ಮಹಿಳಾ ಪೊಲೀಸರಿಗೆ ಟಾಯ್ಲೆಟ್ ಕ್ಯಾರವ್ಯಾನ್ಸ್

ತಮಿಳು ಸಮಯಮ್

Vijaya Karnataka Web

ಚೆನ್ನೈ: ಕರ್ತವ್ಯನಿರತ ಪೊಲೀಸರಿಗೆ ಅದರಲ್ಲಿಯೂ ವಿಶೇಷವಾಗಿ ಮಹಿಳಾ ಪೊಲೀಸರಿಗೆ 64 ಮೊಬೈಲ್ ಟಾಯ್ಲೆಟ್‌ಗಳನ್ನು ರಾಜ್ಯ ಸರಕಾರ ಪೂರೈಸುತ್ತಿವೆ.

ಸುದೀರ್ಘ ಕಾಲ ಕಾರ್ಯ ನಿರ್ವಹಿಸುವ ಪೊಲೀಸರು ತಮ್ಮ ನೈಸರ್ಗಿಕ ಕರೆ ತೀರಿಸಿಕೊಳ್ಳಲು ಕಷ್ಟಪಡುತ್ತಿದ್ದಾರೆ. ಈ ತೊಂದರೆ ನೀಗಿಸಲು ಸರಕಾರ ಇಂಥದ್ದೊಂದು ಕ್ರಮಕ್ಕೆ ಮುಂದಾಗಿದ್ದು, ಮೊಬೈಲ್ ಟಾಯ್ಲೆಟ್ ಕ್ಯಾರವ್ಯಾನ್ಸ್ ಖರೀದಿಸಿದೆ. ಜಿಲ್ಲೆಗೆ ಎರಡರಂತೆ 32 ಜಿಲ್ಲೆಗಳಿಗೆ, 64 ಟಾಯ್ಲೆಟ್‌ಗಳನ್ನು ಖರೀದಿಸಿದೆ. ಇದರಲ್ಲಿ ಎರಡು ಪಾಶ್ಚಿಮಾತ್ಯ ಹಾಗೂ ಎರಡು ಭಾರತೀಯ ಶೈಲಿಯ ಟಾಯ್ಲಟ್‌ಗಳಿರುತ್ತವೆ. ಅಲ್ಲದೇ ಪುಟ್ಟದೊಂದು ಡ್ರೆಸ್ಸಿಂಗ್ ರೂಂ ಅನ್ನೂ ಹೊಂದಿರುತ್ತದೆ. ಸಾವಿರ ಲೀ. ಸಾಮರ್ಥ್ಯವುಳ್ಳ ನೀರಿನ ಟ್ಯಾಂಕ್‌ ಇರುವ ಇವುಗಳಲ್ಲಿ 800 ಲೀ.ಸಾಮರ್ಥ್ಯದ ರೊಚ್ಚು ತೊಟ್ಟಿ ಇರುತ್ತದೆ.

ನೀಲ್‌ಗಿರೀಸ್ ಇಂಥದ್ದೊಂದು ವಾಹನ ಪಡೆದ ಮೊದಲ ಜಿಲ್ಲೆಯಾಗಿದ್ದು, ಕಳೆದ ಶನಿವಾರ ಪುಷ್ಪ ಪ್ರದರ್ಶನವೊಂದಕ್ಕೆ ನಿಯೋಜಿತರಾಗಿದ್ದ ಪೊಲೀಸರ ಬಳಕೆಗೆ ಪ್ರಥಮ ಬಾರಿಗೆ ಬಳಸಲಾಯಿತು.

ವಾಷ್ ಬೆಸಿನ್ ತುಂಬಿದಲ್ಲಿ, ಎಲ್ಲಿ ಬೇಕಾದರೂ ನೀರು ಹೊರ ಹೋಗಬಹುದು. ರೊಚ್ಚು ತೊಟ್ಟಿಯನ್ನು ಮಾತ್ರ ಅದನ್ನು ಸ್ವಚ್ಛಗೊಳಿಸುವ ವಾಹನದಿಂದಲೇ ಸ್ವಚ್ಛಗೊಳಿಸಬೇಕು. ಅಗತ್ಯ ಬ್ಯಾಟರಿ ಬ್ಯಾಕ್ ಅಪ್ ಇರುವ ಈ ವಾಹನಗಳಿಗೆ ಸಮೀಪದ ಮನೆ ಅಥವಾ ಅಂಗಡಿಯಿಂದ ವಿದ್ಯುತ್ ಸಂಪರ್ಕವನ್ನೂ ಪಡೆಯುವ ಅವಕಾಶವಿರಲಿದೆ.

ಪ್ರತಿ ಕ್ಯಾರವ್ಯಾನ್‌ಗೆ 10,87,326 ರೂ. ವೆಚ್ಚ ತಗುಲಿದೆ.