ಹಿಗ್ಗಾಮುಗ್ಗಾ ಥಳಿಸಿ ಮಾನಸಿಕ ಅಸ್ವಸ್ಥೆಯ ಕೊಲೆ

ಮುರ್ಷಿದಾಬಾದ್: ಮಕ್ಕಳ ಕಳ್ಳಸಾಗಣಿಕೆ ಅನುಮಾನದ ಮೇಲೆ ಮಾನಸಿಕ ಅಸ್ವಸ್ಥೆಯನ್ನು ಹಿಗ್ಗಾಮುಗ್ಗಾ ಥಳಿಸಿರುವ ಆಘಾತಕಾರಿ ಘಟನೆ ಪಶ್ಚಿಮ ಬಂಗಾಳದ ಮುರ್ಷಿದಾಬಾದ್ ಜಿಲ್ಲೆಯಲ್ಲಿ ನಡೆದಿದೆ.

ಹಲ್ಲೆಗೊಳಗಾದ ಸಂತ್ರಸ್ತ ಮಹಿಳೆಯನ್ನು ಮಿಥಿಪುರ್-ಪಾನನಗರದ ನಿವಾಸಿ ಒಟೆರಾ ಬೀಬಿ (42) ಎಂದು ಗುರುತಿಸಲಾಗಿದೆ. ಈ ಮಹಿಳೆ ಕಳೆದು ಒಂದು ವರ್ಷದಿಂದ ಮಾನಸಿಕ ಕಾಯಿಲೆಗೆ ತುತ್ತಾಗಿದ್ದರು ಎಂದು ಹಿಂದುಸ್ತಾನ್ ಟೈಮ್ಸ್ ವರದಿ ಮಾಡಿದೆ.

ಮಾನಸಿಕ ಅಸ್ವಸ್ಥೆ ಒಟೆರಾ ಬೀಬಿ ಕೈಯಲ್ಲಿ ಅನುಮಾನಾಸ್ಪದ ವಸ್ತುವನ್ನು ಹಿಡಿದುಕೊಂಡು ದಿಲಿಪ್ ಘೋಷ್ ಎಂಬುವವರ ಮನೆಗೆ ಪ್ರವೇಶಿಸಿದ್ದಳು. ಇದನ್ನು ಗಮನಿಸಿದ ಗ್ರಾಮಸ್ಥರು ಈಕೆ ಮಕ್ಕಳ ಕಳ್ಳಿ ಎಂದು ಆರೋಪಿಸಿ ಹಿಗ್ಗಾಮುಗ್ಗಾ ಥಳಿಸಿದ್ದಾರೆ.



'ಗ್ರಾಮಸ್ಥರು ಮಾನಸಿಕ ಅಸ್ವಸ್ಥೆಯನ್ನು ನಿಷ್ಕರುಣೆಯಿಂದ ಹೊಡೆದಿದ್ದಾರೆ. ಈ ವೇಳೆ ಆಕೆ ಏನೋ ಹೇಳಲು ಪ್ರಯತ್ನಿಸುತ್ತಿದ್ದಳು. ಆದರೆ, ಅದು ಯಾರಿಗೂ ಅರ್ಥವಾಗಲಿಲ್ಲ. ಗ್ರಾಮಸ್ಥರ ಅನುಮಾನದಿಂದ ಮಹಿಳೆಯನ್ನು ಸತತ ಮೂರು ಗಂಟೆಗಳ ಕಾಲ ಥಳಿಸಿದ ಪರಿಣಾಮ ಕುಸಿದು ಬಿದ್ದು ​ ಸಾವನ್ನಪ್ಪಿದ್ದಾಳೆ.

ಸಂತ್ರಸ್ತೆ ಮಕ್ಕಳ ಕಳ್ಳಸಾಗಾಣಿಕೆಯಲ್ಲಿ ತೊಡಗಿದ್ದಳು ಎಂಬ ಗ್ರಾಮಸ್ಥರ ಆರೋಪವನ್ನು ಪೊಲೀಸರು ತಳ್ಳಿ ಹಾಕಿದ್ದಾರೆ.