ನಕ್ಸಲ್ ದಾಳಿಗೆ ಸೈನಿಕ ಸೇರಿ ನಾಲ್ವರು ಬಲಿ

ದಾಂತೇವಾಡ (ಛತ್ತೀಸ್‌ಗಢ): ನಕ್ಸಲರು ಐಎಡಿ ಬಳಸಿ ವಾಹನವನ್ನು ಸ್ಫೋಟಿಸಿದ ಪರಿಣಾಮ ಮೂರು ಜನ ನಾಗರಿಕರು ಮತ್ತು ಭದ್ರತಾ ಸಿಬ್ಬಂದಿಯೊಬ್ಬರು ದುರ್ಮರಣವನ್ನಪ್ಪಿದ ಘಟನೆ ಛತ್ತೀಸ್‌ಗಢದಲ್ಲಿ ನಡೆದಿದೆ. ದಾಳಿಯಲ್ಲಿ ಏಳು ಮಂದಿ ಗಾಯಗೊಂಡಿದ್ದಾರೆ.

ದೊರೆತಿರುವ ಮಾಹಿತಿಗಳ ಪ್ರಕಾರ, ಮಾವೋವಾದಿಗಳು ಗುರುವಾರ ಬಾಚೆಲಿ ಪ್ರದೇಶದಲ್ಲಿ ಸಿಐಎಸ್ಎಫ್ ಕೇಂದ್ರ ಇಂಡಸ್ಟ್ರಿಯಲ್ ಸೆಕ್ಯುರಿಟಿ ಫೋರ್ಸ್‌ನ ಮಿನಿಬಸ್ ಅನ್ನು ಗುರಿಯಾಗಿಸಿ ಶಕ್ತಿಯುತ ಐಇಡಿಯನ್ನು ಸ್ಫೋಟಿಸಿದ್ದಾರೆ. ಮತದಾನದ ಕರ್ತವ್ಯಕ್ಕಾಗಿ ಈ ಬಸ್ ಅನ್ನು ನಿಯೋಜಿಸಲಾಗಿತ್ತು

ಸಿಐಎಸ್ಎಫ್ ಸಿಬ್ಬಂದಿ ಮತ್ತು ಕೆಲವು ನಾಗರಿಕರು ಅಕಾಶ ನಗರಕ್ಕೆ ತೆರಳುತ್ತಿದ್ದ ಸಂದರ್ಭದಲ್ಲಿ ಈ ಘಟನೆ ನಡೆದಿದೆ.

ಮೃತರಲ್ಲಿ ಒಬ್ಬ ಸಿಐಎಸ್ಎಫ್ ಸಿಬ್ಬಂದಿ, ಬಸ್ ಚಾಲಕ, ನಿರ್ವಾಹಕ ಮತ್ತೊಬ್ಬ ನಾಗರಿಕರಿದ್ದಾರೆ.

ಚುನಾವಣಾ ಹೊಸ್ತಿಲಲ್ಲಿರುವ ರಾಜ್ಯದಲ್ಲಿ 10 ದಿನಗಳೊಳಗೆ ನಡೆದ ಎರಡನೇ ಮಾವೋವಾದಿ ದಾಳಿ ಇದಾಗಿದೆ.

ನವೆಂಬರ್ 12 ರಂದು ಇಲ್ಲಿ ವಿಧಾನಸಭಾ ಚುನಾವಣೆ ನಡೆಯಲಿದೆ. ದಾಂತೇವಾಡಾ ನಕ್ಸಲ್ ಪೀಡಿತ ಜಿಲ್ಲೆಗಳಲ್ಲೊಂದಾಗಿದೆ.