ಸಾಮೂಹಿಕ ಮದ್ವೆ ಊಟ ಬಡಿಸೋಕು ಶಿಕ್ಷಕರು ಬೇಕು!

ಭೋಪಾಲ್: ಸರಕಾರಿ ಶಾಲಾ ಶಿಕ್ಷಕರಿಗೆ ಪಾಠ ಮಾಡುವುದಕ್ಕಿಂತ ಇತರೆ ಚಟುವಟಿಕೆಗಳೇ ಹೆಚ್ಚು ಎಂಬ ಕೂಗು ಎಲ್ಲೆಡೆ ಕೇಳಿಬರುತ್ತಿರುವ ಸಂದರ್ಭದಲ್ಲೇ ಸರಕಾರಿ ಪ್ರಾಯೋಜಿತ ಸಾಮೂಹಿಕ ವಿವಾಹದಲ್ಲಿ ಊಟ ಬಡಿಸಲು ಶಿಕ್ಷಕರನ್ನು ಬಳಸಿಕೊಂಡಿರುವ ಘಟನೆ ಮಧ್ಯಪ್ರದೇಶದಲ್ಲಿ ನಡೆದಿದೆ.

ಒತ್ತಾಯದಿಂದ ಸುಮಾರು 400 ಶಿಕ್ಷಕರನ್ನು ಊಟ ಬಡಿಸುವ ಕೆಲಸ ಮಾಡಿಸಲಾಗಿದೆ.

ಮಧ್ಯಪ್ರದೇಶದ ಸಿಂಗ್ರೌಲಿ ಜಿಲ್ಲೆಯಲ್ಲಿ ಸೋಮವಾರ ನಡೆದ ಮುಖ್ಯಮಂತ್ರಿ ಕನ್ಯಾದಾನ ಯೋಜನೆ ಕಾರ್ಯಕ್ರಮದಡಿ ನಡೆದ ಸಾಮೂಹಿಕ ವಿವಾಹ ಕಾರ್ಯಕ್ರಮದಲ್ಲಿ ಸರಕಾರಿ ಶಾಲೆಯ ಶಿಕ್ಷಕರನ್ನು ಊಟ ಬಡಿಸಲು ನಿಯೋಜಿಸಲಾಗಿತ್ತು. ಆದರೆ, ಶಿಕ್ಷಕರು ಪ್ರತಿಭಟನೆ ನಡೆಸುತ್ತಿದ್ದಂತೆ, ಸಿಎಂ ಶಿವರಾಜ್ ಸಿಂಗ್ ಚೌಹಾಣ್ ಕಾರ್ಯಕ್ರಮಕ್ಕೆ ಆಗಮಿಸುವ ಮುನ್ನವೇ ಶಿಕ್ಷಕರಿಗೆ ಊಟ ಬಡಿಸುವ ಕೆಲಸದಿಂದ ಮುಕ್ತಿ ನೀಡಿದ್ದಾರೆ. ಈ ಬಗ್ಗೆ ವಿಸ್ತೃತ ವರದಿ ನೀಡುವಂತೆ ಜಿಲ್ಲಾ ಶಿಕ್ಷಣ ಅಧಿಕಾರಿ(ಡಿಇಒ)ಗೆ ರಾಜ್ಯ ಶಿಕ್ಷಣ ಸಚಿವ ದೀಪಕ್ ಜೋಶಿ ಆದೇಶಿಸಿದ್ದಾರೆ.

ಸುಮಾರು 400 ಶಿಕ್ಷಕರಿಗೆ ಊಟ ಬಡಿಸುವ ಸಂದರ್ಭ ಯಾವ ಯಾವ ತಿನಿಸುಗಳನ್ನು ಬಡಿಸಬೇಕು ಎಂಬುದನ್ನು ಡಿಇಒ ಲಿಖಿತವಾಗಿ ಆದೇಶಿಸಿದ್ದರು. ಮೇ 20ಕ್ಕೆ ಈ ಆದೇಶ ಜಾರಿಯಾಗಿದ್ದು, 2,390 ಜೋಡಿಗೆ ಊಟ ಬಡಿಸುವಂತೆ ತಿಳಿಸಲಾಗಿತ್ತು ಎನ್ನಲಾಗಿದೆ. ವಿದ್ಯಾರ್ಥಿಗಳಿಗೆ ಪಾಠ ಮಾಡುವ ನಮ್ಮನ್ನು ಮದುವೆ ಊಟ ಬಡಿಸುವವರನ್ನಾಗಿಸುವ ಮೂಲಕ ನಮ್ಮ ಘನತೆಗೆ ಧಕ್ಕೆಯನ್ನುಂಟು ಮಾಡಿದ್ದಾರೆ ಎಂದು ಶಿಕ್ಷಕರು ನೋವು ತೋಡಿಕೊಂಡಿದ್ದಾರೆ.