4 ವರ್ಷದಲ್ಲಿ 10 ಕೋಟಿ ಎಲ್‌ಪಿಜಿ ಸಂಪರ್ಕ

ಹೊಸದಿಲ್ಲಿ: ಬಡವರ್ಗದ ಕುಟುಂಬಗಳಿಗೆ ಎಲ್‌ಪಿಜಿ ಸೌಲಭ್ಯ ವಿಸ್ತರಿಸುವ ಉದ್ದೇಶದ 'ಉಜ್ವಲ ಯೋಜನೆ'ಯು ಒಂದು ಸಾಮಾಜಿಕ ಪರಿವರ್ತನೆಗೆ ದಾರಿ ಮಾಡಿದ್ದು, ಇದರ 4 ಕೋಟಿ ಫಲಾನುಭವಿಗಳಲ್ಲಿ ಶೇ. 45ರಷ್ಟು ಮಂದಿ ದಲಿತರು ಮತ್ತು ಬುಡಕಟ್ಟು ಸಮುದಾಯದವರೇ ಆಗಿದ್ದಾರೆ ಎಂದು ಪ್ರಧಾನಿ ಮೋದಿ ಹೇಳಿದ್ದಾರೆ.

'ಉಜ್ವಲ ಯೋಜನೆ' ಫಲಾನುಭವಿಗಳೊಂದಿಗೆ ಸೋಮವಾರ ಆನ್‌ಲೈನ್‌ ಸಂವಾದದಲ್ಲಿ ಪಾಲ್ಗೊಂಡ ಮೋದಿ ಅವರು, ತಮಿಳುನಾಡಿನ ಗೃಹಿಣಿಯೊಬ್ಬರ ಜತೆ ಮಾತನಾಡುವಾಗ ''ನಿಮ್ಮ ಮನೆಗೆ ಬಂದಾಗ ದೋಸೆ ಮಾಡಿ ಕೊಡುವಿರಾ?'' ಎಂದು ಕೇಳಿದರು.

''ಗ್ಯಾಸ್‌ ಸಿಲಿಂಡರ್‌ ಬರುವುದಕ್ಕೆ ಮೊದಲು ಮನೆಯಲ್ಲಿ ಇಡ್ಲಿ, ದೋಸೆ ಮಾಡುತ್ತಿದ್ದಿರಾ?,'' ಎಂದು ಮೋದಿ ಕೇಳಿದರು. ಇದಕ್ಕೆ ಉತ್ತರಿಸಿದ ತಮಿಳುನಾಡು ಮೂಲದ ಮಹಿಳೆ, ''ಅದು ಮೊದಲು ಅಷ್ಟು ಸುಲಭವಾಗಿರಲಿಲ್ಲ. ಆದರೆ ಈಗ ಯಾವ ಅಡುಗೆಯನ್ನು ಬೇಕಾದರೂ ಸುಲಭವಾಗಿ ತಯಾರಿಸಬಲ್ಲೆ,'' ಎಂದರು.

ಈ ವೇಳೆ ಲಘು ಹಾಸ್ಯ ಚಟಾಕಿ ಹಾರಿಸಿದ ಪ್ರಧಾನಿ, ಮನೆಗೆ ಬಂದಾಗ ದೋಸೆ ಮಾಡಿಕೊಡಿ ಎಂದರು.