ನಾಯಿಮರಿಗಳಿಗೆ ನಾಮಕರಣ, ತೊಟ್ಟಿಲ ಶಾಸ್ತ್ರ: ವೈರಲ್ ಆಯ್ತು ವೀಡಿಯೋ

ಹೈದರಾಬಾದ್: ನಾಯಿ ಮನುಷ್ಯನದ್ದು ಪುರಾತನ ಕಾಲದಿಂದಲೂ ಅಪ್ಯಾಯಮಾನ ಸಂಬಂಧ. ನಿಷ್ಠೆ, ನಿಷ್ಕಲ್ಮಶ ಪ್ರೀತಿಗೆ ಹೆಸರಾದ ನಾಯಿ ತನಗೆ ಅನ್ನವಿಕ್ಕಿದವರಿಗಾಗಿ ಜೀವ ನೀಡಲು ಕೂಡ ಹಿಂದೆ ಮುಂದೆ ನೋಡದು. ಹಾಗೆಯೇ ಮನುಷ್ಯನು ಕೂಡ ನಾಯಿಯನ್ನು ತನ್ನ ಸ್ವಂತ ಸಂತಾನವೆಂಬಂತೆ ನೋಡುವ ಉದಾಹರಣೆಗಳು ಸಹ ಸಿಗುತ್ತಲೇ ಇರುತ್ತವೆ. ಇದು ಸಹ ಅಂತಹದೊಂದು.

ತೆಲಂಗಾಣದ ಸಿದ್ದಿಪೇಟ್ ಜಿಲ್ಲೆ ದುಬ್ಬಕಾದಲ್ಲಿ ಮಹಿಳೆಯೊಬ್ಬರು ತನ್ನ ಸಾಕು ನಾಯಿಯ 7 ಪುಟ್ಟ ಮರಿಗಳಿಗೆ ತೊಟ್ಟಿಲು ಶಾಸ್ತ್ರ ಮತ್ತು ನಾಮಕರಣ ಸಮಾರಂಭ ಏರ್ಪಡಿಸಿ ಸುದ್ದಿಯಾಗಿದ್ದಾರೆ.

ಸರಂಪಲ್ಲಿ ದೇವಮ್ಮ ಎಂಬ ಮಹಿಳೆಯ ಸಾಕು ನಾಯಿ ಇತ್ತೀಚಿಗೆ 7 ಮರಿಗಳಿಗೆ ಜನ್ಮ ನೀಡಿತ್ತು. ನಾಯಿಯನ್ನು ತನ್ನ ಸ್ವಂತ ಮಗಳಂತೆ ಸಾಕಿದ್ದ ದೇವಮ್ಮ ಅದರ ಮರಿಗಳಿಗೆ ನಾಮಕರಣ ಕಾರ್ಯಕ್ರಮವನ್ನು ಆಯೋಜಿಸಲು ನಿರ್ಧರಿಸಿ ಸ್ನೇಹಿತರು, ಸಂಬಂಧಿಕರು ಮತ್ತು ಗ್ರಾಮದ ಜನರನ್ನು ಆಹ್ವಾನಿಸಿದ್ದಾಳೆ.


ಪುಟ್ಟ ಮರಿಗಳಿಗೆ ಹೊಸ ಬಟ್ಟೆ ತೊಡಿಸಿ , ಹಣೆಗೆ ಕುಂಕುಮ ಹಚ್ಚಿ, ಕಿವಿಯಲ್ಲಿ ಹೆಸರು ಹೇಳಿ ಜೋಳಿಗೆಯಲ್ಲಿ ಹಾಕಿ ತೂಗಲಾಯಿತು. ಕಾರ್ಯಕ್ರಮಕ್ಕೆ ಬಂದಿದ್ದ ಮಹಿಳೆಯರು ತೊಟ್ಟಿಲು (ಜೋಗುಳ ) ತೂಗಿ ಹಾಡು ಹಾಡಿದರು.

ಬಳಿಕ ಎಲ್ಲರಿಗೂ ಸಿಹಿ ವಿತರಿಸಲಾಯಿತು. ಈ ವೀಡಿಯೋ ಈಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.