ಸಾರ್ವಜನಿಕವಾಗಿ ಕಾಲೊತ್ತಿಸಿಕೊಂಡು ವಿವಾದಕ್ಕೀಡಾದ ಶಾಸಕ

ವಿರುಧಾಚಲಂ: ಎಐಎಡಿಎಂಕೆ ಶಾಸಕ ವಿ.ಟಿ ಕಲೈಸೆಲ್ವನ್‌ ಅವರು ಸಾರ್ಜನಿಕವಾಗಿಯೇ ಪಕ್ಷದ ಸದಸ್ಯರ ಕೈಯಿಂದ ಕಾಲೊತ್ತಿಸಿಕೊಂಡು ವಿವಾದಕ್ಕೆ ಗ್ರಾಸವಾಗಿದ್ದಾರೆ.

ಸ್ಥಳದಲ್ಲಿದ್ದ ಯಾರೋ ಒಬ್ಬರು ಶಾಸಕರ ಕಾಲೊತ್ತುತ್ತಿದ್ದ ದೃಶ್ಯದ ಫೋಟೋ ತೆಗೆದಿದ್ದು, ಅದು ಈಗ ವೈರಲ್‌ ಆಗಿದೆ.

ಮಣಿಮುಕ್ತ ನದಿಯ ಸ್ವಚ್ಛತಾ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ಕಲೈಸೆಲ್ವನ್‌ ಅವರು, ನದಿ ದಡದಲ್ಲಿರುವ ವಿರುಧಾಚಲಂ ಪಟ್ಟಣದ ಶಿವ ದೇಗುಲದ ಆವರಣದಲ್ಲಿ ವಿಶ್ರಾಂತಿ ಪಡೆಯುತ್ತಿದ್ದರು. ಈ ವೇಳೆ ಜತೆಗಿದ್ದ ಪಕ್ಷದ ಸದಸ್ಯರಲ್ಲಿ ಕಾಲೊತ್ತುವಂತೆ ಕೇಳಿದ್ದಾರೆ.

ಸಾವಿರಾರು ಭಕ್ತರು ನದಿಯಲ್ಲಿ ಪವಿತ್ರ ಸ್ನಾನ ಮಾಡುವುದಕ್ಕಾಗಿ ಈ ಪ್ರದೇಶಕ್ಕೆ ಬರುತ್ತಿರುತ್ತಾರೆ. ಹೀಗಾಗಿ ಈ ಸಾರ್ವಜನಿಕ ಸ್ಥಳದಲ್ಲಿ ಶಾಸಕರು ಕಾಲೊತ್ತಿಸಿಕೊಂಡಿರುವುದು ವಿವಾದಕ್ಕೆ ಕಾರಣವಾಗಿದೆ.