೂ ಉಗ್ರರು ಹತರಾಗಿದ್ದಾರೆ.

ಇದಲ್ಲದೇ ಮಸೂದ್‌ ಅಜರ್‌ ಹಲವಾರು ದಾಳಿಯ ಪ್ರಮುಖ ರೂವಾರಿಯಾಗಿದ್ದಾನೆ. ಈತನನ್ನು ಕಾನೂನು ಕಟಕಟೆಗೆ ತಂದು ನಿಲ್ಲಿಸುವವರೆಗೂ ಸುಮ್ಮನಿರುವುದಿಲ್ಲ ಎಂದು ಭಾರತ ತಿಳಿಸಿದೆ.

ಸದ್ಯ ಅಜರ್‌ ಮಸೂದ್‌ ವಿಷಯ ವಿಶ್ವಸಂಸ್ಥೆ ಸಮಿತಿಯ ಮುಂದಿದೆ. ಈ ಸಮಿತಿಯ ಮುಂದೆ ಬಹುತೇಕ ಎಲ್ಲ ಸಾಕ್ಷ್ಯಗಳು, ವರದಿಗಳನ್ನು ಸಲ್ಲಿಸಲಾಗಿದೆ. ಸಮಿತಿಯು ಸೂಕ್ತ ನಿರ್ಧಾರ ಕೈಗೊಳ್ಳಲಿದೆ ಎಂಬ ಭರವಸೆ ಇದೆ ಎಂದು ವಿಶ್ವಸಂಸ್ಥೆಯಲ್ಲಿ ಭಾರತದ ಕಾಯಂ ಪ್ರತಿನಿಧಿ ಸೈಯದ್ ಅಕ್ಬರುದ್ದೀನ್‌ ತಿಳಿಸಿದ್ದಾರೆ.

ಮಸೂದ್‌ ಅಜರ್‌ನನ್ನು ಜಾಗತಿಕ ಉಗ್ರ ಎಂದು ಘೋಷಿಸುವ ಭಾರತದ ಪ್ರಸ್ತಾವಕ್ಕೆ ಚೀನಾ ಅಡ್ಡಿಪಡಿಸಿತ್ತು. ಆಗ ಸಮಿತಿಯು ಈ ವಿಷಯಕ್ಕೆ ತಾತ್ಕಾಲಿಕ ತಡೆಯಾಜ್ಞೆ ನೀಡಿತ್ತು.

ನವೆಂಬರ್‌ 2ರಂದು ಸಮಿತಿಯ ತಡೆಯಾಜ್ಞೆ ಕೊನೆಗೊಳ್ಳಲಿದೆ. ಅಷ್ಟರೊಳಗೆ ಸೂಕ್ತ ನಿರ್ಧಾರ ಹೊರಬೀಳಲಿದೆ ಎಂದು ಭಾರತ ವಿಶ್ವಾಸ ವ್ಯಕ್ತಪಡಿಸಿದೆ.

Masood Azhar will be pursued until justice is met: Syed Akbaruddin