ದೇಶದಲ್ಲಿ ಬಿಡುಗಡೆಯಾಗಿದೆ ಮೊಲ್ನುಪಿರಾವಿರ್‌, ಎಲ್ಲರಿಗೂ ಸಿಗಲಿದೆಯೇ ಕೊರೊನಾ ಮಾತ್ರೆ?

ದೇಶದಲ್ಲಿ ಕೊರೊನಾ ನಿರೋಧಕ ಮಾತ್ರೆ 'ಮೊಲ್ನುಪಿರಾವಿರ್‌' ತುರ್ತು ಬಳಕೆಗೆ ಕೇಂದ್ರ ಸರಕಾರ ಅನುಮತಿ ನೀಡಿದ್ದು, ಸುಮಾರು 13 ಸಾವಿರ ಸೋಂಕಿತರ ಮೇಲೆ ಪ್ರಯೋಗ ಮಾಡಲು ಸಿದ್ಧತೆ ನಡೆದಿದೆ. ಈ ಮಾತ್ರೆಯನ್ನು ಕೊರೊನಾ ಸೋಂಕಿತರೆಲ್ಲರೂ ಸೇವಿಸಲು ಸಾಧ್ಯವಿಲ್ಲ. ಸದ್ಯ ತುರ್ತು ಬಳಕೆಗೆ ಮಾತ್ರ ಅನುಮತಿ ಇರುವುದರಿಂದ ಕೊರೊನಾ ಚಿಕಿತ್ಸಾ ಕೇಂದ್ರಗಳು ಹಾಗೂ ಆಸ್ಪತ್ರೆಗಳಲ್ಲಿಯೇ ಈ ಮಾತ್ರೆ ನೀಡಲಾಗುತ್ತದೆ. ವಾಣಿಜ್ಯ ಬಳಕೆಗೆ ಅನುಮತಿ ದೊರೆತ ಬಳಿಕವೂ ವೈದ್ಯರ ಪ್ರಿಸ್ಕ್ರಿಪ್ಶನ್‌ ಇಲ್ಲದೆ ಮಾತ್ರೆ ಸಿಗುವುದಿಲ್ಲ.

ಏನಿದು ಮೊಲ್ನುಪಿರಾವಿರ್‌?

ಅಮೆರಿಕದ ಮರ್ಕ್ ಕಂಪೆನಿ ಅಭಿವೃದ್ಧಿಪಡಿಸಿರುವ ಮಾತ್ರೆ ಇದು. ಮೂಲತಃ ವಿಷಮಶೀತ ಜ್ವರಕ್ಕೆ ಬಳಸಲು ಈ ಮಾತ್ರೆ ಅಭಿವೃದ್ಧಿಪಡಿಸಲಾಗಿದೆ. ನಂತರ ಕೊರೊನಾ ಸೋಂಕಿತರಿಗೆ ಆ್ಯಂಟಿ-ವೈರಲ್‌ ಮಾತ್ರೆಯಾಗಿ ನೀಡಲಾಗುತ್ತಿದೆ. ಭಾರತದಲ್ಲಿ ರೆಡ್ಡೀಸ್‌ ಲ್ಯಾಬೊರೆಟರೀಸ್‌, ಸಿಪ್ಲಾ, ಮ್ಯಾನ್‌ಕೈಂಡ್‌ ಫಾರ್ಮಾ, ಸನ್‌ ಫಾರ್ಮಾ ಸೇರಿ 13 ಸಂಸ್ಥೆಗಳು ಈ ಮಾತ್ರೆಯನ್ನು ಉತ್ಪಾದಿಸಲಿವೆ.

ಕೋವಿಡ್ ವಿರೋಧಿ ಮಾತ್ರೆ ಭಾರತದಲ್ಲಿ ಬಿಡುಗಡೆ, 5 ದಿನಗಳ ಚಿಕಿತ್ಸೆಗೆ ರೂ. 1,399 ರೂ. ನಿಗದಿ
ಎಷ್ಟು ಮಾತ್ರ ಸೇವಿಸಬೇಕು?

800 ಮಿಲಿಗ್ರಾಂ ಮಾತ್ರೆಯನ್ನು ದಿನಕ್ಕೆ ಎರಡು ಬಾರಿಯಂತೆ ಐದು ದಿನಗಳ ಕಾಲ ಸೇವಿಸಬೇಕು. ಸೋಂಕು ದೃಢಪಟ್ಟ ಐದು ದಿನಗಳ ಒಳಗಡೆಯೇ ಮಾತ್ರೆ ಆರಂಭಿಸಬೇಕು. ತಲೆನೋವು, ಕೆಮ್ಮು, ವಾಸನೆ ಸಾಮರ್ಥ್ಯ ಕಳೆದುಕೊಳ್ಳುತ್ತಲೇ, ಸೋಂಕಿನ ತಪಾಸಣೆ ನಡೆಸಿ, ವರದಿ ಪಾಸಿಟಿವ್‌ ಬಂದರೆ, ಕೂಡಲೇ ಇದನ್ನು ಸೇವಿಸಬೇಕು ಎಂದು ಶಿಫಾರಸು ಮಾಡಲಾಗಿದೆ. ಯಾವ ಕಾರಣಕ್ಕೂ ಐದು ದಿನಕ್ಕಿಂತ ಹೆಚ್ಚು ಕಾಲ ಈ ಮಾತ್ರೆಯನ್ನು ಶಿಫಾರಸು ಮಾಡಬಾರದು ಎಂದು ಅಮೆರಿಕದ ಔಷಧ ನಿಯಂತ್ರಣ ಪ್ರಾಧಿಕಾರ ಹೇಳಿದೆ.
ಮಾರುಕಟ್ಟೆಗೆ ಕೋವಿಡ್ ಮಾತ್ರೆ ಬಿಡುಗಡೆ ಮಾಡಲು ಸಜ್ಜಾಗಿವೆ ದೇಶದ ದಿಗ್ಗಜ ಫಾರ್ಮಾ ಕಂಪನಿಗಳು!
ಯಾರು ಸೇವಿಸಬಹುದು?

ಮುಲ್ನುಪಿರಾವಿರ್‌ ಮಾತ್ರೆಯನ್ನು ಕೊರೊನಾ ತಗುಲಿದ ಎಲ್ಲರೂ ಸೇವಿಸಲು ಆಗುವುದಿಲ್ಲ. ಹೃದ್ರೋಗ, ಸಕ್ಕರೆ ಕಾಯಿಲೆ, ಕ್ಯಾನ್ಸರ್‌ನಂತಹ ಗಂಭೀರ ಕಾಯಿಲೆಗಳಿಂದ ಬಳಲುತ್ತಿರುವವರು ಹಾಗೂ ಕೊರೊನಾದ ಸೌಮ್ಯ ಲಕ್ಷಣಗಳಿರುವವರು ಮಾತ್ರ ಇದನ್ನು ಸೇವಿಸಬಹುದಾಗಿದೆ. ಸೌಮ್ಯ ಲಕ್ಷಣ ಇರುವವರಿಗೆ ಐದು ದಿನ ಮಾತ್ರೆ ಸೇವಿಸಬೇಕು ಎಂದು ಹೇಳಲಾಗಿದೆ. ಅದರಲ್ಲಿಯೂ 18 ವರ್ಷ ಮೇಲ್ಪಟ್ಟವರಿಗೆ ಮಾತ್ರವೇ ಈ ಮಾತ್ರೆ ನೀಡಬೇಕು ಎಂದು ಸ್ಪಷ್ಟಪಡಿಸಲಾಗಿದೆ.

ಗರ್ಭಿಣಿಯರು ಮಾತ್ರೆ ಪಡೆಯಬಹುದೆ?

ಹುಟ್ಟುವ ಮಕ್ಕಳ ಆರೋಗ್ಯದ ಮೇಲೆ ಪರಿಣಾಮ ಬೀರುವುದರಿಂದ ಮೊಲ್ನುಪಿರಾವಿರ್‌ ಮಾತ್ರೆಯನ್ನು ಗರ್ಭಿಣಿಯರು ಸೇವಿಸುವಂತಿಲ್ಲ. ಹಾಗೆಯೇ, ಕೊರೊನಾದ ಗಂಭೀರ ಲಕ್ಷಣಗಳು ಕಂಡು ಬಂದು, ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರೆ ಅವರು ಮಾತ್ರೆ ಸೇವಿಸಬಾರದು ಎಂಬುದಾಗಿ ತಜ್ಞರು ತಿಳಿಸಿದ್ದಾರೆ.