ಪ್ರಿಯತಮನ ಜತೆ ಸೇರಿಕೊಂಡು ಮಗಳ ಮುಂದೆಯೇ ಪತಿಯ ಹತ್ಯೆ

ಹೊಸದಿಲ್ಲಿ: ಪ್ರಿಯತಮನೊಂದಿಗೆ ಸೇರಿಕೊಂಡು ಮಹಿಳೆಯೊಬ್ಬಳು ಪತಿಯನ್ನೇ ಕೊಲೆಗೈದಿದ್ದಾಳೆ. ಅಷ್ಟೇ ಅಲ್ಲ ಆಕೆ ಈ ಅಮಾನುಷ ಕೃತ್ಯವನ್ನು ನಡೆಸಿದ್ದು ಒಂದು ವರ್ಷದ ಪುಟ್ಟ ಮಗುವಿನ ಮುಂದೆ.

ರಾಷ್ಟ್ರ ರಾಜಧಾನಿ ದಿಲ್ಲಿಯ ಸಮಯ್ಪುರ್ ಬದ್ಲಿಯಲ್ಲಿ ಸೋಮವಾರ ಈ ಹೇಯ ಕೃತ್ಯ ನಡೆದಿದ್ದು, ಮೃತನನ್ನು ಸೋನು (24) ಎಂದು ಗುರುತಿಸಲಾಗಿದೆ.

ನೆರೆಮನೆಯಾತನ ಜತೆ ಪ್ರೇಮ ಸಂಬಂಧ ಹೊಂದಿದ್ದ ಸೋನು ಪತ್ನಿ ಆತನೊಂದಿಗೆ ಓಡಿ ಹೋಗಲು ಯೋಜನೆ ರೂಪಿಸಿದ್ದಳು. ಹೀಗಾಗಿ ಇಬ್ಬರು ಸೇರಿಕೊಂಡು ಸೋನುವನ್ನು ಕೊಲ್ಲುವ ಯೋಜನೆ ರೂಪಿಸಿದರು. ಸೋಮವಾರ ನಸುಕಿನ ಜಾವ ಪ್ರೇಮಿ ಸಾಗರನನ್ನು ಮನೆಗೆ ಕರೆಸಿ ನೈಲಾನ್ ಹಗ್ಗದಿಂದ ಆತನನ್ನು ಉಸಿರುಗಟ್ಟಿಸಿ ಸಾಯಿಸಿದ್ದಾಳೆ. ಬಳಿಕ ಸಾಗರ್ ಅಲ್ಲಿಂದ ಹೊರಟು ಹೋದ. ಮುಂಜಾನೆಯವರೆಗೆ ಪತಿಯ ಪಕ್ಕ ಮಲಗಿದಂತೆ ನಟಿಸಿದ್ದ ಪತ್ನಿ, ಮುಂಜಾನೆ ಗಂಡ ಸಾವನ್ನಪ್ಪಿದ್ದಾನೆ ಎಂದು ಗೋಳಾಡಿದ್ದಾಳೆ. ರಾತ್ರಿ ಯಾರೋ ಬಂದು ಸಾಯಿಸಿ ಹೋಗಿದ್ದಾರೆ. ಆದರೆ ಸ್ವಲ್ಪವೂ ಸದ್ದಾಗಲಿಲ್ಲ ಎಂದಿದ್ದಾಳೆ.

ಸೋನು ಸಹೋದರ ಪೊಲೀಸರಿಗೆ ಹತ್ಯೆಯ ಮಾಹಿತಿ ನೀಡಿದ್ದಾನೆ. ಸ್ಥಳಕ್ಕಾಗಮಿಸಿದ ಪೊಲೀಸರು ಅನುಮಾನದಿಂದ ಆಕೆಯ ಮೊಬೈಲ್ ಕಾಲ್ ಪರಿಶೀಲಿಸಿದಾಗ ಸಾಗರ್ ಎಂಬ ವ್ಯಕ್ತಿಯ ಜತೆ ಸದಾ ಫೋನ್ ಕಾಲ್‌ನಲ್ಲಿರುವುದು ಬೆಳಕಿಗೆ ಬಂದಿದೆ. ಆತನನ್ನು ವಿಚಾರಣೆಗೊಳಪಡಿಸಿದಾಗ ಸತ್ಯವೆಲ್ಲ ಹೊರಬಿದ್ದಿದೆ.

ಪರಸ್ಪರ ಪ್ರೀತಿಸುತ್ತಿದ್ದ ನಾವು ಸ್ವಲ್ಪ ದಿನ ಕಳೆದ ಮೇಲೆ ಓಡಿ ಹೋಗುವ ಪ್ಲ್ಯಾನ್ ಹಾಕಿದ್ದೆವು ಎಂದು ಆರೋಪಿಗಳು ಸತ್ಯ ಒಪ್ಪಿಕೊಂಡಿದ್ದಾರೆ.