ನೀರವ್‌ ಮೋದಿ, ಚೋಕ್ಸಿಗೆ ಸಮನ್ಸ್‌

ಮುಂಬಯಿ: ದೇಶತೊರೆದ ಆರ್ಥಿಕ ಅಪರಾಧಿಗಳ ವಿರುದ್ಧ ಕ್ರಮ ಕೈಗೊಳ್ಳಲು ರೂಪಿಸಲಾಗಿರುವ ನೂತನ ಕಾಯಿದೆ ಅಡಿಯಲ್ಲಿ ನೀರವ್‌ ಮೋದಿ ಹಾಗೂ ಮೆಹುಲ್‌ ಚೊಕ್ಸಿ ಅವರಿಗೆ ಇಲ್ಲಿನ ವಿಶೇಷ ನ್ಯಾಯಾಲಯವು ಸಮನ್ಸ್‌ ಜಾರಿ ಮಾಡಿದೆ.

ಜಾರಿ ನಿರ್ದೇಶನಾಲಯದ ಮನವಿಯನ್ನು ಪುರಸ್ಕರಿಸಿರುವ ನ್ಯಾಯಾಲಯ, ಪಿಎನ್‌ಬಿ ಹಗರಣದಲ್ಲಿ ವಿಚಾರಣೆ ಎದುರಿಸಲು ಸೆ.25ರಂದು ನೀರವ್‌ ಮೋದಿ ಹಾಗೂ ಸೆ.26ರಂದು ಮೆಹುಲ್‌ ಚೋಕ್ಸಿ ಹಾಜರಾಗಬೇಕೆಂದು ಆದೇಶ ನೀಡಿದೆ.

ಇತ್ತೀಚೆಗಷ್ಟೇ ಜಾರಿ ನಿರ್ದೇಶನಾಲಯವು ವಜ್ರದ ವ್ಯಾಪಾರಿಗಳಾದ ನೀರವ್‌ ಮೋದಿ ಮತ್ತು ಚೋಕ್ಸಿ ಅವರನ್ನು ದೇಶ ತೊರೆದ ಆರ್ಥಿಕ ಅಪರಾಧಿಗಳೆಂದು ಘೋಷಿಸಬೇಕೆಂದು ಕೋರಿ ಅಕ್ರಮ ಹಣ ವಹಿವಾಟು ಪ್ರಕರಣಗಳ ವಿಚಾರಣೆ ನಡೆಸುವ ವಿಶೇಷ ಕೋರ್ಟ್‌ಗೆ (ಪಿಎಂಎಲ್‌ಎ ಕೋರ್ಟ್‌) ಮನವಿ ಸಲ್ಲಿಸಿತ್ತು. ಅಲ್ಲದೆ, 3,500 ಕೋಟಿ ರೂ. ಮೌಲ್ಯದ ಈ ಹಗರಣದಲ್ಲಿ ಆರೋಪಿಗಳ ಆಸ್ತಿ ಮುಟ್ಟುಗೋಲು ಹಾಕಿಕೊಳ್ಳಲು ಅವಕಾಶ ನೀಡುವಂತೆಯೂ ಇ.ಡಿ ಕೇಳಿತ್ತು.