ಆಂಟಿಗುವಾ ಹಾರಿದ ಮೆಹುಲ್‌ ಚೋಕ್ಸಿ!

ಹೊಸದಿಲ್ಲಿ: ಪಿಎನ್‌ಬಿ ಹಗರಣದ ಆರೋಪಿ ಮೆಹುಲ್‌ ಚೋಕ್ಸಿ ಅಮೆರಿಕದಿಂದ ಆಂಟಿಗುವಾಗೆ ಪಲಾಯನ ಮಾಡಿದ್ದಾರೆ.

ಬಹುಕೋಟಿ ಬ್ಯಾಂಕಿಂಗ್‌ ಹಗರಣದ ಆರೋಪ ಎದುರಿಸುತ್ತಿರುವ ಚೋಕ್ಸಿ, ನೀರವ್‌ ಮೋದಿ ಸಂಬಂಧಿಯಾಗಿದ್ದಾರೆ.

ಒಂದು ತಿಂಗಳ ಹಿಂದೆ ಅಂಟಿಗುವಾಗೆ ಆಗಮಿಸಿದ ಮೆಹುಲ್‌ ಚೋಕ್ಸಿ, ಅಲ್ಲಿನ ಪಾಸ್‌ಪೋರ್ಟ್‌ ಪಡೆದುಕೊಂಡಿದ್ದಾರೆ ಎಂದು ಇಂಟರ್‌ಪೋಲ್‌ಗೆ ಅಲ್ಲಿನ ಸರಕಾರ ಮಾಹಿತಿ ನೀಡಿದೆ. ಈ ವಿಚಾರ ಇದೀಗ ಜಾರಿ ನಿರ್ದೇಶನಲಾಯಕ್ಕೂ ಗೊತ್ತಾಗಿದೆ.

ನೀರವ್‌ ಮೋದಿ ಹಾಗೂ ಮೇಹುಲ್‌ ಚೋಕ್ಸಿ ವಿರುದ್ಧ ಮುಂಬಯಿ ವಿಶೇಷ ನ್ಯಾಯಾಲಯ ಜಾಮೀನು ರಹಿತ ಬಂಧನ ವಾರಂಟ್‌ ಜಾರಿಗೊಳಿಸಿತ್ತು. ಈ ಆಧಾರದಲ್ಲಿ ಸಿಬಿಐ ಇಂಟರ್‌ಪೋಲ್‌ಗೆ ಗೀತಾಂಜಲಿ ಗ್ರೂಪ್‌ನ ಪ್ರಮೊಟರ್‌, ಹಗರಣದ ಪ್ರಮುಖ ರೂವಾರಿ ವಿರುದ್ಧ ರೆಡ್‌ಕಾರ್ನರ್‌ ನೋಟಿಸ್‌ ಜಾರಿಗೊಳಿಸಲು ಅರ್ಜಿ ಸಲ್ಲಿಸಿತ್ತು. ಆದರೆ ಈ ಅರ್ಜಿ ಇನ್ನೂ ಸ್ವೀಕೃತಗೊಂಡಿಲ್ಲ.

ನೀರವ್‌ ಮೋದಿ, ಸಹೋದರ ನಿಶಾಲ್‌ ವಿರುದ್ಧ ಇಂಟರ್‌ಪೋಲ್‌ ಈಗಾಗಲೇ ರೆಡ್‌ಕಾರ್ನರ್‌ ನೋಟಿಸ್‌ ಜಾರಿಗೊಳಿಸಿದೆ. ರೆಡ್‌ಕಾರ್ನರ್‌ ನೋಟಿಸ್‌ ಜಾರಿಯಾಗದ್ದಲ್ಲಿ, ಅಂತಾರಾಷ್ಟ್ರೀಯ ಪೊಲೀಸರು ಆತನನ್ನು ಬಂಧಿಸಲು ಅವಕಾಶ ಇರುತ್ತದೆ.

ಸಿಬಿಐ ಮೇ 14ರಂದು ನೀರವ್‌ ಮೋದಿ ಹಾಗೂ ಇನ್ನಿತರ ಆರೋಪಿಗಳ ವಿರುದ್ಧ ಆರೋಪ ಪಟ್ಟಿ ಸಲ್ಲಿಸಿದ್ದರು.