ರಾಂಚಿಯಲ್ಲಿ 40 ಸಾವಿರ ಜನರ ಜತೆ ಪ್ರಧಾನಿ ಯೋಗ

ರಾಂಚಿ: ಅಂತಾರಾಷ್ಟ್ರೀಯ ಯೋಗ ದಿನ ಹಿನ್ನೆಲೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ಜಾರ್ಖಂಡ್‌ನ ರಾಂಚಿಯಲ್ಲಿ ಶುಕ್ರವಾರ ಸುಮಾರು 40 ಸಾವಿರ ಜನರ ಜತೆ ಯೋಗ ಮಾಡಲಿದ್ದಾರೆ. ಗುರುವಾರ ರಾತ್ರಿ ರಾಂಚಿ ತಲುಪಿರುವ ಪ್ರಧಾನಿ, ಬೆಳಗ್ಗೆ 6 ಗಂಟೆಗೆ ಯೋಗ ಕಾರ್ಯಕ್ರಮದಲ್ಲಿ ಭಾಗವಹಿಸಲಿದ್ದಾರೆ.

ಈ ಸಲದ ಯೋಗ ದಿನಾಚರಣೆಯ ಪ್ರಧಾನ ಕಾರ್ಯಕ್ರಮ ನಡೆಯುವ ಪ್ರಭಾತ್‌ ಮೈದಾನಕ್ಕೆ ನಸುಕಿನ 3 ಗಂಟೆಯಿಂದಲೇ ಆಗಮಿಸಲು ಯೋಗಾಸಕ್ತರಿಗೆ ಅವಕಾಶ ಕಲ್ಪಿಸಲಾಗಿದೆ. ಜಾರ್ಖಂಡ್‌ ರಾಜ್ಯಪಾಲರಾದ ದ್ರೌಪದಿ ಮುರ್ಮು, ಕೇಂದ್ರ ಆಯುಷ್‌ ಸಚಿವ ಶ್ರೀಪಾದ್‌ ಯೆಸ್ಸೊ ನಾಯಕ್‌, ರಾಜ್ಯ ಆರೋಗ್ಯ ಸಚಿವ ರಾಮಚಂದ್ರ ಚಂದ್ರವಂಶಿ ಪ್ರಧಾನಿ ಜತೆಗೆ ಯೋಗ ಮಾಡಲಿದ್ದಾರೆ.

'ಕ್ಲೈಮೇಟ್‌ ಆ್ಯಕ್ಷನ್‌' ವಿಷಯದಲ್ಲಿ ಯೋಗ: 2014ರಿಂದ ವಿಶ್ವಸಂಸ್ಥೆ ಗುರುತಿಸಿದ ಯೋಗ ದಿನಕ್ಕೆ ಈ ಬಾರಿ 'ಯೋಗ ಫಾರ್‌ ಕ್ಲೈಮೇಟ್‌ ಆ್ಯಕ್ಷನ್‌' ಎಂಬ ಘೋಷವಾಕ್ಯವನ್ನು ನಿಗದಿಗೊಳಿಸಲಾಗಿದೆ. ಈ ಕುರಿತು ಗುರುವಾರ ಟ್ವಿಟರ್‌ ಖಾತೆಯಲ್ಲಿ ಪ್ರಧಾನಿ, ''ಯೋಗವನ್ನು ನಿಮ್ಮ ಜೀವನ ಅವಿಭಾಜ್ಯ ಅಂಗವಾಗಿಸಿಕೊಳ್ಳಿ. ಇತರರಿಗೂ ಯೋಗ ಮಾಡಲು ಸ್ಫೂರ್ತಿಯಾಗಿ, ಯೋಗದಿಂದ ಮನಸ್ಸು ಮತ್ತು ದೈಹಿಕ ಆರೋಗ್ಯ ಹೆಚ್ಚು ಲಾಭವಿದೆ'' ಎಂದು ಹೇಳಿದ್ದಾರೆ.

ಒಂದು ವಾರದಲ್ಲಿ ಪ್ರಧಾನಿ ತಮ್ಮ ಟ್ವಿಟರ್‌ ಖಾತೆಯಲ್ಲಿ ವಿವಿಧ ಯೋಗಾಸನಗಳನ್ನು ಮಾಡುವ ಅನಿಮೇಟಡ್‌ ವೀಡಿಯೋಗಳನ್ನು ಹಾಕುತ್ತಿದ್ದು, ಜನಮೆಚ್ಚುಗೆ ಪಡೆದಿದೆ.