ದೇಶದ ಮುಂದೆ ಕಲಾವಿದರು ತಿಗಣೆಗೆ ಸಮ: ನಾನಾ ಪಾಟೇಕರ್

ಹೊಸದಿಲ್ಲಿ: ‘ದೇಶದ ಮುಂದೆ ಕಲಾವಿದರು ತಿಗಣೆ ಇದ್ದ ಹಾಗೆ. ದೇಶ ಕಾಯುವ ಸೈನಿಕರು ನಿಜವಾದ ಹೀರೊಗಳು. ಅವರಿಗಿಂತಲೂ ಪಾಕ್‌ ಕಲಾವಿದರು ಹೆಚ್ಚೇನಲ್ಲ. ನಾವು ತಾಯ್ನಾಡಿನ ಹಿತ ಕಾಯಲು ಮುಂದಾಗಬೇಕೆ ಹೊರತು ಶತ್ರು ದೇಶದ ಕಲಾವಿದರ ಬೆಂಬಲಕ್ಕೆ ನಿಲ್ಲಬಾರದು ,’ ಇವು ಬಾಲಿವುಡ್‌ ಹಿರಿಯ ನಟ ನಾನಾ ಪಾಟೇಕರ್‌ ಅವರ ನೇರ ಮಾತುಗಳು.

ಪಾಕ್‌ ಕಲಾವಿದರ ಪರ ವಹಿಸಿ ಮಾತನಾಡಿದ್ದ ನಟ ಸಲ್ಮಾನ್‌ ಖಾನ್‌ ಹಾಗೂ ಇತರ ನಟ-ನಿರ್ದೇಶಕರಿಗೆ ತಮ್ಮ ಕಟು ನುಡಿಗಳೊಂದಿಗೆ ಪಾಟೇಕರ್‌ ಪರೊಕ್ಷ ವಾಗಿ ಟಾಂಗ್‌ ನೀಡಿದ್ದಾರೆ.

‘ಗಡಿಯಲ್ಲಿ ದೇಶಕ್ಕಾಗಿ ಹೊರಾಡುವ ಸೈನಿಕರ ಮುಂದೆ ಬೇರಾರೂ ಹೆಚ್ಚಲ್ಲ. ಕಲಾವಿದರು ಸಾಮಾನ್ಯರಲ್ಲಿ ಸಾಮಾನ್ಯ ಮತ್ತು ಕೃತ್ತಿಮ ವ್ಯಕ್ತಿಗಳು. ಅದರಲ್ಲೂ ಕೆಲವರು ಮನ ಬಂದಂತೆ ಮಾತನಾಡುತ್ತಾರೆ. ಅವರ ಮಾತುಗಳಿಗೆ ಯಾರೂ ಬೆಲೆ ಕೊಡಬಾರದು,’ ಎಂದ ಪಾಟೇಕರ್‌ ಹೇಳಿದ್ದಾರೆ.