ಪಾಕಿಸ್ತಾನ ಜೈಲಿಂದ ಬಿಡುಗಡೆಯಾಗಿ ಸ್ವದೇಶಕ್ಕೆ ಮರಳುತ್ತಿರುವ ಎಂಜಿನಿಯರ್

ಇಸ್ಲಾಮಾಬಾದ್: ಕಳೆದ ಮೂರು ವರ್ಷಗಳಿಂದ ಪಾಕಿಸ್ತಾನದ ಜೈಲಿನಲ್ಲಿ ಬಂಧಿಯಾಗಿರುವ ಭಾರತೀಯ ಎಂಜಿನಿಯರ್ ಹಮೀದ್ ನೇಹಾಲ್ ಅನ್ಸಾರಿ ಡಿಸೆಂಬರ್ 15ರಂದು ಬಿಡುಗಡೆಯಾಗುತ್ತಿದ್ದಾರೆ. ಆದರೆ ಒಂದು ತಿಂಗಳ ಬಳಿಕವಷ್ಟೇ ಅವರು ವರ್ಸೋವಾದಲ್ಲಿರುವ ತಮ್ಮ ಮನೆಗೆ ಹಿಂತಿರುಗಲು ಸಾಧ್ಯ.

ಆತನನ್ನು ಭಾರತಕ್ಕೆ ಗಡಿಪಾರು ಮಾಡುವ ಪ್ರಕ್ರಿಯೆ ಒಂದು ತಿಂಗಳು ತೆಗೆದುಕೊಳ್ಳಲಿದೆ, ಎಂದು ಪಾಕಿಸ್ತಾನದ ಆಂತರಿಕ ಸಚಿವಾಲಯ ಗುರುವಾರ ಪೇಶಾವರ ಹೈಕೋರ್ಟ್‌ಗೆ ತಿಳಿಸಿದೆ.

ಫೆಡರಲ್ ಸರ್ಕಾರ ನನ್ನ ಬಿಡುಗಡೆಗೆ ಯಾವುದೇ ಕ್ರಮಗಳನ್ನು ಕೈಗೊಳ್ಳುತ್ತಿಲ್ಲ ಎಂದು ಅನ್ಸಾರಿ ಸಲ್ಲಿಸಿದ್ದ ಮನವಿಯನ್ನು ಇಬ್ಬರು ಸದಸ್ಯರ ನ್ಯಾಯ ಪೀಠ ಆಲಿಸಿತು. ಅನ್ಸಾರಿ ಬಂಧನದ ಅವಧಿ ಡಿಸೆಂಬರ್ 15ಕ್ಕೆ ಕೊನೆಗೊಳ್ಳುತ್ತದೆ ಮತ್ತು 16ಕ್ಕೆ ಆತನನ್ನು ಬಿಡುಗಡೆ ಮಾಡಬೇಕೆಂದು ಆತನ ಪರ ವಕೀಲರು ವಾದಿಸಿದರು.

ಮಗನ ಬಿಡುಗಡೆಗೆ ಮತ್ತೆ 1 ತಿಂಗಳು ವಿಳಂಬವಾಗುತ್ತದೆ ಎಂಬ ಸುದ್ದಿ ಕೇಳಿ ತಾಯಿ ಫೌಜಿಯಾ ಕುಸಿದು ಬಿದ್ದರು. ನನ್ನ ಮಗನ ದಾರಿ ಕಾದು ಕಾದು 1,095 ದಿನಗಳನ್ನು ಕಳೆದಿದ್ದೇನೆ. ಮತ್ತೆ ನಾನು ಲೆಕ್ಕ ಹಾಕಲು ಆರಂಭಿಸಬೇಕಾ ಎಂದಾಕೆ ಗೋಳಾಡಿದ್ದಾರೆ.

ಆತನ ಬಿಡುಗಡೆಯಾದ ಗಂಟೆಗಳೊಳಗಾಗಿ ಭಾರತ ಸರಕಾರ ದಾಖಲೆಪತ್ರಗಳಿಗೆ ಸಂಬಂಧಿಸಿದ ಕೆಲಸಗಳನ್ನು ಮುಗಿಸುವ ಭರವಸೆ ನೀಡಬೇಕೆಂದು ಆಕೆ ಒತ್ತಾಯಿಸಿದ್ದಾಳೆ.

ಮಹಿಳಾ ಸ್ನೇಹಿತೆಯನ್ನು ಬಲವಂತದ ಮದುವೆಯಿಂದ ಕಾಪಾಡಲು ಅನ್ಸಾರಿ ಫೇಸ್‌ಬುಕ್ ಸ್ನೇಹಿತರೊಬ್ಬರು ಕಳುಹಿಸಿದ್ದ ನಕಲಿ ಗುರುತುಪತ್ರದ ಮೂಲಕ ಅಫಘಾನಿಸ್ತಾನದಿಂದ ಪಾಕಿಸ್ತಾನಕ್ಕೆ ನವೆಂಬರ್ 12, 2012ರಂದು ಪ್ರವೇಶಿಸಿದ್ದ. ದುರದೃಷ್ಟವಶಾತ್ ಗುಪ್ತಚರ ಅಧಿಕಾರಿಗಳ ಕೈಗೆ ಸಿಕ್ಕು ಜೈಲು ಪಾಲಾಗಿದ್ದರು.