ಬಸ್‌ ಚಾಲನೆ ಮಾಡಬೇಕೆಂಬ ಆಸೆಗೆ ಸರಕಾರಿ ಬಸ್ಸೇ ಹೈಜಾಕ್‌!

ಉತ್ತರ ಬಂಗಾಳ: ಬಸ್‌ ಚಾಲನೆ ಮಾಡಬೇಕೆಂಬ ಆಸೆ ಹೊಂದಿದ್ದ ವ್ಯಕ್ತಿಯೊಬ್ಬ ಸರಕಾರಿ ಬಸ್‌ನ್ನು ಹೈಜಾಕ್‌ ಮಾಡಿ ಸುಮಾರು ಒಂದು ಕಿಲೋ ಮೀಟರ್‌ ಚಲಾಯಿಸಿದ ಘಟನೆ ಉತ್ತರ ಬಂಗಾಳದ ಫಲಕತಾದಲ್ಲಿ ನಡೆದಿದೆ.

ಗುರುವಾರದಂದು ಈ ಘಟನೆ ನಡೆದಿದ್ದು, ಮನುತೋಷ್‌ ಮೊಹಂತೋ ಅಲಿಯಾಸ್‌ ರಾಜ್‌, ಎಂಬಾತನಿಗೆ ಬಹಳ ದಿನಗಳಿಂದ ಬಸ್‌ ಚಾಲನೆ ಮಾಡಬೇಕು ಎಂಬ ಆಸೆಯಿತ್ತಂತೆ. ಆದೆ ಯಾರೂ ಬಸ್‌ ಚಲಾಯಿಸಲು ಅವಕಾಶವೇ ನೀಡುತ್ತಿರಲಿಲ್ಲ. ಶತಾಯಗತಾಯ ಬಸ್‌ ಬಿಡಬೇಕು ಎಂದು ತೀರ್ಮಾನಿಸಿದ ಮನುತೋಷ್‌ ಬುಧವಾರದಂದು ಮಾಲ್ದಾಹಾ ದಿಂದ ಫಲಕಾತಗೆ ಹೊರಟಿದ್ದ ಬಸ್‌ ಏರಿದ್ದಾನೆ.

ದಾರಿ ಮಧ್ಯೆ ಚಾಹ ಕುಡಿಯಲು ಬಸ್‌ ನಿಲ್ಲಿಸುವುದನ್ನೇ ಕಾಯುತ್ತಿದ್ದ ಮನುತೋಷ್‌, ಚಾಲಕ ಮತ್ತು ನಿರ್ವಾಹಕ ಚಾಹಾ ಕುಡಿಯುತ್ತಿದ್ದ ವೇಳೆ ಏಕಾಏಕಿ ಬಸ್‌ ಸ್ಟಾರ್ಟ್‌ ಮಾಡಿ ಚಲಾಯಿಸಿದ್ದಾನೆ. ಅತಿಯಾದ ವೇಗದಿಂದ ಬಸ್‌ ಸಾಗುತ್ತಿರುವುದನ್ನು ಗಮನಿಸಿದ ಪ್ರಯಾಣಿಕರಿಗೆ ಭಯ ಆರಂಭವಾಗಿದೆ.

ಬಸ್‌ ಸಾಗುತ್ತಿರುವುದನ್ನು ಗಮನಿಸಿದ ನಿರ್ವಾಹಕ ಕೂಡಲೇ ಖಾಸಗಿ ಬಸ್‌ ನವರ ಬಳಿ ಸಹಾಯ ಕೇಳಿದ್ದಾರೆ. ಖಾಸಗಿ ಬಸ್‌ ಸಹಾಯದಿಂದ ಸುಮಾರು ಒಂದು ಕಿ.ಮೀ.ನಲ್ಲಿ ಹೈಜಾಕ್‌ ಬಸ್‌ನ್ನು ತಡೆಹಿಡಿದಿದ್ದಾರೆ. ಬಳಿಕ ಪೊಲೀಸರಿಗೆ ಮಾಹಿತಿ ರವಾನಿಸಿದ್ದಾರೆ.

ಸ್ಥಳಕ್ಕೆ ಆಗಮಿಸಿದ ಪೊಲೀಸರು ಆತನನ್ನು ಬಂಧಿಸಿ ವಿಚಾರಣೆಗೆ ಒಳಪಡಿಸಿದ್ದಾರೆ. ಈ ವೇಳೆ ತನ್ನ ಬಹುದಿನದ ಆಸೆಯನ್ನು ಪೊಲೀಸರಿಗೆ ಹೇಳಿ ದಂಗು ಬೀಳಿಸಿದ್ದಾನೆ. ಆದರೆ ಈತನನ್ನು ವೈದ್ಯರ ತಪಾಸಣೆಗೆ ಒಳಪಡಿಸಿದ ವೇಳೆ ವ್ಯಕ್ತಿ ಮಾನಸಿಕ ಅಸ್ವಸ್ಥನೆಂದು ವೈದ್ಯರು ಹೇಳಿದ್ದಾರೆ. ಇದೇ ವೇಳೆ ಉತ್ತರ ಬಂಗಾಳ ಸಾರಿಗೆ ಇಲಾಖೆ ಚಾಲಕ ಮತ್ತು ನಿರ್ವಾಹಕನ ವಿರುದ್ಧ ತನಿಖೆಗೆ ಆದೇಶಿಸಿದೆ.

ಕೃಪೆ: ಈ ಸಮಯ್‌ ಬಂಗಾಳ