ಹಿಜ್ಬುಲ್ ಉಗ್ರರ ಜತೆ ನಂಟು ಹೊಂದಿದ್ದ ಡ್ರಗ್ಸ್‌ ಸಾಗಣೆದಾರರು ಪೊಲೀಸ್ ಬಲೆಗೆ

ಹೊಸದಿಲ್ಲಿ: ಮಾದಕ ಪದಾರ್ಥ ಸಾಗಿಸುತ್ತಿದ್ದ ಇಬ್ಬರು ಸಹೋದರರನ್ನು ರಾಷ್ಟ್ರೀತ ತನಿಖಾ ದಳ ಮತ್ತು ಪಂಜಾಬ್‌ ಪೊಲೀಸರು ಹರಿಯಾಣದ ಸಿರ್ಸಾದಲ್ಲಿ ಶನಿವಾರ ಬಂಧಿಸಿದ್ದಾರೆ. ಇಬ್ಬರೂ ಪಾಕಿಸ್ತಾನ ಪೋಷಿತ ಉಗ್ರ ಸಂಘಟನೆ ಹಿಜ್ಬುಲ್‌ ಮುಜಾಹಿದ್ದೀನ್‌ ಜತೆಗೆ ನಿಕಟ ಸಂಪರ್ಕ ಹೊಂದಿದ್ದರು ಎಂಬುದು ತನಿಖೆ ವೇಳೆ ಬೆಳಕಿಗೆ ಬಂದಿದೆ.

''ಇತ್ತೀಚೆಗೆ ಎನ್‌ಕೌಂಟರ್‌ನಲ್ಲಿಹತ್ಯೆಯಾದ ಹಿಜ್ಬುಲ್‌ ಕಮಾಂಡರ್‌ ರಿಯಾಜ್‌ ನಾಯ್ಕೂನ ಆಪ್ತ ಹಿಲಾಲ್‌ ಅಹ್ಮದ್‌ ಸೂಚನೆಯಂತೆ ಆರೋಪಿಗಳಾದ ರಣಜೀತ್‌ ರಾಣಾ ಮತ್ತು ಗಗನ್‌ದೀಪ್‌ ರಾಣಾ ಉಗ್ರ ಕೃತ್ಯಗಳಿಗೆ ನೆರವಾಗುತ್ತಿದ್ದರು. ನಾಯ್ಕೂ ಬೇಟೆ ಬಳಿಕ ಹಿಜ್ಬುಲ್‌ ಸಂಘಟನೆಗೆ ಡ್ರಗ್ಸ್‌ ಮಾರಾಟದ ಮೂಲಕ ಹಣ ಸಂಗ್ರಹಿಸಿ ನೀಡುತ್ತಿದ್ದ ಈ ಸಹೋದರರ ಬಂಧನ ದೊಡ್ಡ ಕಾರ್ಯಾಚರಣೆಯೇ ಆಗಿದೆ.

ಆರೋಪಿ ರಣಜೀತ್‌ ಅಲಿಯಾಸ್‌ ಚೀತಾ ಅಮೃತಸರ ನಿವಾಸಿ. ಆತ ದೇಶದಲ್ಲೇ ಅತಿದೊಡ್ಡ ಡ್ರಗ್ಸ್‌ ಸ್ಮಗ್ಲರ್‌ಗಳಲ್ಲಿ ಒಬ್ಬಾತ. 2019ರ ಜೂನ್‌ನಲ್ಲಿಅಟ್ಟಾರಿಯಿಂದ 532 ಕೆ.ಜಿ. ಹೆರಾಯಿನ್‌ ಸಾಗಿಸಿದ ಪ್ರಕರಣದಲ್ಲಿಪ್ರಮುಖ ಆರೋಪಿ ಕೂಡ ಎಂದು ಪಂಜಾಬ್‌ ಪೊಲೀಸ್‌ ಡಿಜಿಪಿ ದಿನಕರ್‌ ಗುಪ್ತಾ ಟ್ವೀಟ್‌ ಮಾಡಿದ್ದಾರೆ. ಪಾಕಿಸ್ತಾನದಿಂದ ಈ ಸಹೋದರರಿಗೆ ಡ್ರಗ್ಸ್‌ ಪೂರೈಕೆಯಾಗುತ್ತಿತ್ತು. ಅದನ್ನು ಪೊಲೀಸರ ಕಣ್ತಪ್ಪಿಸಿ ದೇಶದಲ್ಲಿಹಂಚುತ್ತಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.