ಮದುವೆ ಉಡುಗೊರೆಯಾಗಿ ಮಗಳಿಗೆ ಹಸು ಕೊಟ್ಟ ಮುಸ್ಲಿಂ ವ್ಯಕ್ತಿ

ರೋಹ್ಟಕ್‌: ಮುಸ್ಲಿಂ ವ್ಯಕ್ತಿಯೊಬ್ಬರು ಮಗಳಿಗೆ ಮದುವೆ ಉಡುಗೊರೆಯಾಗಿ ಹಸುವನ್ನು ನೀಡಿದ್ದಾರೆ. ಬಹುಶಃ ಹರಿಯಾಣಾದಲ್ಲಿ ಇಂಥ ಘಟನೆ ಇದೇ ಮೊದಲಿರಬೇಕು.

ಸೋನಿಪಠ್‌ ಜಿಲ್ಲೆಯ ಖರ್ಕೊಡ್ಡ ಗ್ರಾಮದಲ್ಲಿ ಸೋಮವಾರ ಗುಲ್ಶಾನಾ ಅವರ ನಿಖಾ (ಮದುವೆ ) ನಡೆಯಿತು. ಹಸುಗಳ ಬಗ್ಗೆ ವಿಶೇಷ ಕಾಳಜಿ ಹೊಂದಿರುವ ಮಗಳಿಗೆ ನೂರ್‌ ಖಾನ್‌ ಹಸುವನ್ನೇ ಮದುವೆ ಉಡುಗೊರೆಯಾಗಿ ಕೊಟ್ಟಿದ್ದಾರೆ.

'ಎಲ್ಲೇ ಹಸು ಕಂಡರೂ ಅದಕ್ಕೆ ಬ್ರೆಡ್‌, ಬೆಲ್ಲ ನೀಡುತ್ತಿದ್ದಳು. ನಮ್ಮ ಮನೆಯಲ್ಲೇ ಒಂದು ಹಸು ಸಾಕಬೇಕು ಎಂದು ಒತ್ತಾಯಿಸುತ್ತಿದ್ದಳು. ಸ್ಥಳದ ಅಭಾವದಿಂದ ಅದು ಸಾಧ್ಯವಾಗಿರಲಿಲ್ಲ. ಮದುವೆಗೆ ಹಸುವನ್ನೇ ಉಡುಗೊರೆಯಾಗಿ ನೀಡುವುದಾಗಿ ಭರವಸೆ ನೀಡಿದ್ದೆ. ಅದು ಸೋಮವಾರ ಸಾಧ್ಯವಾಯಿತು,' ಎಂದು ಹೇಳಿದ್ದಾರೆ.

'ಗೋವಿನ ಬಗ್ಗೆ ಪೂಜ್ಯ ಭಾವನೆ ಇದೆ. ಅತ್ತೆ ಮನೆಯಲ್ಲಿ ಅದಕ್ಕೆ ಯಾವುದೇ ತೊಂದರೆ ಆಗದಂತೆ ನೋಡಿಕೊಳ್ಳುತ್ತೇನೆ. ತಂದೆ ಕೊಟ್ಟ ಮಾತನ್ನು ಉಳಿಸಿಕೊಂಡಿದ್ದಾರೆ,' ಎಂದು ಗುಲ್ಶಾನಾ ಖುಷಿ ಹಂಚಿಕೊಂಡಿದ್ದಾರೆ.

ನೂರ್‌ ಖಾನ್‌ ಅವರ ನಡೆಯನ್ನು ಮೆಚ್ಚಿಕೊಂಡಿರುವ ಸ್ನೇಹಿತ ದಿನೇಶ್‌ ಕುಮಾರ್‌, 'ಗೋ ಸಂರಕ್ಷಣೆಗೆ ಸರಕಾರ ಹಲವಾರು ಯೋಜನೆಗಳನ್ನು ಆರಂಭಿಸಿದೆ. ಮದುವೆ ಮುಂತಾದ ಶುಭ ಸಮಾರಂಭಗಳಿಗೆ ಸಾಕಷ್ಟು ಖರ್ಚು ಮಾಡುತ್ತೇವೆ. ಇಂಥ ಸಂದರ್ಭಗಳಲ್ಲಿ ಹಸುವನ್ನು ಉಡುಗೊರೆಯಾಗಿ ನೀಡುವುದು ಪ್ರಶಂಸಾರ್ಹ. ನೂರ್‌ಖಾನ್‌ ನಡೆ ಮಾದರಿಯಾಗಿದೆ,' ಎಂದಿದ್ದಾರೆ.