ದೇಗುಲದ ಮಹಡಿಯಿಂದ ಮಹಿಳೆಯ ತಳ್ಳಿದ ಕೋತಿ: ಭಕ್ತೆಯ ಸಾವು

ನಬದ್ವೀಪ್ (ಪಶ್ಚಿಮ ಬಂಗಾಳ): ದೇವಸ್ಥಾನದ ಚಾವಣಿ ಮೇಲಿನಿಂದ ಕೋತಿಯೊಂದು ತಳ್ಳಿದ ಪರಿಣಾಮ ಭಕ್ತರೊಬ್ಬರು ಬಿದ್ದು ಮೃತಪಟ್ಟ ಘಟನೆ ಪಶ್ಚಿಮ ಬಂಗಾಳದ ನಾಡಿಯಾದ ನಬದ್ವೀಪ್‌ನಲ್ಲಿ ಬುಧವಾರ ನಡೆದಿದೆ.

ಹೂಗ್ಲಿ ಜಿಲ್ಲೆಯ ಸಿಂಗೂರ್ ಘನಶ್ಯಾಮ್‌ಪುರದ ಸರಸ್ವತಿ ದಾಸ್‌ (45) ಎಂದು ಗುರುತಿಸಲಾಗಿದೆ. 'ದೇವಸ್ಥಾನದ ಮೊದಲ ಮಹಡಿಯಲ್ಲಿ ಕಣ್ಣುಮುಚ್ಚಿ ಕುಳಿತು ಪ್ರಾರ್ಥನೆ ಸಲ್ಲಿಸುತ್ತಿದ್ದಾಗ ಕೋತಿಯೊಂದು ಓಡಿಬಂದು ಮೈಮೇಲೆ ಜಿಗಿಯಿತು. ಆಗ ಭಯಗೊಂಡ ಮಹಿಳೆ ಗಲಿಬಿಲಿಯಿಂದ ಕೆಳಗೆ ಬಿದ್ದು ಮೃತಪಟ್ಟಳೆಂದು ದೇವಸ್ಥಾನದ ಅಧಿಕಾರಿ ಸಚ್ಚಿದಾನಂದನ್‌ ದಾಸ್‌ ತಿಳಿಸಿದರು.

ಮಹಿಳೆ ಚಾವಣಿಯ ಅಂಚಿನಲ್ಲಿ ಕುಳಿತು ಪ್ರಾರ್ಥನೆ ಸಲ್ಲಿಸುತ್ತಿದ್ದಳು. ಆಗ ಎಲ್ಲಿಂದಲೋ ಬಂದ ಕೋತಿ ಆಕೆ ಮೈಮೇಲೆ ಎಗರಿ ತಳ್ಳಿತು. ಆಕೆಯ ತಲೆಗೆ ಗಂಭೀರ ಗಾಯವಾಗಿತ್ತು. ಆಕೆಯನ್ನು ಕೂಡಲೇ ಆಸ್ಪತ್ರೆಗೆ ಸಾಗಿಸಿದರೂ ಪ್ರಯೋಜನವಾಗಲಿಲ್ಲ ಎಂದು ಅವರು ತಿಳಿಸಿದರು.

ನಬದ್ವೀಪ್‌ ಸುತ್ತಮುತ್ತ ಮಂಗಗಳ ಹಾವಳಿ ಮಿತಿಮೀರಿದೆ. ಕೋತಿಗಳು ಹಣ್ಣು-ತರಕಾರಿಗಳ ಸಹಿತ ಎಲ್ಲ ಬೆಳೆಗಳನ್ನು ಹಾಳು ಮಾಡುತ್ತಿವೆ ಎಂದು ಗ್ರಾಮಸ್ಥರು ದೂರುತ್ತಾರೆ. ಪರಿಸರದ ಎಲ್ಲ ದೇವಸ್ಥಾನಗಳಿಂದ ಪ್ರಸಾದ ಹಾಗೂ ಮನೆಗಳಿಗೆ ನುಗ್ಗಿ ಕೈಗೆ ಸಿಕ್ಕಿದ್ದನ್ನು ದೋಚುತ್ತಿವೆ.