* 2 ಹಂತಗಳಲ್ಲಿ ಎನ್‌ಇಇಟಿ ನಡೆಸಲು ಸುಪ್ರೀಂ ನಿರ್ದೇಶನ
* ಆ. 17ಕ್ಕೆ ಫಲಿತಾಂಶ
* ಕರ್ನಾಟಕ ಮತ್ತು ತ.ನಾಡು ಅರ್ಜಿ ತಿರಸ್ಕೃತ
ಹೊಸದಿಲ್ಲಿ: ವೈದ್ಯಕೀಯ ಕಾಲೇಜುಗಳಿಗೆ ಪ್ರವೇಶ ಕಲ್ಪಿಸುವ 'ರಾಷ್ಟ್ರೀಯ ಅರ್ಹತಾ ಪ್ರವೇಶ ಪರೀಕ್ಷೆ' (ನೀಟ್‌)ಯನ್ನು ಈ ವರ್ಷದಿಂದಲೇ ಕಡ್ಡಾಯವಾಗಿ ಜಾರಿಗೆ ತರಲು ಸುಪ್ರೀಂಕೋರ್ಟ್‌ ಆದೇಶಿಸಿದೆ. ಇತರೆ ಎಲ್ಲಾ ಪ್ರವೇಶ ಪರೀಕ್ಷಾ ವ್ಯವಸ್ಥೆ ಅನೂರ್ಜಿತಗೊಳಿಸಿದ ಕೋರ್ಟ್‌, ರಾಷ್ಟ್ರವ್ಯಾಪಿ ಏಕರೂಪದ ಪರೀಕ್ಷಾ ವ್ಯವಸ್ಥೆ ಜಾರಿಗೊಳಿಸುವಂತೆ ಕೇಂದ್ರ ಸರಕಾರ ಮತ್ತು ಭಾರತೀಯ ವೈದ್ಯಕೀಯ ಮಂಡಳಿಗೆ ನಿರ್ದೇಶನ ನೀಡಿದೆ.
ಮೇ 1ರ ಭಾನುವಾರದಂದು ನಡೆಯುವ ಆಲ್‌ ಇಂಡಿಯಾ ಪ್ರಿ ಮೆಡಿಕಲ್‌ ಟೆಸ್ಟ್‌ (ಎಐಪಿಎಂಟಿ) ಪರೀಕ್ಷೆಯನ್ನು ನೀಟ್‌ ಒಂದನೇ ಹಂತವೆಂದು ಹಾಗೂ ಜುಲೈ 24ರಂದು ನಡೆಯಲಿರುವ ಪರೀಕ್ಷೆಯನ್ನು ನೀಟ್‌ ಎರಡನೇ ಹಂತ ಎಂದು ಪರಿಗಣಿಸಬೇಕು. ಈ ಎರಡೂ ಪರೀಕ್ಷೆಗಳ ಫಲಿತಾಂಶವನ್ನು ಆಗಸ್ಟ್‌ 17ರಂದು ಪ್ರಕಟಿಸಬೇಕು ಎಂದು ನ್ಯಾಯಮೂರ್ತಿಗಳಾದ ಎ.ಆರ್‌.ದವೆ, ಶಿವ ಕೀರ್ತಿ ಸಿಂಗ್‌ ಮತ್ತು ಎ.ಕೆ.ಗೋಯಲ್‌ ಅವರಿದ್ದ ನ್ಯಾಯಪೀಠವು ಸೂಚಿಸಿದೆ.
ಇದರೊಂದಿಗೆ ಇನ್ಮುಂದೆ ತಮ್ಮದೇ ಪ್ರವೇಶ ಪರೀಕ್ಷೆ ನಡೆಸಿಕೊಂಡು ಬರುತ್ತಿದ್ದ 600ಕ್ಕೂ ಹೆಚ್ಚು ಖಾಸಗಿ ವೈದ್ಯಕೀಯ ಕಾಲೇಜುಗಳು ಪ್ರಸಕ್ತ ಸಾಲಿನ ಶೈಕ್ಷಣಿಕ ವರ್ಷದಲ್ಲಿ ವಿದ್ಯಾರ್ಥಿಗಳ ಪ್ರವೇಶಕ್ಕೆ ಕಡ್ಡಾಯವಾಗಿ ನೀಟ್‌ ಪರೀಕ್ಷೆ ನಡೆಸಬೇಕಾಗುತ್ತದೆ.
ನೀಟ್‌ ಪ್ರಶ್ನಿಸಿ ತಮಿಳುನಾಡು ಮತ್ತು ಕರ್ನಾಟಕ ವೈದ್ಯಕೀಯ ಕಾಲೇಜುಗಳ ಸಂಘವು ಸಲ್ಲಿಸಿದ್ದ ಮೇಲ್ಮನವಿಯನ್ನು ತಿರಸ್ಕೃತಗೊಳಿಸಿರುವ ಕೋರ್ಟ್‌, ಎಐಪಿಎಂಟಿ ಪರೀಕ್ಷೆಗೆ ನೋಂದಣಿ ಮಾಡಿಸದ ವಿದ್ಯಾರ್ಥಿಗಳು ಜುಲೈ 24ರಂದು ನಡೆಯುವ ಎರಡನೇ ಹಂತದ ನೀಟ್‌ ಪರೀಕ್ಷೆಗೆ ಹಾಜರಾಗಲು ಅವಕಾಶ ಕಲ್ಪಿಸಿದೆ.
ದೇಶಾದ್ಯಂತ ಸರಕಾರಿ/ಖಾಸಗಿ ವೈದ್ಯಕೀಯ ಕಾಲೇಜುಗಳಲ್ಲಿ ಎಂಬಿಬಿಎಸ್‌, ಬಿಡಿಎಸ್‌, ಎಂಡಿ/ಎಂಎಸ್‌ ಕೋರ್ಸ್‌ಗಳ ಪ್ರವೇಶ ಪಡೆಯಲು ಈ ಪರೀಕ್ಷೆ ನಡೆಸಲಾಗುತ್ತದೆ.
'ನೀಟ್‌', ಅಸಂವಿಧಾನಿಕ ಎಂದು 2013ರ ಜುಲೈ 18ರಂದು ನೀಡಿದ್ದ ತನ್ನ ತೀರ್ಪನ್ನೇ ಏಪ್ರಿಲ್‌ 11ರಂದು ನ್ಯಾಯಮೂರ್ತಿ ಎ.ಆರ್‌.ದವೆ ನೇತೃತ್ವದ ಪಂಚ ಸದಸ್ಯ ಸಂವಿಧಾನ ಪೀಠವು ರದ್ದುಗೊಳಿಸಿ, ಈ ಬಿಕ್ಕಟ್ಟು ಇತ್ಯರ್ಥಪಡಿಸುವವರೆಗೂ ಕಾಲೇಜುಗಳು 'ನೀಟ್‌' ಪರೀಕ್ಷೆ ನಡೆಸಬಹುದಾಗಿದೆ ಎಂದು ಹೇಳಿತ್ತು. ಈ ಆದೇಶ ಜಾರಿಗೆ ತರಲು ರಾಜ್ಯ ಸರಕಾರಗಳು ವಿಳಂಬ ಧೋರಣೆ ಅನುಸರಿಸುತ್ತಿವೆ ಎಂದು ದೂರಿ 'ಸಂಕಲ್ಪ ಚಾರಿಟೆಬಲ್‌ ಟ್ರಸ್ಟ್‌ 'ಎಂಬ ಎನ್‌ಜಿಒ ಸುಪ್ರೀಂ ಮೊರೆ ಹೋಗಿತ್ತು.
ಏನಿದು ನೀಟ್‌ ಪರೀಕ್ಷೆ?
ಭಾರತೀಯ ವೈದ್ಯಕೀಯ ಮಂಡಳಿ ಮತ್ತು ಭಾರತೀಯ ದಂತ ವೈದ್ಯಕೀಯ ಮಂಡಳಿ 2012ರಲ್ಲಿ ನ್ಯಾಷನಲ್‌ ಎಲಿಜಿಬಿಟಿ ಎಂಟ್ರೆನ್ಸ್‌ ಟೆಸ್ಟ್‌ ( ನೀಟ್‌) ಪರೀಕ್ಷೆಯನ್ನು ಪರಿಚಯಿಸಿತು. ದೇಶಾದ್ಯಂತ ಸರಕಾರಿ/ಖಾಸಗಿ ವೈದ್ಯಕೀಯ ಕಾಲೇಜುಗಳಲ್ಲಿ ಎಂಬಿಬಿಎಸ್‌, ಬಿಡಿಎಸ್‌, ಎಂಡಿ/ಎಂಎಸ್‌ ಕೋರ್ಸ್‌ಗಳ ಪ್ರವೇಶ ಪಡೆಯಲು ಈ ಪರೀಕ್ಷೆ ನಡೆಸುತ್ತದೆ. ಮೂರು ಗಂಟೆ ಅವಧಿಯ ಈ ಎಕ್ಸಾಮ್‌ನಲ್ಲಿ ರಸಾಯನಶಾಸ್ತ್ರ, ಭೌತಶಾಸ್ತ್ರ ಮತ್ತು ಜೀವಶಾಸ್ತ್ರ ಕುರಿತ ವಸ್ತುನಿಷ್ಠ ಪ್ರಶ್ನೆಗಳಿರುತ್ತವೆ.