ಪಿಯೋನ್ ಹುದ್ದೆಗೆ ಆಯ್ಕೆಯಾದ ಬಿಜೆಪಿ ಶಾಸಕನ ಪುತ್ರ!

ಜೈಪುರ: ತಮ್ಮ ಮಕ್ಕಳು ಸಹ ತಮ್ಮ ಹಾದಿಯಲ್ಲೇ ಸಾಗಬೇಕು ಎಂದು ಬಹುತೇಕ ರಾಜಕಾರಣಿಗಳು ಬಯಸುತ್ತಾರೆ. ಆದರೆ, ರಾಜಸ್ಥಾನದ ಶಾಸಕರೊಬ್ಬರು ತಮ್ಮ ಪುತ್ರ ವಿಧಾನಸಭೆಯಲ್ಲಿ ಪಿಯೋನ್ ಕೆಲಸ ಗಿಟ್ಟಿಸಿಕೊಂಡಿರುವುದಕ್ಕೆ ಸಂತಸ ವ್ಯಕ್ತಪಡಿಸಿದ್ದಾರೆ.

ಗ್ರೇಡ್ IV ಹುದ್ದೆಗೆ 18,008 ಅಭ್ಯರ್ಥಿಗಳ ಪೈಕಿ 18 ಜನರನ್ನು ಆಯ್ಕೆ ಮಾಡಲಾಗಿದೆ. ಆಯ್ಕೆಯಾದವರಲ್ಲಿ ಜಮ್ವಾ ರಾಮ್‌ಗಡ್ ಕ್ಷೇತ್ರದ ಬಿಜೆಪಿ ಶಾಸಕ ಜಗದೀಶ್ ನಾರಾಯಣ ಮೀನಾ ಅವರ ಪುತ್ರ ರಾಮ್ ಕಿಶನ್ ಕೂಡಾ ಒಬ್ಬರು ಎಂದು ವಿಧಾನಸಭೆ ಮೂಲಗಳು ತಿಳಿಸಿವೆ.

ಆಯ್ಕೆ ಮಂಡಳಿಯು ಸಂದರ್ಶನದ ಆಧಾರದ ಮೇಲೆ ಅಭ್ಯರ್ಥಿಗಳನ್ನು ಆಯ್ಕೆ ಮಾಡಿದೆ. ಆದರೆ, ಶಾಸಕರ ಪುತ್ರನ ಆಯ್ಕೆ ಪ್ರಕ್ರಿಯೆಯ ಬಗ್ಗೆ ತನಿಖೆ ನಡೆಸಬೇಕೆಂಬ ಕೂಗು ಕೇಳಿ ಬರುತ್ತಿದೆ. ಜಗದೀಶ್ ನಾರಾಯಣ ಮೀನಾ ಅವರು ಪರಿಶಿಷ್ಟ ಪಂಗಡಕ್ಕೆ ಸೇರಿದವರಾಗಿದ್ದಾರೆ.

ಈ ಬಗ್ಗೆ ಉನ್ನತ ಮಟ್ಟದ ತನಿಖೆ ನಡೆಸಬೇಕು ಎಂದು ರಾಜಸ್ಥಾನ ಪ್ರದೇಶ ಕಾಂಗ್ರೆಸ್ ಅಧ್ಯಕ್ಷ ಸಚಿನ್ ಪೈಲಟ್ ಆಗ್ರಹಿಸಿದ್ದಾರೆ. '15 ಲಕ್ಷ ಉದ್ಯೋಗ ಸೃಷ್ಟಿಸುವುದಾಗಿ ಬಿಜೆಪಿ ಸರಕಾರ ಭರವಸೆ ನೀಡಿದೆ. ಆದರೆ, ಈಗ ಸೃಷ್ಟಿಸಿರುವ ಕೆಲವೇ ಕೆಲವು ಸಾವಿರ ಉದ್ಯೋಗದಲ್ಲೂ ಸ್ವಜನಪಕ್ಷಪಾತ ಬಳಸುತ್ತಿದೆ' ಎಂದು ಪೈಲಟ್ ಆರೋಪಿಸಿದ್ದಾರೆ.

ಗ್ರಾಮ ಸೇವಕರ ಆಯ್ಕೆ ಪ್ರಕ್ರಿಯೆಯಲ್ಲಿ ಸ್ವಜನಪಕ್ಷಪಾತದ ದೂರುಗಳು ಕೇಳಿ ಬಂದಿದ್ದವು. ಬಿಜೆಪಿ ನಾಯಕರ ಸಂಬಂಧಿಗಳನ್ನು 'ವಿದ್ಯಾರ್ಥಿ ಮಿತ್ರ' ಸ್ಥಳದಲ್ಲಿ 'ಗ್ರಾಮ ಸೇವಕ' ಎಂದು ಆಯ್ಕೆ ಮಾಡಲಾಗಿದೆ ಎಂದು ಆರೋಪಗಳು ಕೇಳಿ ಬರುತ್ತಿವೆ.

ಮೊದಲ ಬಾರಿಗೆ ಬಿಜೆಪಿಯಿಂದ ಶಾಸಕರಾಗಿ ಆಯ್ಕೆಯಾಗಿರುವ ಜಗದೀಶ್ ನಾರಾಯಣ ಮೀನಾ ಅವರು ತಮ್ಮ ಹಿರಿಯ ಪುತ್ರ ರಾಮ್ ಕಿಶನ್ ಅವರ ಉದ್ಯೋಗಕ್ಕಾಗಿ ಅರ್ಜಿ ಸಲ್ಲಿಸಿದ್ದರು. 'ನನ್ನ ಮಗ ಕಿಶನ್ ಹತ್ತನೇ ತರಗತಿ ಪೂರ್ಣಗೊಳಿಸಿದ್ದು, ನಾಲ್ವರು ಮಕ್ಕಳಲ್ಲಿ ಹಿರಿಯವನಾಗಿದ್ದಾನೆ. ಕಿಶನ್‌ಗೆ ಕಿರಿಯ ಸಹೋದರನ್ನು ನೋಡಿಕೊಳ್ಳುವ ಜವಾಬ್ದಾರಿ ಇದ್ದ ಕಾರಣ 10ನೇ ತರಗತಿ ನಂತರ ವ್ಯಾಸಂಗ ಮಾಡಲು ಸಾಧ್ಯವಾಗಲಿಲ್ಲ. ಆಯ್ಕೆ ಪ್ರಕ್ರಿಯೆ ಮೂಲಕವೇ ಕಿಶನ್ ಸರಕಾರಿ ಉದ್ಯೋ ಗಿಟ್ಟಿಸಿಕೊಂಡಿರುವುದಾಗಿ' ಎಂದು ಶಾಸಕ ಮೀನಾ ಸ್ಪಷ್ಟಪಡಿಸಿದ್ದಾರೆ.