28 ಬಾರಿ ಒಟಿಪಿ ಶೇರ್ ಮಾಡಿ 7 ಲಕ್ಷ ಪಂಗನಾಮ ಹಾಕಿಸಿಕೊಂಡ ಮಹಿಳೆ

ನವಿ ಮುಂಬಯಿ: ಬ್ಯಾಂಕ್ ಉದ್ಯೋಗಿ ಎಂದು ಫೋನ್ ಕರೆ ಮಾಡುತ್ತಿದ್ದ ವಂಚಕನ ಜತೆ 28 ಬಾರಿ ಓಟಿಪಿ ಹಂಚಿಕೊಂಡ ಮಹಿಳೆಯೋರ್ವರು 7 ಲಕ್ಷ ಪಂಗನಾಮ ಹಾಕಿಸಿಕೊಂಡ ಪ್ರಸಂಗ ನವಿ ಮುಂಬಯಿಯಲ್ಲಿ ಬೆಳಕಿಗೆ ಬಂದಿದೆ.

40 ವರ್ಷದ ತಸ್ನೀಮ್ ಮುಜ್ಜಾಕರ್ ಮೋದಕ್ ವಂಚನೆಗೊಳಗಾದ ಮಹಿಳೆಯಾಗಿದ್ದಾರೆ.

ಮೇ 17 ರಂದು ಮೋದಕ್ ಅವರ ಬ್ಯಾಂಕ್ ಖಾತೆಗೆ 7.20 ಲಕ್ಷ ಹಣ ಜಮಾ ಆಗಿತ್ತು. ಅವರಿಗೆ ಫೋನ್ ಕರೆ ಮಾಡಿದ್ದ ವ್ಯಕ್ತಿಯೊಬ್ಬ ತಾನು ಬ್ಯಾಂಕರ್ ಎಂದು ಪರಿಚಯಿಸಿಕೊಂಡು ತಾಂತ್ರಿಕ ಕಾರಣಗಳಿಂದ ನಿಮ್ಮ ಡೆಬಿಟ್ ಕಾರ್ಡ್‌ ಅನ್ನು ಬ್ಲ್ಯಾಕ್ ಮಾಡಲಾಗಿದೆ. ಅದನ್ನು ಅನ್ ಬ್ಲ್ಯಾಕ್ ಮಾಡಲು ಕಾರ್ಡ್ ವಿವರಗಳನ್ನು ಹೇಳುವಂತೆ ಕೇಳಿದರು. ಮೇಡಕ್ ಕಾರ್ಡ್ ಮೇಲಿನ 16 ಅಂಕಿ, ಮುದ್ರಿತ ಹೆಸರು, ಸಿಸಿವಿ ಸಂಖ್ಯೆ ಸೇರಿದಂತೆ ಬಹಿರಂಗ ಪಡಿಸಬಾರದಿದ್ದ ಎಲ್ಲಾ ವಿವರಗಳನ್ನು ಹೇಳಿದ್ದಾಳೆ.

ಬಳಿಕ ಒಂದು ವಾರಗಳ ಕಾಲ ಅದೇ ವ್ಯಕ್ತಿ ಇಂದ ಕರೆ ಸ್ವೀಕರಿಸಿದ್ದ ಆಕೆ, ಆತನ ದುರದ್ದೇಶವನ್ನರಿಯದೇ 28 ಬಾರಿ ಓಟಿಪಿ ಹಂಚಿಕೊಂಡಿದ್ದಾಳೆ. ಆಕೆಯ ಮುಗ್ಧತೆಯನ್ನು ಸರಿಯಾಗಿ ಬಳಸಿಕೊಂಡ ಆತ ಬರೋಬ್ಬರಿ 6,98,973. ರೂಪಾಯಿ ಕಬಳಿಸಿದ್ದಾನೆ.

ಮೋಸ ಹೋದ ಅರಿವಾಗುವಷ್ಟರಲ್ಲಿ ಮಹಿಳೆಯ ಎಲ್ಲ ಹಣವನ್ನು ದೋಚಿಯಾಗಿತ್ತು.

ನೆರುಲ್ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ಮುಂಬೈ, ನೊಯ್ಡಾ, ಗುರುಗ್ರಾಮ, ಕೋಲ್ಕತಾ, ಬೆಂಗಳೂರಿನಲ್ಲಿ ಹಣದ ವಹಿವಾಟು ನಡೆಸಲಾಗಿದೆ. ಒಟ್ಟು ಮೂರು ನಂಬರ್ ಬಳಸಿ ಆತ ಮಹಿಳೆಗೆ ಕರೆ ಮಾಡುತ್ತಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ.