ಲಡಾಖ್‌ ಗಡಿಯಲ್ಲಿ ಭಾರತ-ಚೀನಾ ಮಿಲಿಟರಿ ಮಾತುಕತೆ ಆರಂಭ!

ಹೊಸದಿಲ್ಲಿ: ಒಂದು ತಿಂಗಳಿಂದ ಈಚೆಗೆ ಪೂರ್ವ ಲಡಾಖ್‌ನ ಭಾರತ-ಚೀನಾ ಗಡಿಯಲ್ಲಿ ಉದ್ಭವಿಸಿರುವ ಬಿಕ್ಕಟ್ಟು ಶಮನಕ್ಕೆ ಶನಿವಾರ ಮಿಲಿಟರಿ ಮಾತುಕತೆ ಆರಂಭವಾಗಿದೆ.

ಉಭಯ ದೇಶಗಳ ನಡುವೆ ಪೂರ್ವ ಲಡಾಕ್‌ನಲ್ಲಿ ಎಲ್‌ಎಸಿ ( ಲೈನ್‌ ಆಫ್‌ ಆಕ್ಚುವಲ್‌ ಕಂಟ್ರೋಲ್‌) ಉದ್ದಕ್ಕೂ ವಿವಾದ ಉಂಟಾಗಿದೆ. ಈ ಕುರಿತು ಚರ್ಚಿಸಲು ಉಭಯ (ಭಾರತ- ಚೀನಾ ) ದೇಶಗಳ ಮಿಲಿಟರಿ ಕಮಾಂಡರ್‌ಗಳ ನಡುವೆ ಸಭೆ ನಡೆಸಲಾಗುತ್ತಿದೆ. ಸಭೆಯು ಲೈನ್ ಆಫ್ ಆಕ್ಚುವಲ್ ಕಂಟ್ರೋಲ್ (ಎಲ್‌ಎಸಿ)ನ ಚೀನಾದ ಭಾಗವಾದ 'ಮಾಲ್ಡೋ' ದಲ್ಲಿ ನಡೆಯುತ್ತಿದೆ ಎಂದು ಮೂಲಗಳು ತಿಳಿಸಿವೆ.



ಸುಮಾರು ಆರು ವರ್ಷಗಳ ಹಿಂದೆ, ಲಡಾಖ್‌ ಗೆ ಸಂಬಂಧಿಸಿದಂತೆಯೇ ಭಾರತ - ಚೀನಾ ನಡುವೆ ವಿವಾದ ಉಂಟಾಗಿತ್ತು. ಆ ಸಂದರ್ಭದಲ್ಲೂ ಮಿಲಿಟರಿ ಮತ್ತು ರಾಜತಾಂತ್ರಿಕ ಮಾತುಕತೆಗಳ ಮೂಲಕ ಶಾಂತಿಯುತವಾಗಿ ಪರಿಹರಿಸಲಾಗಿತ್ತು. ಈಗ ನಡೆಯುತ್ತಿರುವಂತೆ, ಮಿಲಿಟರಿ ಮಟ್ಟದ ಮಾತುಕತೆ ಲಡಾಕ್‌ನಲ್ಲಿ ನಡೆದಿತ್ತು. ರಾಜತಾಂತ್ರಿಕ ಚರ್ಚೆ ಬೀಜಿಂಗ್‌ನಲ್ಲಿ ನಡೆಸಲಾಗಿತ್ತು. ಇದೀಗ 6 ವರ್ಷಗಳ ನಂತರ ಮತ್ತೆ ವಿವಾದ ತಾರಕಕ್ಕೇರಿದ್ದು, ಮಿಲಿಟರಿ ಮಾತಕತೆ ನಡೆಯುತ್ತಿದೆ.

ಜೂ.6ರಂದು ಲೆಫ್ಟಿನೆಂಟ್‌ ಜನರಲ್‌ಗಳ ಮಹತ್ವದ ಸಭೆ! ಮೀಟಿಂಗ್‌ ಮುನ್ನವೇ ಮಣಿದ ಚೀನಾ?

ಗಡಿಯಲ್ಲಿಇದೇ ಮೊದಲ ಬಾರಿಗೆ ಉಭಯ ದೇಶಗಳ ಲೆಫ್ಟಿನೆಂಟ್‌ ಜನರಲ್‌ಗಳು ಸಭೆ ನಡೆಸಿ ಪದೇಪದೆ ಗಡಿ ಬಿಕ್ಕಟ್ಟು, ಯೋಧರ ನಡುವೆ ಜಟಾಪಟಿಯಾಗದಂತೆ ಪರಿಹಾರ ಕಂಡುಕೊಳ್ಳುವ ಪ್ರಯತ್ನ ಮಾಡ­ಲಿ­ದ್ದಾರೆ. ಲೇಹ್‌ನಲ್ಲಿರುವ 14 ಕೋರ್‌ ಪಡೆಯ ಕಮಾಂಡಿಂಗ್‌ ಅಧಿಕಾರಿ ಲೆಫ್ಟಿ­ನೆಂಟ್‌ ಜನರಲ್‌ ಹರಿಂದರ್‌ ಸಿಂಗ್‌ ಮಾತು­ಕತೆಯಲ್ಲಿ ಭಾರತದ ಪ್ರತಿನಿಧಿಯಾಗಿದ್ದಾರೆ.