ರಾಮದೇವ್‌ಗೆ ಪ್ರಧಾನಿ ಯೋಗ

ಹೊಸದಿಲ್ಲಿ: ಕೋಟ್ಯಂತರ ರೂಪಾಯಿ ಬ್ಯುಸಿನೆಸ್‌ ಸಾಮ್ರಾಜ್ಯ ಕಟ್ಟಿರುವ ಯೋಗ ಗುರು ಬಾಬಾ ರಾಮದೇವ್‌ ಮುಂದೊಂದು ದಿನ ಭಾರತದ ಪ್ರಭಾವಿ ಪ್ರಧಾನಿಯಾಗಬಹುದು ಎಂದು ಅಮೆರಿಕದ ದಿನಪತ್ರಿಕೆ ‘ನ್ಯೂಯಾರ್ಕ್‌ ಟೈಮ್ಸ್‌’ ಭವಿಷ್ಯ ನುಡಿದಿದೆ.

ರಾಮದೇವ್‌ ಗಳಿಸಿರುವ ಜನಪ್ರಿಯತೆ ಹಾಗೂ ವಾಣಿಜ್ಯ ವಹಿವಾಟು ಕಟ್ಟಿಬೆಳೆಸಿದ ಅವರ ಛಾತಿಯನ್ನು ಹೊಗಳಿರುವ ಪತ್ರಿಕೆ, ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ವ್ಯಕ್ತಿತ್ವದೊಂದಿಗೆ ಹೋಲಿಕೆ ಮಾಡಿದೆ. ‘‘ಮುಂದೊಂದು ದಿನ ಅಮೆರಿಕದಲ್ಲಿ ಡೊನಾಲ್ಡ್‌ ಟ್ರಂಪ್‌ ಬೆಳೆದ ರೀತಿಯಲ್ಲಿಯೇ ರಾಮದೇವ್‌ ಭಾರತದಲ್ಲಿ ಏಳ್ಗೆ ಸಾಧಿಸಬಹುದು,’’ ಎಂದು ‘ಮೋದಿ ಏಳ್ಗೆಯ ಹಿಂದೆ ಬಿಲಿಯನರ್‌ ಯೋಗಿ’ ಶೀರ್ಷಿಕೆಯಡಿ ಹೊರತಂದ ವಿಶೇಷ ಸಂಚಿಕೆಯಲ್ಲಿ ಪತ್ರಿಕೆ ತಿಳಿಸಿದೆ.

ಟ್ರಂಪ್‌ ಜತೆ ರಾಮದೇವ್‌ ಅವರನ್ನು ಹೋಲಿಕೆ ಮಾಡಿದ್ದು ಯಾಕೆ ಎನ್ನುವುದಕ್ಕೂ ವಿವರ ನೀಡಿದೆ. ‘‘ಟ್ರಂಪ್‌ ರೀತಿಯಲ್ಲಿಯೇ ರಾಮದೇವ್‌ ಕೂಡ ಬಿಲಿಯನ್‌ ಡಾಲರ್‌ ಬ್ಯುಸಿನೆಸ್‌ ನಡೆಸುತ್ತಿದ್ದಾರೆ. ಇವರಿಬ್ಬರದ್ದೂ ಟೀವಿ ಕಾರ್ಯಕ್ರಮಗಳಿಗೆ ಅಚ್ಚುಮೆಚ್ಚಿನ ವ್ಯಕ್ತಿತ್ವ. ಬ್ರಾಂಡಿಂಗ್‌ ವಿಷಯದಲ್ಲಿ ತಮ್ಮ ಹೆಸರಿನ ಬಳಕೆಗೆ ಬಾಬಾ ಹಿಂಜರಿಯುವುದಿಲ್ಲ,’’ ಎಂದು ಪತ್ರಿಕೆ ವಿಶ್ಲೇಷಿಸಿದೆ. ಆದರೆ, ವಾಣಿಜ್ಯ ವಹಿವಾಟು ನಡೆಸುವ ವಿಧಾನದಲ್ಲಿ ಇವರಿಬ್ಬರ ನಡುವೆ ವ್ಯತ್ಯಾಸ ಇದೆ ಎಂದೂ ತಿಳಿಸಿದೆ.

ಸದ್ಯ ಯಾವುದೇ ರಾಜಕೀಯ ಚಟುವಟಿಕೆಯನ್ನು ಬಾಬಾ ರಾಮದೇವ್‌ ಹೊಂದಿಲ್ಲದಿದ್ದರೂ ಬಿಜೆಪಿಯ ಅನೇಕ ಮುಖಂಡರ ಜತೆ ನಿಕಟ ಸಂಪರ್ಕ ಹೊಂದಿದ್ದಾರೆ. ಮುಂದೆ ರಾಮದೇವ್‌ ದಿಢೀರನೆ ಪ್ರಧಾನಿ ಅಭ್ಯರ್ಥಿಯಾಗಿ ಹೊರ ಹೊಮ್ಮಿದರೆ ಅಚ್ಚರಿ ಇಲ್ಲ ಎನ್ನುವುದನ್ನು ಆ ಪಕ್ಷದ ಮುಖಂಡರೇ ಒಪ್ಪಿಕೊಂಡಿದ್ದಾರೆ ಎಂದೂ ಪತ್ರಿಕೆ ತಿಳಿಸಿದೆ.