ಜ.2ಕ್ಕೆ ವಿಚಾರಣೆಗೆ ಹಾಜರಾಗಿ, ನೀರವ್‌ಗೆ ಲಂಡನ್‌ ಕೋರ್ಟ್‌ ಆದೇಶ

ಲಂಡನ್‌: ಭಾರತದಿಂದ ಪರಾರಿಯಾಗಿ ಬ್ರಿಟನ್‌ನಲ್ಲಿ ನೆಲೆಸಿರುವ ಬಹುಕೋಟಿ ಪಂಜಾಬ್‌ ನ್ಯಾಷನಲ್‌ ಬ್ಯಾಂಕ್‌ ವಂಚನೆ ಪ್ರಕರಣದ ಆರೋಪಿ ವಜ್ರದ ವ್ಯಾಪಾರಿ ನೀರವ್‌ ಮೋದಿಗೆ ಜನವರಿ 2ರಂದು ವಿಡಿಯೋ ಲಿಂಕ್‌ ಮೂಲಕ ನ್ಯಾಯಾಲಯಕ್ಕೆ ವಿಚಾರಣೆಗೆ ಹಾಜರಾಗುವಂತೆ ಲಂಡನ್‌ ನ ವೆಸ್ಟ್‌ಮಿನ್‌ಸ್ಟರ್‌ ಮ್ಯಾಜಿಸ್ಪ್ರೇಟ್‌ ಕೋರ್ಟ್‌ ಸೂಚಿಸಿದೆ.

ನೀರವ್‌ ಮೋದಿ ಲಂಡನ್‌ ನ ವಾಂಡ್ಸ್‌ವರ್ಥ್ ಜೈಲಿನಿಂದಲೇ ವೆಸ್ಟ್‌ಮಿನ್‌ಸ್ಟರ್‌ ಕೋರ್ಟ್‌ ವಿಚಾರಣೆ ಎದುರಿಸಿದರು. ಈ ವೇಳೆ ನ್ಯಾಯಾಧೀಶ ಗರೆಥ್‌ ಬ್ರಾನ್ಸ್ಟನ್ ಅವರು ಬರುವ ಮೇ 11ರಿಂದ ನೀರವ್‌ ಹಸ್ತಾಂತರ ಪ್ರಕ್ರಿಯೆ ಕುರಿತ ವಿಚಾರಣೆ ಆರಂಭವಾಗಲಿದ್ದು, ಜನವರಿ 2ರಂದು ವಿಡಿಯೊಲಿಂಕ್‌ ಮೂಲಕ ವಿಚಾರಣೆ ಎದುರಿಸುವಂತೆ ಆದೇಶಿಸಿದರು. ಅಲ್ಲದೇ 28 ದಿನಗಳಿಗೊಮ್ಮೆ ನ್ಯಾಯಾಲಯಕ್ಕೆ ಹಾಜರಾಗಬೇಕೆಂದು ಸೂಚಿಸಿದರು.

48 ವರ್ಷದ ನೀರವ್‌ ಮೋದಿ ಕಳೆದ ತಿಂಗಳು ಸಲ್ಲಿಸಿದ್ದ ಮತ್ತೊಂದು ಜಾಮೀನು ಅರ್ಜಿಯನ್ನೂ ಕೋರ್ಟ್‌ ತಿರಸ್ಕರಿಸಿತ್ತು. ಪಿಎನ್‌ಬಿ ವಂಚನೆ ಪ್ರಕರಣದಲ್ಲಿ ಬಂಧನ ಭೀತಿಯಿಂದ ರಾತ್ರೋರಾತ್ರಿ ದೇಶದ ತೊರೆದು ಲಂಡನ್‌ ಸೇರಿದ ನೀರವ್‌ನನ್ನು ಭಾರತಕ್ಕೆ ಕರೆತಂದು ವಿಚಾರಣೆ ನಡೆಸಲು ತನಿಖಾ ಸಂಸ್ಥೆಗಳು ಹಲವು ಪ್ರಯತ್ನಗಳನ್ನು ಮುಂದುವರಿಸಿವೆ. ನೀರವ್‌ ಹಸ್ತಾಂತರ ಪ್ರಕರಣದಲ್ಲಿ ಭಾರತದ ಪರ ಬ್ರಿಟನ್‌ನ ಕ್ರೌನ್‌ ಪ್ರಾಸಿಕ್ಯೂಷನ್‌ ಸರ್ವಿಸ್‌ ಸಂಸ್ಥೆ ಕಾನೂನು ಹೋರಾಟ ನಡೆಸುತ್ತಿದೆ.