ಬಿಗಿ ಭದ್ರತೆಯ ಮ್ಯೂಸಿಯಂನಲ್ಲಿ ಚಿನ್ನದ ಟಿಫನ್‌ ಬಾಕ್ಸ್‌ ಕಳವು

ಹೈದರಾಬಾದ್‌: ನಗರದ ಪುರಾನಿ ಹವೇಲಿಯಲ್ಲಿರುವ ನಿಜಾಮರ ವಸ್ತುಸಂಗ್ರಹಾಲಯದಿಂದ ಕೋಟ್ಯಂತರ ರೂಪಾಯಿ ಬೆಲೆಬಾಳುವ ಚಿನ್ನದ ಟಿಫನ್‌ ಬಾಕ್ಸ್‌, ವಜ್ರ ಖಚಿತ ಟೀ-ಕಪ್‌, ಸಾಸರ್‌ ಮತ್ತು ಚಮಚ ಸೇರಿದಂತೆ ಒಂದಷ್ಟು ಅತ್ಯಮೂಲ್ಯ ಐತಿಹಾಸಿಕ ಕಲಾತ್ಮಕ ವಸ್ತುಗಳು ಕಳುವಾಗಿವೆ.

ಶನಿವಾರ ತಡರಾತ್ರಿ ಇಲ್ಲವೇ ಭಾನುವಾರ ತಡರಾತ್ರಿ ಕಳುವಾಗಿರುವ ಸಾಧ್ಯತೆ ಇದ್ದು, ಸೋಮವಾರ ಬೆಳಗ್ಗೆ ಪ್ರಕರಣ ಬೆಳಕಿಗೆ ಬಂದಿದೆ. ವಸ್ತುಸಂಗ್ರಹಾಲಯದ ಆಡಳಿತಾಧಿಕಾರಿ ಶೌಕತ್‌ ಹುಸೇನ್‌ ನೀಡಿದ ದೂರಿನ ಮೇರೆಗೆ ಸ್ಥಳೀಯ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಕಳವಾಗಿರುವ ಚಿನ್ನದ ಟಿಫಿನ್‌ ಬಾಕ್ಸ್‌ 2 ಕೆ.ಜಿ. ತೂಕದ್ದಾಗಿದೆ. ಮ್ಯೂಸಿಯಂನ ಮೊದಲ ಮಹಡಿಯ ವೆಂಟಿಲೇಟರ್‌ನ ಕಬ್ಬಿಣದ ಸಲಾಕೆ ಮುರಿದು ಕಳ್ಳರು ಒಳಪ್ರವೇಶಿಸಿದ್ದು, ಇದಕ್ಕೆ ಅವರು ಹಗ್ಗ ಬಳಸಿರಬಹುದೆಂದು ಪೊಲೀಸರು ಶಂಕಿಸಿದ್ದಾರೆ.