ಮಂಗಳೂರು ನಿಲ್ದಾಣದಲ್ಲಿ ವಿಮಾನ ಸ್ಕಿಡ್‌: ಏರ್‌ ಇಂಡಿಯಾ ಪೈಲಟ್‌ ಲೈಸೆನ್ಸ್‌ ಕ್ಯಾನ್ಸಲ್‌

ಹೊಸದಿಲ್ಲಿ: ಜೂನ್‌ 30ರಂದು ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಏರ್‌ ಇಂಡಿಯಾ ವಿಮಾನ ಟ್ಯಾಕ್ಸಿ ವೇಯಲ್ಲಿ ಸ್ಕಿಡ್‌ ಆಗಿ ಚರಂಡಿ ದಾಟಿ ನಿಂತ ಘಟನೆಗೆ ಸಂಬಂಧಿಸಿ ನಾಗರಿಕ ವಿಮಾನಯಾನ ಮಹಾ ನಿರ್ದೇಶನಾಲಯ ಪೈಲಟ್‌ನ ಲೈಸೆನ್ಸ್‌ ರದ್ದುಪಡಿಸಿದೆ.

ದುಬೈಯಿಂದ ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಸಂಜೆ ಬರುತ್ತಿದ್ದ ಏರ್‌ ಇಂಡಿಯಾ ಎಕ್ಸ್‌ಪ್ರೆಸ್‌ ವಿಮಾನ ರನ್‌ ವೇಯಲ್ಲಿ ಇಳಿದು ಟ್ಯಾಕ್ಸಿ ವೇಯಲ್ಲಿ ಸಾಗುತ್ತಿದ್ದಂತೆಯೇ ಜಾರಿ ಪಕ್ಕದ ಸಣ್ಣ ಚರಂಡಿಯನ್ನು ದಾಟಿತ್ತು. ಅದೃಷ್ಟವಶಾತ್‌ ಯಾವುದೇ ಅಪಾಯ ನಡೆದಿರಲಿಲ್ಲ.

ವಿಮಾನದಲ್ಲಿ ಒಟ್ಟು 183 ಪ್ರಯಾಣಿಕರಿದ್ದರು. 2010ರ ಮೇ 22 ರಂದು ಮುಂಜಾನೆ ದುಬೈಯಿಂದ ಮಂಗಳೂರಿಗೆ ಬರುತ್ತಿದ್ದ ಏರ್‌ ಇಂಡಿಯಾ ವಿಮಾನ ಅಪಘಾತಕ್ಕೀಡಾಗಿ 158 ಮಂದಿ ಮೃತಪಟ್ಟಿದ್ದರು.

ಮಹಾ ನಿರ್ದೇಶನಾಲಯ ಈ ವಿದ್ಯಮಾನ ಅತ್ಯಂತ ಗಂಭೀರವಾಗಿ ಪರಿಗಣಿಸಿ ತನಿಖೆಗೆ ಆದೇಶ ನೀಡಿತ್ತು.