ಎಚ್‌ಎಎಲ್‌ಗೆ 1 ಲಕ್ಷ ಕೋಟಿ ಪ್ರಾಜೆಕ್ಟ್‌ಗಳು ಕಾಯುತ್ತಿವೆ: ನಿರ್ಮಲಾ ಸೀತಾರಾಮನ್‌

ಹೊಸದಿಲ್ಲಿ: ಹಿಂದೂಸ್ತಾನ್ ಏರೋನಾಟಿಕ್ಸ್‌ ಲಿಮಿಟೆಡ್‌(ಎಚ್‌ಎಎಲ್‌)ಗೆ ಮುಂಬರುವ ದಿನಗಳಲ್ಲಿ ಸುಮಾರು 1 ಲಕ್ಷ ಕೋಟಿ ರೂ.ಗಳ ಯೋಜನೆಗಳು ಕೈ ಸೇರಲಿವೆ ಎಂದು ರಕ್ಷಣಾ ಮಂತ್ರಿ ನಿರ್ಮಲಾ ಸೀತಾರಾಮನ್‌ ತಿಳಿಸಿದ್ದಾರೆ.

ಶುಕ್ರವಾರ ಲೋಕಸಭೆಯಲ್ಲಿ ನಡೆದ ರಫೇಲ್‌ ಚರ್ಚೆಯ ವೇಳೆ ಎಚ್‌ಎಎಲ್‌ಗೆ ಮುಂದಿನ ದಿನಗಳಲ್ಲಿ ನೀಡುವ ಯೋಜನೆಗಳ ಬಗ್ಗೆ ಮಾಹಿತಿ ನೀಡಿದ್ದಾರೆ. ಇಗಾಗಲೇ 1 ಲಕ್ಷ ಕೋಟಿ ರೂ. ಮೊತ್ತದ ಯೋಜನೆಗಳನ್ನು ಎಚ್‌ಎಎಲ್‌ಗೆ ಕೊಡುವ ನಿಟ್ಟಿನಲ್ಲಿ ಪ್ರಕ್ರಿಯೆಗಳು ನಡೆಯುತ್ತಿವೆ ಎಂದು ಸೀತಾರಾಮನ್‌ ತಿಳಿಸಿದ್ದಾರೆ.

ಎಚ್‌ಎಎಲ್‌ ಕೈನಲ್ಲಿ 50,000 ಕೋಟಿ ಮೌಲ್ಯದ 83 ಎಲ್‌ಸಿಎ ತೇಜಸ್‌ ಯುದ್ಧ ವಿಮಾನಗಳು, 3,000 ಕೋಟಿ ರೂ. ಮೌಲ್ಯದ 15 ಯುದ್ಧ ಕಾಪ್ಟರ್‌ಗಳು, 20,000 ಕೋಟಿ ರೂ. ಮೌಲ್ಯದ 200ಕ್ಕೂ ಹೆಚ್ಚಿನ ಹೆಲಿಕಾಪ್ಟರ್‌ಗಳು, 3,400 ಕೋಟಿ ರೂ.ಗಳ 19 ಸಹಾಯಕ ಯುದ್ಧ ವಿಮಾನಗಳು, 15,000 ಕೋಟಿ ರೂ. ಮೌಲ್ಯದ ಹೆಲಿಕಾಪ್ಟರ್‌ಗಳು ಮತ್ತು 8,400 ಕೋಟಿ ರೂ. ಮೌಲ್ಯದ ಏರೋ ಇಂಜಿನ್‌ಗಳ ತಯಾರಿಕೆ ಯೋಜನೆಗಳು ಇವೆ. ಎಲ್ಲವನ್ನೂ ಸೇರಿಸಿದರೆ ಸುಮಾರು 1 ಲಕ್ಷ ಕೋಟಿ ರೂ. ಮೌಲ್ಯದ ಯೋಜನೆಗಳಾಗುತ್ತವೆ ಎಂದು ನಿರ್ಮಲಾ ಸೀತಾರಾಮನ್‌ ಸಂಸತ್ತಲ್ಲಿ ಮಾಹಿತಿ ನೀಡಿದ್ದರು.


ಆದರೆ ಈ ಬಗ್ಗೆ ಪ್ರತಿಕ್ರಿಯಿಸಿರುವ ಎಚ್‌ಎಎಲ್‌ ಇದುವರೆಗೆ ನಯಾ ಪೈಸೆಯ ಯೋಜನೆ ನಮ್ಮ ಕೈ ಸೇರಿಲ್ಲ ಎಂದು ಸ್ಪಷ್ಟನೆ ನೀಡಿದೆ.