ಉಗ್ರರಿಗೆ ಹಣ ಪೂರೈಕೆ: ಜಮ್ಮು ಕಾಶ್ಮೀರದ 11 ಕಡೆ ಎನ್‌ಐಎ ದಾಳಿ

ಹೊಸದಿಲ್ಲಿ: ಪುಲ್ವಾಮಾ ಭಯೋತ್ಪಾದಕ ದಾಳಿ ಪ್ರಕರಣ ಹಾಗೂ ಭಯೋತ್ಪಾದಕರಿಗೆ ಹಣ ಪೂರೈಸಿದ ಪ್ರಕರಣಕ್ಕೆ ಸಂಬಂಧಿಸಿದಂತೆ ರಾಷ್ಟ್ರೀಯ ತನಿಖಾ ಸಂಸ್ಥೆ ಎನ್‌ಐಎ ದಕ್ಷಿಣ ಕಾಶ್ಮೀರದ 11 ಸ್ಥಳಗಳಲ್ಲಿ ಏಕಕಾಲದಲ್ಲಿ ಶೋಧನೆ ನಡೆಸಿತು.

ಇಬ್ಬರು ಜೈಷೆ ಮೊಹಮ್ಮದ್ ಭಯೋತ್ಪಾದಕರ ಮನೆಗಳು ಹಾಗೂ ಭಯೋತ್ಪಾದಕ ದಾಳಿಯ ಪ್ರಮುಖ ಆರೋಪಿಗಳಾದ ಮುದಸರ್ ಅಹಮ್ಮದ್ ಹಾಗೂ ಸಜ್ಜಾನ್ ಭಟ್ ಅವರ ನಿವಾಸಗಳು ಸೇರಿದಂತೆ ಹಲವು ಕಡೆ ಶೋಧನೆ ನಡೆಸಲಾಯಿತು.

ಟ್ರಾಲ್, ಅವಂತಿಪೋರಾ ಹಾಗೂ ಪುಲ್ವಾಮಾದಲ್ಲಿ ಜೈಷೆ ಮೊಹಮ್ಮದ್ ಸಂಘಟನೆಯ ಸಕ್ರಿಯ ಕಾರ್ಯಕರ್ತರ ಮನೆಗಳ ಮೇಲೂ ಶೋಧನೆ ನಡೆಸಲಾಯಿತು ಎಂದು ಅಧಿಕೃತ ಹೇಳಿಕೆಯಲ್ಲಿ ತಿಳಿಸಲಾಗಿದೆ.

ಗುಪ್ತ ಬರಹಗಳನ್ನು ಒಳಗೊಂಡ ಡೈರಿ ಸೇರಿದಂತೆ ಆಕ್ಷೇಪಾರ್ಹ ಮಾಹಿತಿಗಳನ್ನು ತನಿಖಾ ಸಂಸ್ಥೆ ವಶಪಡಿಸಿಕೊಂಡಿದೆ.

ದಕ್ಷಿಣ ಕಾಶ್ಮೀರದ ಮೂರು ಪ್ರತ್ಯೇಕತಾವಾದಿ ನಾಯಕರ ಮನೆಗಳ ಮೇಲೂ ಶೋಧನೆ ನಡೆಸಲಾಯಿತು.