ನಾಸಾ ಕಣ್ಣಿಗೆ ಬೀಳದ ವಿಕ್ರಮ್‌ ಲ್ಯಾಂಡರ್‌, ಕ್ಷೀಣಿಸಿದ ಮರು ಸಂಪರ್ಕ ಸಾಧ್ಯತೆ

ವಾಷಿಂಗ್ಟನ್‌: ವಿಕ್ರಮ್‌ ಲ್ಯಾಂಡರ್‌ನ್ನು ಪತ್ತೆ ಹಚ್ಚುವಲ್ಲಿ ಅಮೆರಿಕಾದ ಬಾಹ್ಯಾಕಾಶ ಸಂಸ್ಥೆ ನಾಸಾ ವಿಫಲವಾಗಿದೆ. ಈ ಮೂಲಕ ಮತ್ತೊಮ್ಮೆ ವಿಕ್ರಮ್‌ನನ್ನು ಕಣ್ತುಂಬಿಕೊಳ್ಳುವ ಭಾರತೀಯರ ಆಸೆ ಕಮರಿದೆ.

ನಾಸಾದ ಲೂನಾರ್‌ ರೆಕನೋಸನ್ಸ್‌ ಆರ್ಬಿಟರ್‌ (ಎಲ್‌ಆರ್‌ಒ) ನೌಕೆ ಕಳೆದ 10 ವರ್ಷಗಳಿಂದ ಚಂದ್ರನ ಸುತ್ತ ಸುತ್ತುತ್ತಿದೆ. ಇದರಲ್ಲಿ ಕ್ಯಾಮೆರಾ ಇದ್ದು, ಇದು ಚಂದ್ರನ ಮೇಲ್ಮೈನ ಚಿತ್ರಗಳನ್ನು ರವಾನಿಸುತ್ತಿರುತ್ತದೆ.

ಬುಧವಾರ ಈ ನೌಕೆ ವಿಕ್ರಮ್‌ ಇರುವ ಪ್ರದೇಶದಲ್ಲಿ ಸುತ್ತಾಡಿತ್ತು. ಈ ಹಿನ್ನೆಲೆಯಲ್ಲಿ ಎಲ್‌ಆರ್‌ಒ ನೌಕೆ ವಿಕ್ರಮ್‌ ಚಿತ್ರವನ್ನು ರವಾನಿಸಲಿದೆ ಎಂದು ಹಲವಾರು ಜನರು ಕಾದು ಕುಳಿತಿದ್ದರು. ಆದರೆ ಚಿತ್ರದಲ್ಲೆಲ್ಲೂ ವಿಕ್ರಮ್‌ ಕಾಣಿಸಿಕೊಂಡಿಲ್ಲ. ಈ ಕುರಿತು ಪ್ರತಿಕ್ರಿಯೆ ನೀಡಿರುವ ನಾಸಾ, ಕಕ್ಷೆಗಾಮಿಯ ಕ್ಯಾಮೆರಾದ ದಿಕ್ಕಿನಲ್ಲಿ ವಿಕ್ರಮ್‌ ಇದ್ದಿರಲಿಕ್ಕಿಲ್ಲ ಎಂದು ಹೇಳಿದೆ. ಜತೆಗೆ ಈ ಸಂದರ್ಭದಲ್ಲಿ ಬೆಳಕು ಕೂಡ ಕಡಿಮೆ ಇತ್ತು. ಹೀಗಾಗಿ ಚಿತ್ರದಲ್ಲಿ ವಿಕ್ರಮ್‌ ಕಾಣಿಸಿಕೊಳ್ಳದೇ ಇರುವ ಸಾಧ್ಯತೆ ಇದೆ.

ಕಕ್ಷೆಗಾಮಿಯಲ್ಲಿರುವ ಕ್ಯಾಮೆರಾ ಉದ್ದೇಶಿತ ಲ್ಯಾಂಡಿಂಗ್‌ ಪ್ರದೇಶದ ಚಿತ್ರಗಳನ್ನು ತೆಗೆದಿದೆ. ಆದರೆ ಸ್ಪಷ್ಟವಾಗಿ ಲ್ಯಾಂಡರ್‌ ಎಲ್ಲಿ ಎಂಬುದು ತಿಳಿದಿಲ್ಲ. ಹೀಗಾಗಿ ಕ್ಯಾಮೆರಾದ ಕೋನದಲ್ಲಿ ಲ್ಯಾಂಡರ್ ಪತ್ತೆಯಾಗದೇ ಇರಬಹುದು ಎಂಬುದಾಗಿ ನಾಸಾದ ಅಧಿಕಾರಿ ಜಶುವಾ ಎ ಹ್ಯಾಂಡಲ್‌ ಹೇಳಿದ್ದಾರೆ.

ಸೆಪ್ಟೆಂಬರ್‌ 7ರಂದು ವಿಕ್ರಮ್‌ ಲ್ಯಾಂಡರ್‌ ಚಂದ್ರನ ಮೇಲ್ಮೈ ಸ್ಪರ್ಷಿಸುವ ಕೆಲವೇ ಕ್ಷಣಗಳಿಗೆ ಮುನ್ನ ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೋ)ಯ ಸಂಪರ್ಕ ಕಳೆದುಕೊಂಡಿತ್ತು. ನಂತರ ವಿಕ್ರಮ್‌ ಜೊತೆ ಸಂಪರ್ಕ ಸಾಧಿಸುವ ಇಸ್ರೋದ ಯತ್ನಗಳು ಈ ಕ್ಷಣದವರೆಗೆ ವಿಫಲವಾಗಿವೆ. ಆದರೆ ಆರ್ಬಿಟರ್‌ ಸಹಾಯದಿಂದ ವಿಕ್ರಮ್‌ನ ಥರ್ಮಲ್‌ ಚಿತ್ರವನ್ನು ಮಾತ್ರ ಸೆರೆ ಹಿಡಿಯಲಾಗಿದೆ.

ಇದೀಗ ನಾಸಾ ಚಂದ್ರನ ಮೇಲ್ಮೈ ಮೇಲಿನ ಚಿತ್ರಗಳನ್ನು ಸೆಪ್ಟೆಂಬರ್‌ 17ರಂದು ಸೆರೆ ಹಿಡಿದಿದ್ದು, ಈ ಹಿಂದೆ ಇದೇ ಜಾಗದಲ್ಲಿ ತೆಗೆದ ಚಿತ್ರದ ಜೊತೆ ಹೋಲಿಕೆ ಮಾಡಲಿದೆ. ಈ ಮೂಲಕ ವಿಕ್ರಮ್‌ನ ಕುರುಹೇನಾದರೂ ಸಿಗಲಿದೆಯಾ ಎಂದು ವಿಜ್ಞಾನಿಗಳು ತಡಕಾಡಲಿದ್ದಾರೆ.

ಇದಲ್ಲದೆ ಮುಂದೆಯೂ ವಿಕ್ರಮ್‌ ಬಿದ್ದಿರುವ ಜಾಗದ ಮೇಲಿನಿಂದ ಅಮೆರಿಕಾದ ಕಕ್ಷೆಗಾಮಿ ಸಂಚರಿಸಲಿದ್ದು, ಈ ಸಂದರ್ಭದಲ್ಲಿಯೂ ಪತ್ತೆಯಾಗಬಹುದು ಎಂಬುದಾಗಿ ನಾಸಾ ವಿಜ್ಞಾನಿಗಳು ಭರವಸೆ ವ್ಯಕ್ತಪಡಿಸಿದ್ದಾರೆ. ಇದೇ ಜಾಗದ ಮೇಲೆ ಅಕ್ಟೋಬರ್‌ 14ರಂದು ಎಲ್‌ಆರ್‌ಒ ಸಂಚರಿಸಲಿದೆ.

ಸೂರ್ಯನ ಚಲನೆಯನ್ನು ಆಧರಿಸಿ ಈ ಸಂದರ್ಭದಲ್ಲಿ ಇಲ್ಲಿ ಹೆಚ್ಚು ಬೆಳಕಿರಲಿದೆ ಎಂಬುದಾಗಿ ವಿಜ್ಞಾನಿಗಳು ಹೇಳಿದ್ದು ಈ ಸಂದರ್ಭದಲ್ಲಿ ವಿಕ್ರಮ್‌ ಪತ್ತೆಯಾಗುವ ಸಾಧ್ಯತೆಗಳು ಹೆಚ್ಚಾಗಿವೆ ಎಂದು ಹ್ಯಾಂಡಲ್‌ ತಿಳಿಸಿದ್ದಾರೆ.

ಆದರೆ ವಿಕ್ರಮ್‌ನ ಜೊತೆ ಸಂಪರ್ಕ ಸಾಧಿಸುವ ಪ್ರಯತ್ನಗಳು ಮಾತ್ರ ಕ್ಷೀಣಿಸುತ್ತಲೇ ಇದೆ. ಸೆಪ್ಟೆಂಬರ್‌ 21ರಂದು ಈ ಭಾಗದಲ್ಲಿ ಸೌರ ರಾತ್ರಿ ಆರಂಭವಾಗಲಿದ್ದು ಈ ಪ್ರದೇಶದ ತಾಪಮಾನ -180 ಡಿಗ್ರಿ ಸೆಲ್ಸಿಯಸ್‌ಗೆ ಇಳಿಯಲಿದೆ. ಒಮ್ಮೆ ಸೌರ ರಾತ್ರಿ ಆರಂಭವಾದ ನಂತರ ಮರು ಸಂಪರ್ಕ ಸಾಧಿಸುವ ಸಾಧ್ಯತೆಗಳ ಬಹಳ ಕಡಿಮೆ. ಲ್ಯಾಂಡರ್‌ ಮತ್ತು ರೋವರ್‌ನ್ನು ಹಗಲಿನಲ್ಲಿ ಕೆಲಸ ಮಾಡುವಂತೆ ವಿನ್ಯಾಸಗೊಳಿಸಲಾಗಿದೆ. ಕಡಿಮೆ ತಾಪಮಾನದಲ್ಲಿ ಕೆಲಸ ನಿರ್ವಹಿಸುವ ವಿನ್ಯಾಸವನ್ನು ಇವು ಹೊಂದಿಲ್ಲ.