ದುರ್ಗಾ ಮಾತೆಯ ಮೂರ್ತಿ ನಿರ್ಮಿಸಿ ಲಿಮ್ಕಾ ದಾಖಲೆ ಬರೆದ ಅಹಮದ್

ಗುವಾಹಟಿ: ಕೋಮು ಸಂಘರ್ಷದ ಪ್ರಕರಣಗಳೇ ಕೇಳಿಬರುತ್ತಿರುವ ಈ ದಿನಗಳಲ್ಲಿ ಗುವಾಹಟಿಯ ವಿಷ್ಣುಪುರದ ನೂರುದ್ದೀನ್ ಅಹಮದ್ ಎಂಬ ಮುಸಲ್ಮಾನ ಕಲಾವಿದ ಬಿದಿರಿನಿಂದ ದುರ್ಗಾ ಮಾತೆಯ ಜಗತ್ತಿನ ಅತಿ ಎತ್ತರದ ಮೂರ್ತಿ ನಿರ್ಮಿಸಿ ಹೆಸರು ಗಳಿಸಿದ್ದಾನೆ.

61 ವರ್ಷದ ನೂರುದ್ದೀನ್ ಅಹಮದ್, 2017ರ ಸೆಪ್ಟೆಂಬರ್‌ನಲ್ಲಿ ಗುವಾಹಟಿಯಲ್ಲಿ ದುರ್ಗಾ ಪೂಜೆಯ ಪೆಂಡಾಲ್ ಬಳಿ 98 ಅಡಿ ಎತ್ತರದ ದುರ್ಗಾ ಮಾತೆಯ ಮೂರ್ತಿಯನ್ನು ಬಿದಿರಿನಿಂದ ನಿರ್ಮಿಸಿದ್ದರು.

ಅವರ ಕೆಲಸಕ್ಕೆ ಜನರಿಂದ ಶ್ಲಾಘನೆ ವ್ಯಕ್ತವಾಗಿತ್ತು. ಮೂರ್ತಿ ನಿರ್ಮಿಸಲು 40 ಜನ ಹಿಂದುಗಳು ಮತ್ತು ಮುಸಲ್ಮಾನರು ಅಹಮದ್ ಮಾರ್ಗದರ್ಶನದಲ್ಲಿ ಏಳು ದಿನ ಕೆಲಸ ಮಾಡಿದ್ದರು. ಆದರೆ ಮಧ್ಯದಲ್ಲಿ ಒಮ್ಮೆ ಬಿರುಗಾಳಿ ಬಂದಿದ್ದರಿಂದ ಮೂರ್ತಿ ಭಾಗಶಃ ಹಾನಿಯಾಗಿತ್ತು. ನಂತರ ಅದನ್ನು ಮರುನಿರ್ಮಿಸಲಾಗಿತ್ತು.
ಮೂರ್ತಿ ನಿರ್ಮಾಣದ ಬಳಿಕ ಅದರ ವಿವರವನ್ನು ಅಹಮದ್ ಲಿಮ್ಕಾ ಬುಕ್ ಆಫ್ ರೆಕಾರ್ಡ್ಸ್‌ಗೆ ಕಳುಹಿಸಿದ್ದರು. ಅಹಮದ್‌ಗೆ ಕಳೆದ ಬುಧವಾರ ಲಿಮ್ಕಾದಿಂದ ದಾಖಲೆಯ ದೃಢೀಕರಣ ಪತ್ರ ತಲುಪಿದೆ.

ಮುಸ್ಲಿಮನಾಗಿದ್ದುಕೊಂಡು ಮೂರ್ತಿ ನಿರ್ಮಾಣಕ್ಕೆ ನಿಮಗೆ ಸಮಸ್ಯೆಯಾಗಲಿಲ್ಲವೇ ಎಂದಾಗ, ಅಂತಹ ಸಮಸ್ಯೆಯೇನೂ ಆಗಲಿಲ್ಲ, ಕಲೆಗೆ, ಕಲಾವಿದನಿಗೆ ಧರ್ಮ ಅಡ್ಡಬರುವುದಿಲ್ಲ ಎಂದಿದ್ದರು ಅಹಮದ್.


ಜತೆಗೆ ಮೂರ್ತಿಯನ್ನು ಐದು ದಿನ ಪೂಜಿಸಿದ ಬಳಿಕ ವಿಸರ್ಜಿಸುವ ಸಂಪ್ರದಾಯವಿದ್ದರೂ, ಅಹಮದ್ ರಚಿಸಿದ ದುರ್ಗಾಮೂರ್ತಿ ಅಪಾರ ಜನಮನ್ನಣೆ ಗಳಿಸಿದ್ದರಿಂದ ಅದನ್ನು ಮತ್ತೆ ಒಂದು ವಾರ ಕಾಲ ವಿಸ್ತರಿಸಲಾಗಿತ್ತು ಎನ್ನುವುದು ವಿಶೇಷ.