ಸಂಚಾರ ನಿಯಮ ಉಲ್ಲಂಘನೆ: ಟ್ರ್ಯಾಕ್ಟರ್ ಚಾಲಕನಿಗೆ ಬಿತ್ತು 59,000 ರೂ ದಂಡ

ಗುರುಗ್ರಾಮ್‌ (ಹರ್ಯಾಣ): ಒಂದೇ ದಿನ ಹಲವು ಬಗೆಯ ಸಂಚಾರ ನಿಯಮ ಉಲ್ಲಂಘನೆ ಮಾಡಿದ ಟ್ರಾಕ್ಟರ್ ಚಾಲಕನೊಬ್ಬನಿಗೆ ಬುಧವಾರ ಬರೋಬ್ಬರಿ 52,000 ರೂ ದಂಡ ವಿಧಿಸಲಾಗಿದೆ.

ವಾಹನದ ಮಾಲೀಕ ರಾಮ್ ಗೋಪಾಲ್‌ಗೆ ಲೈಸೆನ್ಸ್ ಆರ್‌ಸಿ, ಇನ್ಶೂರೆನ್ಸ್‌ ರಹಿತ ಚಾಲನೆ, ಫಿಟ್ನೆಸ್‌ ಇಲ್ಲದ ವಾಹನದ ಚಾಲನೆ, ವಾಯುಮಾಲಿನ್ಯ ಮಾನದಂಡ ಉಲ್ಲಂಘನೆ, ಅಪಾಯಕಾರಿ ವಸ್ತುಗಳ ಸಾಗಣೆ, ಅಪಾಯಕಾರಿ ಚಾಲನೆ, ಪೊಲೀಸ್‌ ಆದೇಶದ ಉಲ್ಲಂಘನೆ, ಟ್ರಾಫಿಕ್‌ ಸಿಗ್ನಲ್ ಉಲ್ಲಂಘನೆ- ಹೀಗೆ 10 ಅಪರಾಧಗಳಿಗೆ ದಂಡ ವಿಧಿಸಲಾಗಿದೆ. ಇವೆಲ್ಲವೂ ಸೇರಿ ದಂಡದ ಪ್ರಮಾಣ 59,000 ರೂ.ಗೆ ತಲುಪಿದೆ.

ನೂತನ ಮೋಟಾರ್ ವಾಹನ ಕಾಯ್ದೆ ಜಾರಿಯಾದ ಬಳಿಕ ದೊಡ್ಡ ಮೊತ್ತದ ದಂಡ ವಿಧಿಸುತ್ತಿರುವುದು ಇದೇ ಮೊದಲಲ್ಲ. ಒಡಿಶಾದ ಭುವನೇಶ್ವರದಲ್ಲಿ ಸಂಚಾರ ನಿಯಮಗಳನ್ನು ಉಲ್ಲಂಘಿಸಿದ ಆಟೋ ಚಾಲಕನಿಗೆ 47,500 ರೂ ದಂಡ ವಿಧಿಸಲಾಗಿತ್ತು.


ಗುರುಗ್ರಾಮದಲ್ಲೇ ನಡೆದ ಮತ್ತೊಂದು ಪ್ರಕರಣದಲ್ಲಿ ನಾನಾ ಕೇಸುಗಳನ್ನು ದಾಖಲಿಸಿ ದ್ವಿಚಕ್ರ ವಾಹನ ಚಾಲಕನಿಗೆ 23,000 ರೂ ದಂಡ ವಿಧಿಸಲಾಗಿತ್ತು.

ಮೋಟಾರು ವಾಹನ (ತಿದ್ದುಪಡಿ) ವಿಧೇಯಕ 2019 ಅನ್ನು ಜುಲೈನಲ್ಲಿ ಸಂಸತ್ ಅಂಗೀಕರಿಸಿತ್ತು. ಹೀಗೆ ಬದಲಾದ ಕಾಯ್ದೆ ಸೆಪ್ಟೆಂಬರ್ 1ರಿಂದ ದೇಶಾದ್ಯಂತ ಜಾರಿಗೆ ಬಂದಿದೆ.