ವಿಚಾರಣಾ ನ್ಯಾಯಾಲಯದ ಆದೇಶಕ್ಕೆ ಸ್ವಾಮಿ ವಿರೋಧ

ಹೊಸದಿಲ್ಲಿ: ನ್ಯಾಷನಲ್ ಹೇರಾಲ್ಡ್ ಪ್ರಕರಣದಲ್ಲಿ ವಿಚಾರಣಾ ನ್ಯಾಯಾಲಯದ ಆದೇಶದ ವಿರುದ್ಧದ ಮೇಲ್ಮನವಿಗೆ ಬಿಜೆಪಿ ನಾಯಕ ಸುಬ್ರಹ್ಮಣ್ಯಂ ಸ್ವಾಮಿ ವಿರೋಧಿಸಿದ್ದಾರೆ.

ಕೆಳ ನ್ಯಾಯಾಲಯ ಹಣಕಾಸು ಹಾಗೂ ಕಾರ್ಪೋರೆಟ್ ವ್ಯವಹಾರಗಳು ಮತ್ತು ಆದಾಯ ತೆರಿಗೆ ಹಾಗೂ ಇತರ ಇಲಾಖೆಗಳು ನೀಡಿದ ದಾಖಲೆಗಳು ಹಾಗೂ ವಿಚಾರಣಾ ನ್ಯಾಯಾಲಯದ ಆದೇಶ ಬದಿಗೊತ್ತಿ ಮೇಲ್ಮನವಿ ಸಲ್ಲಿಸಿರುವುದನ್ನು ತಾವು ವಿರೋಧಿಸುವುದಾಗಿ ದಿಲ್ಲಿ ಹೈಕೋರ್ಟ್‌ನಲ್ಲಿ ಮಂಗಳವಾರ ಹೇಳಿದರು. ನ್ಯಾಯಮೂರ್ತಿ ಪಿ.ಎಸ್. ತೇಜಿ ಅವರ ಎದುರು ಹೇಳಿಕೆ ನೀಡಿದ ಅವರು, ಎಐಸಿಸಿ ಖಜಾಂಚಿ ಮೋತಿಲಾಲ್ ವೋರಾ ಹಾಗೂ ಯಂಗ್ ಇಂಡಿಯಾ ಸಲ್ಲಿಸಿರುವ ಅರ್ಜಿಗೆ ಯಾವುದೇ ಉತ್ತರ ನೀಡುವುದಿಲ್ಲ ಎಂದರು.



ಇದು ಕಾನೂನಿನ ವಿಷಯವಾಗಿದ್ದು,ಅರ್ಜಿದಾರರಿಗೆ ಅಲ್ಲಿ ಯಾವುದೇ ಸ್ಥಾನ ಇಲ್ಲದೇ ಇರುವುದರಿಂದ ಹಾಗೂ ನ್ಯಾಯಾಲಯ ನೀಡಿರುವ ತೀರ್ಪುಗಳಿವೆ ಹಾಗಾಗಿ ನಾನು ಯಾವುದೇ ಉತ್ತರ ದಾಖಲಿಸಲು ಹೋಗುವುದಿಲ್ಲ ಎಂದು ನ್ಯಾಯಾಲಯದೆದುರು ಹೇಳಿದರು. ಇದೇ ವೇಳೆ, ದಿಲ್ಲಿ ಹೈಕೋರ್ಟ್ ಪೀಠ ಸ್ವಾಮಿ ಅವರಿಗೆ ನೋಟಿಸ್ ಜಾರಿ ಮಾಡಿತು, ಅಲ್ಲದೇ ಏಪ್ರಿಲ್ ನಾಲ್ಕಕ್ಕೆ ಉತ್ತರಿಸುವಂತೆ ಆದೇಶಿಸಿತು. ಜನವರಿ 11 ರಂದು ವಿಚಾರಣಾ ನ್ಯಾಯಾಲಯದ ವಿಚಾರಣಾ ಪ್ರಕ್ರಿಯೆಗಳಿಗೆ ವೋರಾ ಹಾಗೂ ಯಂಗ್ ಇಂಡಿಯಾ ತಡೆಯಾಜ್ಞೆ ತರಲು ಯತ್ನಿಸಿತ್ತು.

ಇದಕ್ಕೂ ಮೊದಲು ನಾಷನಲ್ ಹೆರಾಲ್ಡ್ ಪ್ರಕರಣದಲ್ಲಿ ಆರೋಪಿಗಳಾದ ಸೋನಿಯಾಗಾಂಧಿ, ರಾಹುಲ್ ಗಾಂಧಿ ಸೇರಿದಂತೆ ಇತರರು ಡಿಸೆಂಬರ್ 19, 2015 ರಂದು ಜಾಮೀನು ಪಡೆಯುವಲ್ಲಿ ಯಶಸ್ವಿಯಾಗಿದ್ದರು.