ಮೊಮೊ ಚಾಲೆಂಜ್‌ಗೆ ಭಾರತದಲ್ಲಿ ಮೊದಲ ಬಲಿ?

[ಮೂಲ ಸುದ್ದಿ: ಟೈಮ್ಸ್ ನೌ, 21 ಆಗಸ್ಟ್ 2018]

Vijaya Karnataka Web

ಅಜ್ಮೀರ್: ಹದಿನಾರು ವರ್ಷದ ವಿದ್ಯಾರ್ಥಿನಿಯೊಬ್ಬರ ಸಾವಿಗೆ ಡೆಡ್ಲಿ ಇಂಟರ್‌ನೆಟ್ ಗೇಮ್‌ ಮೊಮೊ ಚಾಲೆಂಜ್‌ ಕಾರಣವಾಗಿರಬಹುದು ಎಂಬ ನಿಟ್ಟಿನಲ್ಲಿ ರಾಜಸ್ಥಾನ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ. ಒಂದು ವೇಳೆ ಇದೇ ನಿಜವಾಗಿದ್ದರೆ ಮೊಮೊ ಚಾಲೆಂಜ್‌ಗೆ ಭಾರತದ ಮೊದಲ ಬಲಿ ಇದಾಗಲಿದೆ.

ಹತ್ತನೇ ತರಗತಿ ವಿದ್ಯಾರ್ಥಿನಿ ತನ್ನ ಮಣಿಕಟ್ಟನ್ನು ಕತ್ತರಿಸಿಕೊಂಡು ಬಳಿಕ ನೇಣು ಬಿಗಿದುಕೊಂಡು ಆತ್ಮಹತ್ಯೆಗೆ ಶರಣಾಗಿರುವ ಘಟನೆ ರಾಜಸ್ಥಾನದ ಅಜ್ಮೀರ್‌ನಲ್ಲಿ ನಡೆದಿದೆ. ಮೊಮೊ ಚಾಲೆಂಜ್ ಕಾರಣ ಎಂಬ ಶಂಕೆ ವ್ಯಕ್ತವಾಗಿದೆ.

ಬ್ಲೂವೇಲ್ ಚಾಲೆಂಜ್‌ನಂತೆ ಮೊಮೊ ಚಾಲೆಂಜ್ ಭಾರತಕ್ಕೂ ಅಡಿಯಿಟ್ಟಿದ್ದು ಇದಕ್ಕೆ ಮೊದಲ ಬಲಿ ಈ ಘಟನೆ ಎನ್ನಲಾಗಿದ್ದು ಪೊಲೀಸರು ಈ ನಿಟ್ಟಿನಲ್ಲಿ ತನಿಖೆ ನಡೆಸುತ್ತಿದ್ದಾರೆ. ತಮ್ಮ ಮಗಳ ಸಾವಿಗೆ ಆನ್‍ಲೈನ್ ಗೇಮ್ ಕಾರಣವಾಗಿದ್ದು ತನಿಖೆ ನಡೆಸಬೇಕೆಂದು ಕುಟುಂಬಿಕರು ದೂರಿನಲ್ಲಿ ತಿಳಿಸಿದ್ದಾರೆ.

ತನ್ನ ಸಹೋದರಿ ಶಾಲೆಯ ಬಿಡುವಿನ ವೇಳೆ ಮತ್ತು ಊಟದ ವಿರಾಮದಲ್ಲಿ ಈ ಗೇಮ್ ಆಡುತ್ತಿದ್ದಳು ಎಂದು ತಿಳಿಸಿದ್ದಾನೆ ಬಾಲಕಿಯ ಅಣ್ಣ. ವಿದ್ಯಾರ್ಥಿನಿ ನೇಣು ಬಿಗಿದುಕೊಳ್ಳುವುದಕ್ಕೂ ಮುನ್ನ ತನ್ನ ಮಣಿಕಟ್ಟನ್ನು ಚಾಕುವಿನಲ್ಲಿ ಕುಯ್ದುಕೊಂಡಿರುವುದಾಗಿ ಪ್ರಾಥಮಿಕ ತನಿಖೆಯಲ್ಲಿ ಗೊತ್ತಾಗಿದೆ.

ಆತ್ಮಹತ್ಯೆ ಸ್ಥಳದಲ್ಲಿ ಡೆತ್‌ನೋಟ್ ಪತ್ತೆಯಾಗಿದ್ದು ಆತ್ಮಹತ್ಯೆಗೆ ಕಡಿಮೆ ಗ್ರೇಡ್ಸ್ ಬಂದಿರುವ ಕಾರಣಗಳೂ ಇರುವ ಸಾಧ್ಯತೆ ಇದೆ ಎಂದು ಪೊಲೀಸರು ಅನುಮಾನಿಸಿದ್ದಾರೆ. ಆತ್ಮಹತ್ಯೆಗೆ ಮೊಮೊ ಚಾಲೆಂಜ್ ಕಾರಣವಾಗಿರಬಹುದೇ ಎಂಬುದನ್ನು ಪತ್ತೆಹಚ್ಚಲು ವಿದ್ಯಾರ್ಥಿನಿಯ ಇಂಟರ್‌ನೆಟ್ ಬಳಕೆಯ ಹಿಸ್ಟರಿ ಹಾಗೂ ವೈಯಕ್ತಿಕ ವಸ್ತುಗಳನ್ನು ಪರಿಶೀಲಿಸಲಾಗುತ್ತಿದೆ. ಸಂಪೂರ್ಣ ತನಿಖೆ ಬಳಿಕವಷ್ಟೆ ಇದು ಮೊಮೊ ಚಾಲೆಂಜ್‍ನಿಂದ ಆಗಿದ್ದೇ ಅಥವಾ ಬೇರೆ ಇನ್ಯಾವುದಾದರೂ ಆನ್‍ಲೈನ್ ಗೇಮ್ ಕಾರಣವಾಯಿತೆ ಎಂಬುದನ್ನು ಹೇಳಲು ಸಾಧ್ಯ ಎಂದಿದ್ದಾರೆ ಪೊಲೀಸರು.

ಅಮೆರಿಕ, ಅರ್ಜೆಂಟೀನಾ, ಫ್ರಾನ್ಸ್, ಮೆಕ್ಸಿಕೊ ಮತ್ತು ಜರ್ಮನಿಯಲ್ಲಿ ಈ ಡೆಡ್ಲಿ ಮೊಮೊ ಚಾಲೆಂಜ್ ದೊಡ್ಡ ತಲೆನೋವಾಗಿ ಪರಿಣಮಿಸಿದೆ. ಅರ್ಜೆಂಟೀನಾದಲ್ಲಿ 12 ವರ್ಷದ ಬಾಲಕಿ ಈ ಆನ್‍ಲೈನ್ ಗೇಮ್‌ಗೆ ಬಲಿಯಾದ ಮೊದಲ ಬಾಲಕಿ. ಬ್ಲೂ ವೇಲ್ ಚಾಲೆಂಜ್‌ನಂತೆ ಇದೂ ಸಹ ಮಾನಸಿಕವಾಗಿ ದುರ್ಬಲವಾಗಿರುವವರನ್ನು ಟಾರ್ಗೆಟ್ ಮಾಡಿ ಅವರು ಆತ್ಮಹತ್ಯೆ ಮಾಡಿಕೊಳ್ಳುವಂತೆ ಪ್ರೇರೇಪಿಸುತ್ತದೆ. ಬ್ಲೂವೇಲ್ ಚಾಲೆಂಜ್‌ನಲ್ಲಿ ಇಲ್ಲೂ ಆಟಗಾರರು ಆಡಿಯೋ ಮತ್ತು ವೀಡಿಯೋಗಳನ್ನು ಅಜ್ಞಾತ ವ್ಯಕ್ತಿಗೆ ರವಾನಿಸುತ್ತಿರಬೇಕಾಗುತ್ತದೆ.