ಎನ್‌ಡಿಎ ರಫೇಲ್‌ ಡೀಲ್‌ 2.8% ಅಗ್ಗ

ಹೊಸದಿಲ್ಲಿ: ಫ್ರಾನ್ಸ್‌ನಿಂದ ರಫೇಲ್‌ ಯುದ್ಧ ವಿಮಾನಗಳ ಖರೀದಿ ವಿಚಾರದಲ್ಲಿ ಸರಕಾರದ ವಿರುದ್ಧ ಪ್ರತಿಪಕ್ಷಗಳ ಆರೋಪಕ್ಕೆ ಉತ್ತರವೆಂಬಂತೆ ಕೇಂದ್ರ ಸರಕಾರ ಬಹು ನಿರೀಕ್ಷಿತ 'ಸಿಎಜಿ' (ಮಹಾಲೇಖಪಾಲರು ಮತ್ತು ಲೆಕ್ಕಪರಿಶೋಧಕರ) ವರದಿಯನ್ನು ಬುಧವಾರ ರಾಜ್ಯಸಭೆಯಲ್ಲಿ ಮಂಡಿಸಿತು.

ಕಾಂಗ್ರೆಸ್‌ ನೇತೃತ್ವದ ಯುಪಿಎ ಸರಕಾರಕ್ಕಿಂತಲೂ ಶೇ. 2.8ರಷ್ಟು ಕಡಿಮೆ ಅಗ್ಗದ ದರದಲ್ಲಿ ಮೋದಿ ಸರಕಾರ ರಫೇಲ್‌ ಒಪ್ಪಂದ ಕುದುರಿಸಿದೆ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ. ಆದರೆ ರಫೇಲ್‌ ಯುದ್ಧ ವಿಮಾನಗಳ ಬೆಲೆಯನ್ನು ವರದಿಯಲ್ಲಿ ಉಲ್ಲೇಖಿಸಲಾಗಿಲ್ಲ.

ಕಾಂಗ್ರೆಸ್‌ ಮತ್ತು ಇತರೆ ಪ್ರತಿಪಕ್ಷಗಳು ವರದಿಯನ್ನು ಏಕಪಕ್ಷೀಯ ಎಂದು ತಿರಸ್ಕರಿಸಿದ್ದು, ಪ್ರತಿಭಟನೆ ಮತ್ತು ಆರೋಪ ಮುಂದುವರಿಸಿವೆ.

ಖಾತ್ರಿ ಬಗ್ಗೆ ಕಳವಳ: ಫ್ರೆಂಚ್‌ ಸರಕಾರದಿಂದ ರಫೇಲ್‌ ಯುದ್ಧ ವಿಮಾನಗಳ ಕಾರ್ಯದಕ್ಷತೆ ಮತ್ತು ಹಣಕಾಸು ಖಾತ್ರಿಯನ್ನು ಭಾರತ ಪಡೆಯದಿರುವ ಬಗ್ಗೆ ಸಿಎಜಿ ವರದಿಯಲ್ಲಿ ಕಳವಳ ವ್ಯಕ್ತಪಡಿಸಲಾಗಿದೆ. 2007ರಲ್ಲಿ ಯುಪಿಎ ಸರಕಾರದ ಅವಧಿಯಲ್ಲಿ ಇಂತಹ ಖಾತ್ರಿಯನ್ನು ಪಡೆಯಲಾಗಿತ್ತು ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.

ಕಾಂಗ್ರೆಸ್‌ ಪ್ರತಿಭಟನೆ

ರಫೇಲ್‌ ಒಪ್ಪಂದದಲ್ಲಿ ಅಕ್ರಮವಾಗಿದೆ ಎಂದು ಆರೋಪಿಸಿ ಸಂಸತ್‌ ಭವನದ ಎದುರು ರಾಹುಲ್‌ ಗಾಂಧಿ, ಸೋನಿಯಾ ಗಾಂಧಿ, ಮಾಜಿ ಪ್ರಧಾನಿ ಮನಮೋಹನ್‌ ಸಿಂಗ್‌ ನೇತೃತ್ವದಲ್ಲಿ ಕಾಂಗ್ರೆಸ್‌ ನಾಯಕರು ಪ್ರತಿಭಟನೆ ನಡೆಸಿದರು. ಕಾಗದದ ವಿಮಾನಗಳು ಮತ್ತು ಪೋಸ್ಟರ್‌ಗಳನ್ನು ಹಿಡಿದು, 'ಚೌಕಿದಾರ್‌ ಚೋರ್‌ ಹೈ' ಎಂಬ ಘೋಷಣೆ ಕೂಗಲಾಯಿತು.