ಅತ್ಯಾಚಾರ ಅಪರಾಧಿಗಳಿಗೆ ಬರೋಬ್ಬರಿ 25 ವರ್ಷ ಜೈಲು ಶಿಕ್ಷೆ

ಸಿಂದೇಗಾ: ಜಾರ್ಖಂಡ್‌ ರಾಜ್ಯದ ಸಿಂದೇಗಾ ಎಂಬಲ್ಲಿ 2017ರಲ್ಲಿ 20 ವರ್ಷದ ಯುವತಿಯ ಮೇಲೆ ಅತ್ಯಾಚಾರ ನಡೆಸಿದ ಇಬ್ಬರಿಗೆ ಜಿಲ್ಲಾ ನ್ಯಾಯಾಲಯ 25 ವರ್ಷಗಳ ಜೈಲು ಶಿಕ್ಷೆ ವಿಧಿಸಿದೆ. 2017ರ ಅಕ್ಟೋಬರ್‌ 30ರಂದು ಮಹಿಳೆ ಔಷಧ ಖರೀದಿಗೆಂದು ಸಿಂದೇಗಾ ಪಟ್ಟಣಕ್ಕೆ ಹೋಗಿದ್ದಾಗ ಆರೋಪಿಗಳು ಆಕೆಯನ್ನು ಅಪಹರಿಸಿ ರಾಣಿಕುಡಾರ್‌ ಜುಮ್ಕಿ ಹಿಲ್ಸ್‌ಗೆ ಕರೆದೊಯ್ದು ಅತ್ಯಾಚಾರ ನಡೆಸಿದ್ದರು.

ಬಳಿಕ ಖೇರಾಂತೋಳಿ ಗ್ರಾಮದಲ್ಲಿ ಆಕೆಯನ್ನು ಎಸೆದು ಹೋಗಿದ್ದರು. ಘಟನೆಯ ಬಗ್ಗೆ ಸೂಕ್ಷ್ಮ ತನಿಖೆ ನಡೆಸಿದ ಪೊಲೀಸರು ಇಬ್ಬರನ್ನು ಬಂಧಿಸಿದ್ದರು. ಈಗ ಅವರಿಗೆ ಜೈಲು ಶಿಕ್ಷೆ ವಿಧಿಸಲಾಗಿದೆ.

ಜತೆಗೆ 10,000 ರೂ. ದಂಡವನ್ನೂ ವಿಧಿಸಲಾಗಿದ್ದು, ದಂಡ ಪಾವತಿ ತಪ್ಪಿದರೆ ಮತ್ತೆ ಆರು ತಿಂಗಳು ಹೆಚ್ಚುವರಿ ಜೈಲು ಶಿಕ್ಷೆ ಕಾದಿದೆ. ಇದೇ ಕೋರ್ಟ್‌ ಕಳೆದ ವರ್ಷ ಅಪ್ರಾಪ್ತೆಯ ಅತ್ಯಾಚಾರಕ್ಕಾಗಿ 20 ವರ್ಷದ ಆರೋಪಿಗೆ 20 ವರ್ಷ ಜೈಲು ಶಿಕ್ಷೆ ವಿಧಿಸಿತ್ತು.