ತೆರಿಗೆದಾರರ ಮೇಲೆ ಇನ್ನು 360 ಡಿಗ್ರಿ ನಿಗಾ!

ದುಬಾರಿ ಕಾರು ಖರೀದಿ ಮಾಡಿ ಜಾಲತಾಣದಲ್ಲಿ ಫ್ಯಾಮಿಲಿ ಚಿತ್ರ ಪೋಸ್ಟ್‌ ಮಾಡ್ತಾ ಇದ್ದೀರಾ? ವಿದೇಶದ ತಾಣಗಳಲ್ಲಿ ಎಂಜಾಯ್‌ ಮಾಡ್ತಾ ಇರುವ ದೃಶ್ಯಗಳನ್ನು ಲೈವ್‌ ಆಗಿ ತೋರಿಸ್ತೀರಾ? ಹೊಸ ಚಿನ್ನಾಭರಣ ಹಾಕಿಕೊಂಡು ಫೇಸ್‌ಬುಕ್‌, ಇನ್‌ಸ್ಟಾ ಗ್ರಾಂನಲ್ಲಿ ಮಿಂಚ್ತೀರಾ?

ಹಾಗಿದ್ದರೆ ಏಪ್ರಿಲ್‌ 1ರಿಂದ ಈ ವಿಷಯದಲ್ಲಿ ಸ್ವಲ್ಪ ಜಾಗೃತೆ ವಹಿಸುವುದು ಉತ್ತಮ. ಯಾಕೆಂದರೆ, ನಿಮ್ಮ ಈ ಚಟುವಟಿಕೆಗಳನ್ನು ಆದಾಯ ತೆರಿಗೆ ಇಲಾಖೆ ಗಮನಿಸುತ್ತದೆ!

ನಿಮ್ಮ ಐಷಾರಾಮಿ ಜೀವನಕ್ಕೂ, ಖರ್ಚುವೆಚ್ಚಕ್ಕೂ ಆದಾಯ ಮೂಲಕ್ಕೂ ಹೊಂದಾಣಿಕೆ ಆಗುತ್ತದೆಯೇ? ಆದಾಯ ತೆರಿಗೆ ಕಟ್ಟಲಾಗಿದೆಯೇ? ಐಟಿಆರ್‌ನಲ್ಲಿ ಆದಾಯದ ವಿವರ ದಾಖಲಾಗಿದೆಯೇ ಎಂದು ತುಲನೆ ಮಾಡುತ್ತದೆ. ಎಲ್ಲವೂ ತೆರಿಗೆ ಕಾನೂನಿನ ಅಡಿಯಲ್ಲಿ ಸಮರ್ಪಕವಾಗಿದ್ದರೆ ತೊಂದರೆ ಇಲ್ಲ. ಇಲ್ಲವಾದರೆ ಐಟಿ ನೋಟಿಸ್‌ ಬಂದರೆ ಅಚ್ಚರಿ ಇಲ್ಲ!

ಬಿಗ್‌ ಡೇಟಾ ಟೆಕ್ನಾಲಜಿ
ಏಪ್ರಿಲ್‌ 1ರಿಂದ ಹೊಸ ತೆರಿಗೆ ಪದ್ಧತಿ ಜಾರಿಗೆ ಬರಲಿದ್ದು, ಐಟಿಯ ವಿಭಾಗವೊಂದು ತೆರಿಗೆದಾರರ 360 ಡಿಗ್ರಿ ಪ್ರೊಫೈಲ್‌ ಪರಿಶೀಲಿಸಲಿದೆ. ಇದಕ್ಕಾಗಿ ಬೆಲ್ಜಿಯಂ, ಕೆನಡಾ, ಆಸ್ಪ್ರೇಲಿಯಾಗಳಲ್ಲಿ ಈಗಾಗಲೇ ಬಳಸಲಾಗುತ್ತಿರುವ ಬಿಗ್‌ ಡೇಟಾ ತಂತ್ರಜ್ಞಾನವನ್ನು ಬಳಸಿಕೊಳ್ಳಲಿದೆ. ತೆರಿಗೆ ವಂಚನೆ ತಡೆ, ನೆಲೆ ವಿಸ್ತರಣೆ, 10 ಲಕ್ಷಕ್ಕಿಂತ ಹೆಚ್ಚು ತೆರಿಗೆ ಬಾಕಿ ಇರಿಸಿಕೊಂಡವರ ಮೇಲೆ ಹದ್ದಿನ ಕಣ್ಣಿಡುವುದು ಇದರ ಉದ್ದೇಶ.

ಬ್ಯಾಂಕ್‌ ಅಕೌಂಟ್‌ ಜತೆ ಸೋಷಿಯಲ್‌ ಅಕೌಂಟ್‌
ಇದುವರೆಗೆ ಐಟಿ ಇಲಾಖೆ ಬ್ಯಾಂಕ್‌ ಅಕೌಂಟ್‌ ಮೇಲೆ ಕಣ್ಣಿಡುತ್ತಿದ್ದರೆ, ಇನ್ನು ಸೋಷಿಯಲ್‌ ಮೀಡಿಯಾ ಅಕೌಂಟ್‌ಗಳ ಮೇಲೂ ಕಣ್ಗಾವಲು ಇಡಲಿದೆ.

ಪ್ರಾಜೆಕ್ಟ್ ಇನ್‌ಸೈಟ್‌
ಹೊಸ ಯೋಜನೆಗೆ ಪ್ರಾಜೆಕ್ಟ್ ಇನ್‌ಸೈಟ್‌ ಎಂಬ ಮೆಶೀನ್‌ ಲರ್ನಿಂಗ್‌ ಸಾಫ್ಟ್‌ವೇರ್‌ ಬಳಸಲಿದ್ದು, ಜಾಲತಾಣಗಳಲ್ಲಿ ತೆರಿಗೆದಾರರ ಪೋಸ್ಟ್‌ಗಳು ಹಾಗೂ ಆದಾಯ ಮತ್ತು ವೆಚ್ಚಗಳ ತುಲನೆ ಸಾಧ್ಯ. ಮಾ. 15ರಿಂದಲೇ ಪ್ರಯೋಗದಲ್ಲಿರುವ ವ್ಯವಸ್ಥೆ ಏ.1ರಿಂದ ಪೂರ್ಣ ಪ್ರಮಾಣದಲ್ಲಿ ಜಾರಿಯಾಗಲಿದೆ.