ನೀರವ್‌ ಮೋದಿಯಿಂದ ಸಾಕ್ಷ್ಯ ನಾಶಕ್ಕೆ ಸರ್ವ ಪ್ರಯತ್ನ: ಸಿಬಿಐ

ಹೊಸದಿಲ್ಲಿ: ಪಿಎನ್‌ಪಿ ಹಗರಣಕ್ಕೆ ಸಂಬಂಧಿಸಿದ ಸಾಕ್ಷ್ಯಗಳನ್ನು ನಾಶಪಡಿಸಲು ನೀರವ್‌ ಮೋದಿ ಹರಸಾಹಸ ಪಟ್ಟಿದ್ದಾರೆ ಎಂದು ಸ್ಪಷ್ಟವಾಗಿದೆ.

ಸಿಬಿಐ ಪ್ರಕರಣದ ಕುರಿತು ತನಿಖೆ ಆರಂಭಿಸಿದ ಬಳಿಕ, ಸಾಕ್ಷ್ಯಗಳನ್ನು ನಾಶಪಡಿಸಲು ಎಲ್ಲ ರೀತಿಯ ಪ್ರಯತ್ನ ಪಟ್ಟಿರುವುದು ತಿಳಿದುಬಂದಿದೆ.

ಸಂಸ್ಥೆಯ ಕಿರಿಯ ಎಕೌಂಟೆಂಟ್‌ ರಾಹುಲ್‌ ಸಿಸೋದಿಯಾ ಹಾಗೂ ಕಚೇರಿ ಸಹಾಯಕ ರವೀಂದ್ರ ದಿನಕರ್‌ ಹಿಂದೇಲ್ಕರ್‌ ಅವರನ್ನು ಸಿಬಿಐ ವಿಚಾರಣೆ ನಡೆಸಿದ್ದು, ಪ್ರಕರಣ ಸಂಬಂಧ ಮಹತ್ವದ ವಿಚಾರಗಳನ್ನು ತಿಳಿದು ಕೊಳ್ಳಲಾಗಿದೆ.
ಡೈಮಂಡ್ಸ್‌ ಆರ್‌ಯುಎಸ್‌, ಸ್ಟೆಲ್ಲಾರ್ ಡೈಮಂಡ್‌ ಮತ್ತು ಸೋಲಾರ್‌ ಎಕ್ಸ್‌ಪೋರ್ಟ್ಸ್‌ ಸಂಸ್ಥೆಗಳಿಗೆ ಸೇರಿದ ಸುಮಾರು 50ಕ್ಕೂ ಹೆಚ್ಚು ದಾಖಲೆಗಳಿರುವ ಪೆಟ್ಟಿಗೆಗಳನ್ನು ಬಚ್ಚಿಡಲು ಹುನ್ನಾರ ನಡೆಸಿದ್ದರು ಎಂಬ ಅಂಶ ಸಿಬಿಐ ವಿಚಾರಣೆ ವೇಳೆ ಬೆಳಕಿಗೆ ಬಂದಿದೆ.

ಈರ್ವರಿಂದಲೂ ಲಿಖಿತ ಹೇಳಿಕೆ ಪಡೆಯಲಾಗಿದ್ದು, ಸಾಕ್ಷ್ಯ ನಾಶಕ್ಕೆ ಸಂಬಂಧಿಸಿದಂತೆ ಮಾಡಿರುವ ಕೆಲಸಗಳ ಕುರಿತು ಮಾಹಿತಿ ಸಿಕ್ಕಿದೆ. ಈ ಸಂಬಂಧ ಕೋರ್ಟ್‌ಗೂ ಸಿಬಿಐ ಅಧಿಕಾರಿಗಳು ಹೇಳಿಕೆಗಳನ್ನು ಸಲ್ಲಿಸಿದ್ದಾರೆ.

ಸಿಬಿಐನಿಂದ ಬಂಧಿಸಲ್ಪಟ್ಟ ಮಿತೇನ್‌ ಪಾಂಡ್ಯ, ರವೀಂದ್ರ ಹಾಗೂ ಇನ್ನೂ 3 ಮಂದಿ ಕಚೇರಿ ಸಹಾಯಕರಲ್ಲಿ ಕಡತಗಳನ್ನು ಸ್ಥಳಾಂತರಗೊಳಿಸುವಂತೆ ತಿಳಿಸಿದ್ದಾರೆ ಎಂದು ಸಿಸೋದಿಯಾ ತಮ್ಮ ಹೇಳಿಕೆಯಲ್ಲಿ ಹೇಳಿದ್ದಾರೆ.