ರೈತರ ಬಗ್ಗೆ ನಮ್ಮ ಸಂಸದರ ಕಾಳಜಿ ಇದೇನಾ?

ಹೊಸದಿಲ್ಲಿ: ರೈತರ ಬಗ್ಗೆ ನಮ್ಮ ರಾಜಕೀಯ ಪಕ್ಷಗಳ ಮುಖಂಡರು ಹಲವು ಬಾರಿ ಸಾರ್ವಜನಿಕ ಭಾಷಣದ ವೇಳೆ ಮಾತನಾಡುತ್ತಿರುತ್ತಾರೆ. ಆದರೆ, ಲೋಕಸಭೆಯಲ್ಲಿ ಪ್ರವಾಹ ಹಾಗೂ ಬರಗಾಲದ ಬಗ್ಗೆ ಚರ್ಚೆ ನಡೆಯುವಾಗ ಮಾತ್ರ ಬಹುತೇಕ ಸಂಸದರ ಗೈರುಹಾಜರಿ ಎದ್ದು ಕಾಣುತ್ತಿತ್ತು.

ದೇಶದ ಬರಗಾಲ ಹಾಗೂ ಪ್ರವಾಹ ಪೀಡಿತ ರಾಜ್ಯಗಳಲ್ಲಿ ಕೇಂದ್ರ ಸರಕಾರ ಏನು ಮಾಡುತ್ತಿದೆ. ಎಷ್ಟು ಪರಿಹಾರ ನೀಡಿದೆ ಎಂಬ ವಿಚಾರದ ಬಗ್ಗೆ ಸುಮಾರು 5 ಗಂಟೆಗಳ ಕಾಲ ಚರ್ಚೆ ನಡೆದಿದ್ದು, ಈ ವೇಳೆ ಕೇವಲ ಶೇ. 10 ರಿಂದ ಶೇ. 15 ರಷ್ಟು ಸಂಸದರು ಮುಂಗಾರು ಅಧಿವೇಶನದಲ್ಲಿ ಭಾಗಿಯಾಗಿದ್ದರು. ಮಳೆಯಿಂದ ರೈತರಿಗೆ ಆಗಿರುವ ಸಮಸ್ಯೆಗಳ ಬಗ್ಗೆ ಚರ್ಚಿಸಲು ಲೋಕಸಭೆ ಸದಸ್ಯರು ಇದನ್ನು ಪ್ರಮುಖ ವಿಷಯವಾಗಿ ನಿರ್ಧರಿಸಿದರೂ ಸಹ ಸಂಸದರ ಗೈರುಹಾಜರಿಯಿಂದ ಗಂಭೀರ ಚರ್ಚೆ ನಡೆಯಲಿಲ್ಲ.

ಲೋಕಸಭೆ ಸ್ಪೀಕರ್ ಹೊರತುಪಡಿಸಿ ಸದ್ಯ 533 ಸಂಸದರು ಇದ್ದು, ಈ ಪೈಕಿ ಮಧ್ಯಾಹ್ನ 2.25ರ ವೇಳೆ ಚರ್ಚೆ ಆರಂಭವಾದಾಗ ಕೇವಲ 61 ಸಂಸದರು ( ಆಡಳಿತ ಪಕ್ಷದ 37 ಹಾಗೂ ವಿಪಕ್ಷದ ಕೇವಲ 24 ಸಂಸದರು ಭಾಗಿಯಾಗಿದ್ದರು. ನಂತರ, ಎರಡು ಗಂಟೆಗಳ ಬಳಿಕ ಇದು 54ಕ್ಕೆ ಇಳಿದಿದೆ. ಸಂಜೆಯ ವೇಳೆಗೆ 79 ಸಂಸದರು ಭಾಗಿಯಾಗಿದ್ದರೂ, ವಿಪಕ್ಷಗಳ ಸಂಸದರ ಪೈಕಿ ಕೇವಲ 10 ಮಂದಿ ಮಾತ್ರ ಹಾಜರಿದ್ದ ಕಾರಣ ಗಂಭೀರ ಚರ್ಚೆ ನಡೆಯಲಿಲ್ಲ.

ಪ್ರವಾಹ ಹಾಗೂ ಬರ ಪೀಡಿತ ರಾಜ್ಯಗಳಿಗೆ ಕೇಂದ್ರ ಸರಕಾರ ಸಾಕಷ್ಟು ಅನುದಾನ ನೀಡಬೇಕು. ಇದರಿಂದ ರಾಜ್ಯ ಸರಕಾರಗಳು ತೊಂದರೆ ಪೀಡಿತ ವ್ಯಕ್ತಿಗಳಿಗೆ ತುರ್ತಾಗಿ ಪರಿಹಾರ ನೀಡಲು ಸಾಧ್ಯವಾಗುತ್ತದೆ ಎಂದು ಬಹುತೇಕ ವಿಪಕ್ಷಗಳ ಸದಸ್ಯರು ಆಗ್ರಹಿಸಿದ್ದಾರೆ.

ಇನ್ನು, ಚರ್ಚೆ ವೇಳೆ ಕೇಂದ್ರ ಕೃಷಿ ಸಚಿವ ರಾಧಾಮೋಹನ್ ಸಿಂಗ್, ಶೇಖಾವತ್ ಹಾಗೂ ಕೇಂದ್ರ ಗೃಹ ಖಾತೆ ರಾಜ್ಯ ಸಚಿವ ಕಿರಣ್ ರಿಜಿಜು ಸಂಸರ ಪ್ರಶ್ನೆಗಳಿಗೆ ಉತ್ತರಿಸುವಂತೆ ಕೇಂದ್ರ ಸರಕಾರ ಸೂಚಿಸಿತ್ತು. ಅಲ್ಲದೆ, ಪರಿಹಾರದ ವಿಚಾರದಲ್ಲಿ ಯಾವುದೇ ರಾಜ್ಯಗಳಿಗೂ ತಾರತಮ್ಯ ಮಾಡುವುದಿಲ್ಲ ಎಂದು ಮೋದಿ ಸರಕಾರ ಭರವಸೆ ನೀಡಿದೆ.