ಮೋದಿ ಸರ್ಕಾರ್‌ 2 ಮೇ 30ಕ್ಕೆ ಪ್ರಮಾಣ

ಹೊಸದಿಲ್ಲಿ: ಭರ್ಜರಿ ಬಹುಮತದೊಂದಿಗೆ ಗೆದ್ದು ಬಂದಿರುವ ನರೇಂದ್ರ ಮೋದಿ ನೇತೃತ್ವದ ಎನ್‌ಡಿಎಯ ಎರಡನೇ ಇನ್ನಿಂಗ್ಸ್‌ನ ಹೊಸ ಸರಕಾರ ಮೇ 30ರಂದು ಅಸ್ತಿತ್ವಕ್ಕೆ ಬರಲಿದೆ. ಅಂದು ಸಂಜೆ 7 ಗಂಟೆಗೆ ರಾಷ್ಟ್ರಪತಿ ಭವನದಲ್ಲಿ ನಡೆಯುವ ಸಮಾರಂಭದಲ್ಲಿ ರಾಷ್ಟ್ರಪತಿ ರಾಮನಾಥ್‌ ಕೋವಿಂದ್‌ ಅವರು ಪ್ರಧಾನಿ ಮತ್ತು ಅವರ ಸಂಪುಟದ ಮಂತ್ರಿಗಳಿಗೆ ಅಧಿಕಾರ ಮತ್ತು ಗೌಪ್ಯತೆ ಪ್ರಮಾಣವಚನ ಸ್ವೀಕರಿಸಲಿದ್ದಾರೆ ಎಂದು ಅಧಿಕೃತ ಪ್ರಕಟಣೆ ತಿಳಿಸಿದೆ.

ಎನ್‌ಡಿಎ ಪೂರ್ಣ ಐದು ವರ್ಷಗಳ ಅಧಿಕಾರ ನಡೆಸಿದ ಬಳಿಕ ಎರಡನೇ ಬಾರಿ ಬಹುಮತದೊಂದಿಗೆ ಆಯ್ಕೆಯಾಗಿದ್ದು, ಈ ಸಾಧನೆ ಮಾಡಿದ ಜವಾಹರಲಾಲ್‌ ಮತ್ತು ಇಂದಿರಾ ಗಾಂಧಿ ಅವರ ಸಾಲಿಗೆ ಮೋದಿ ಸೇರಿದ್ದಾರೆ.

ಸಂಪುಟ, ಗಣ್ಯರ ಬಗ್ಗೆ ಕುತೂಹಲ: 2014ರಲ್ಲಿ ಮೋದಿ ಪ್ರಮಾಣ ವಚನ ಸ್ವೀಕರಿಸಿದಾಗ ಪಾಕ್‌ ಪ್ರಧಾನಿ ನವಾಜ್‌ ಷರೀಫ್‌ ಸೇರಿದಂತೆ ವಿಶ್ವದ ಹಲವು ನಾಯಕರಿಗೆ ಆಹ್ವಾನ ನೀಡಲಾಗಿತ್ತು. ಈ ಬಾರಿ ಯಾರೆಲ್ಲ ಬರುತ್ತಾರೆ ಎಂಬ ಕುತೂಹಲವಿದೆ.

ಈ ಬಾರಿಯ ಮೋದಿ ಸಂಪುಟದಲ್ಲಿ ಮಂತ್ರಿಗಳಾಗುವವರಾರ‍ಯರು ಎಂಬುದು ಕೂಡಾ ನಿಗೂಢವಾಗಿದೆ. ಪಶ್ಚಿಮಬಂಗಾಳದಲ್ಲಿ ಭಾರಿ ಹೋರಾಟದಿಂದ ಹೆಚ್ಚು ಸ್ಥಾನ ಗೆದ್ದಿರುವುದು ಮತ್ತು ಮುಂದೆ ರಾಜ್ಯದ ಅಧಿಕಾರ ವಶಕ್ಕೂ ಬಿಜೆಪಿ ಸಿದ್ಧವಾಗುತ್ತಿರುವುದರಿಂದ ಆ ರಾಜ್ಯಕ್ಕೆ ಹೆಚ್ಚಿನ ಪ್ರಾಧಾನ್ಯತೆ ನಿರೀಕ್ಷಿಸಲಾಗಿದೆ.

ಜೂನ್‌ 15ರಿಂದ ಅಧಿವೇಶನ? :ಜೂನ್‌ 5ರಂದು ಮೋದಿ ಅವರು ಮಾಲ್ದೀವ್ಸ್‌ಗೆ ಭೇಟಿ ನೀಡುವ ಸಾಧ್ಯತೆಗಳಿದ್ದು, ಸಂಸತ್ತಿನ ಮೊದಲ ಅಧಿವೇಶನ ಜೂನ್‌ 15 ಅಥವಾ 16ರಂದು ಆರಂಭವಾಗಲಿದೆ ಎನ್ನಲಾಗಿದೆ. ಈ ಅಧಿವೇಶನದಲ್ಲೇ ಬಜೆಟ್‌ ಕೂಡಾ ಮಂಡನೆಯಾಗುವ ನಿರೀಕ್ಷೆ ಇದೆ.