26/11 ದಾಳಿ ನಡೆಸಿದ್ದು ಪಾಕ್‌ ಉಗ್ರರೇ: ಒಪ್ಪಿಕೊಂಡ ಮಾಜಿ ಎನ್‌ಎಸ್‌ಎ

ಹೊಸದಿಲ್ಲಿ: ಮುಂಬಯಿ ಮೇಲೆ ನಡೆದ 2008ರ ಭಯೋತ್ಪಾದಕ ದಾಳಿ ಪಾಕಿಸ್ತಾನದ್ದೇ ಕೃತ್ಯ ಎಂಬುದಕ್ಕೆ ಈಗ ಮತ್ತೊಂದು ಬಲವಾದ ಪುರಾವೆ ಲಭಿಸಿದೆ.

ಮುಂಬಯಿ ಮೇಲೆ ಪೈಶಾಚಿಕ ಉಗ್ರ ದಾಳಿ ನಡೆಸಿದ್ದ ಪಾಕಿಸ್ತಾನದಿಂದ ಆಗಮಿಸಿದ್ದ ಉಗ್ರರ ಗುಂಪು. ಇದು ಗಡಿಯಾಚೆ ಭಯೋತ್ಪಾದನೆಗೆ ಅತ್ಯುತ್ತಮ ನಿದರ್ಶನ ಎಂದು ಪಾಕಿಸ್ತಾನದ ಮಾಜಿ ರಾಷ್ಟ್ರೀಯ ಭದ್ರತಾ ಸಲಹೆಗಾರ ಮಹಮುದ್‌ ಅಲಿ ದುರಾನಿ ಒಪ್ಪಿಕೊಂಡಿದ್ದಾರೆ.

ಇದೇ ವೇಳೆ ಆ ದಾಳಿಯ ಹಿಂದೆ ಪಾಕಿಸ್ತಾನ ಸರಕಾರದ ಯಾವುದೇ ಪಾತ್ರ ಇರಲಿಲ್ಲ ಎಂದು ಹೇಳುವ ಮೂಲಕ ಕಟು ಸತ್ಯ ಮರೆಮಾಚುವ ಯತ್ನ ಕೂಡ ಮಾಡಿದ್ದಾರೆ.

ಇಂತಹ ಕಟು ಸತ್ಯ ಹೇಳಿದ್ದಕ್ಕಾಗಿಯೇ ದುರಾನಿ ಅವರು ರಾಷ್ಟ್ರೀಯ ಭದ್ರತಾ ಸಲಹೆಗಾರ ಹುದ್ದೆ ಕಳೆದುಕೊಂಡಿದ್ದರು ಎಂಬುದು ಗಮನಾರ್ಹ. ಮುಂಬಯಿ ಉಗ್ರ ದಾಳಿಯಲ್ಲಿ ಜೀವಂತ ಸೆರೆ ಸಿಕ್ಕ ಉಗ್ರ ಅಜ್ಮಲ್‌ ಕಸಬ್‌ ಪಾಕ್‌ ರಾಷ್ಟ್ರೀಯ ಎಂದು ಹೇಳಿದ್ದೇ ದುರಾನಿಗೆ ಮುಳುವಾಗಿತ್ತು.

ಹೊಸದಿಲ್ಲಿಯಲ್ಲಿ ಸೋಮವಾರ ನಡೆದ ಭಯೋತ್ಪಾದನೆ ನಿಗ್ರಹ ಕುರಿತ ಸಮ್ಮೇಳನದಲ್ಲಿ ಮಾತನಾಡಿದ ದುರಾನಿ, ಮುಂಬಯಿ ಮೇಲಿನ 26/11ರ ದಾಳಿಗೆ ಪಾಕಿಸ್ತಾನ ಮೂಲದ ಉಗ್ರರ ಗುಂಪೇ ಕಾರಣ ಎಂದು ಕಡ್ಡಿ ತುಂಡು ಮಾಡಿದಂತೆ ಹೇಳಿದರು.

ಲಷ್ಕರೆ ವಿರುದ್ಧ ಕಿಡಿ

ಭಾರತ ವಿರೋಧಿ ಉಗ್ರ ದಾಳಿಗಳ ಪ್ರಮುಖ ಸಂಚುಕೋರ ಜಮಾತ್‌ ಉದ್‌ ದವಾ (ಜೆಯುಡಿ) ಸಂಘಟನೆಯ ಮುಖ್ಯಸ್ಥ ಹಫೀಜ್‌ ಸಯೀದ್‌ ವಿರುದ್ಧ ಮಹಮುದ್‌ ದುರಾನಿ ತೀವ್ರ ವಾಗ್ದಾಳಿ ನಡೆಸಿದರು. 'ಪಾಕಿಸ್ತಾನದ ಪಾಲಿಗೆ ಆತನೊಬ್ಬ (ಹಫಿಜ್‌) ನಿಷ್ಪ್ರಯೋಜಕ ವ್ಯಕ್ತಿ. ಮುಲಾಜಿಲ್ಲದೇ ಆತನ ವಿರುದ್ಧ ಕ್ರಮ ಕೈಗೊಳ್ಳಬೇಕಾದ ಅಗತ್ಯ ಇದೆ,' ಎಂದರು.

ಸದ್ಯ ಭಯೋತ್ಪಾದನೆ ನಿಗ್ರಹ ಕಾಯ್ದೆಯಡಿ ಗೃಹ ಬಂಧನದಲ್ಲಿರುವ ಜೆಯುಡಿ ನಾಯಕ ಹಫಿಜ್‌ ಸಯೀದ್‌ನನ್ನು ಮರು ವಿಚಾರಣೆಗೆ ಒಳಪಡಿಸುವ ಜತೆಗೆ ಮುಂಬಯಿ ದಾಳಿ ಪ್ರಕರಣದ ಪುನರ್‌ ತನಿಖೆ ನಡೆಸುವಂತೆ ಭಾರತ ಇತ್ತೀಚೆಗೆ ಪಾಕಿಸ್ತಾನವನ್ನು ಆಗ್ರಹಿಸಿತ್ತು.